×

RUAC KUƆTH IN RƐL RƆ 1998

Yir 11

1
Ti̱ti̱ kɛ rieet Kuɔth Nhial tëë ci ben kä Yir-mɛ-yaa wëë i̱,
2
“Liŋ rieet matdä ruac, kä wër lät nikɛ ji̱ Juda kɛnɛ ji̱ Jɛ-ru-tha-lɛm.
3
Biɛ wä la̱r kɛ, ɛn ɣöö ɛ Kuoth Nhial ni Kuoth I-thɛ-rɛl i̱, ‘Kuëth akɛ ram in /ci rieet matdä ruac ɛmɛ bi luɔ̱th,
4
rieet tëë cä la̱t guurikun mëë nööŋä kɛ raar ro̱o̱l I-jëp, rɛy maac tha̱t yieethä.’ Liɛŋɛ ruacdä, kä la̱tdɛ tin diaal tin cä la̱r yɛ. Kä bi yɛn cua̱ nɛɛkä, kä bä cua̱ Kuothdun.
5
Inɔ ɣän bä ruac ëë cä la̱r guuri, mëë cä yac rɔ ɛn ɣöö bä kɛ ka̱m mun caak kɛnɛ tuaar, mun ɛ cieŋɛ thi̱n ɛ ɛn walɛ.” Kä cua̱ jɛ loc i̱, “A jɛ te nɔnɔ, Kuoth Nhial.”
6
Kä cu Kuoth Nhial ɣä jiök i̱, “Lat rieet ti̱ti̱ diaal rɛy wi̱i̱ni Juda kɛnɛ rɛy duɔ̱pni Jɛ-ru-tha-lɛm i̱, ‘Tiɛtdɛ rieet matdä ruac ɛmɛ kä la̱tdɛ kɛ.
7
Kä nikɛ gua̱a̱th ëë nööŋä guurikun raar ro̱o̱l I-jëp amäni walɛ, la ruacä kɛ kɛ ni ciaŋ kɛ ɣöö bi kɛ ruacdä luɔ̱th.
8
Duundɛ ɣöö /ken kɛn ruacdä liŋ, cu ram ɔ la̱t ni min caarɛ kɛ lɔcdɛ. Kɛ kui̱c ɛmɔ cua̱ kɛ nöŋ kɛn rieet matdä ruac ɛmɛ diaal, mëë cä la̱t kɛ i̱ ba la̱t, duundɛ ɣöö /ken kɛn jɛ la̱t.’ ”
9
Kä cu Kuoth Nhial ɣä nyɔk kɛ jio̱k i̱, “Tëë kɛ ca̱p mi jiääk rɛy ji̱ Juda kɛnɛ ji̱ Jɛ-ru-tha-lɛm.
10
Cikɛ loc kä jiäk gua̱ni, tëë lökɛ ɣöö ba ruacdä liŋ, a ba wä guɔ̱ɔ̱r ni kuth kɔ̱kiɛn, ji̱ dhɔaar I-thɛ-rɛl kɛnɛ ji̱ dhɔaar Juda ca mat ruacdä mëë cä lat kɛ gua̱ni to̱l.
11
Kɛ kui̱c ɛmɔ bi ɣän Kuoth Nhial kɛ nöŋ riɛk mi /ci kɛ bi kään thi̱n, a cäŋ bikɛ wiee nhiamdä, cä kɛ bi liŋ.
12
Inɔ bi ji̱ wi̱i̱ni Juda kɛnɛ ji̱ Jɛ-ru-tha-lɛm cu wä nhiam kuthni tëë ci kɛn kɛ wa̱ŋ wal tin kuɔ̱r kuɔ̱ɔ̱r. Duundɛ ɣöö /ca kɛ dee kän kɛ gua̱a̱th in tekɛ rikä.
13
Kä ji̱n Juda ŋuan kuthku ce̱tnikɛ wi̱i̱ku, kä ŋuan yi̱kni Jɛ-ru-tha-lɛm tin la kuoth Baal a wa̱ŋkɛ wal thi̱n ce̱tnikɛ ŋuan duɔ̱pnikɛ.”
14
Kɛ kui̱ ɛmɔ cu Kuoth Nhial ɣä jiök i̱, “/Cu pal kɛ kui̱ nɛɛni ti̱ti̱, kɛ ɣöö /cä kɛ bi liŋ mi wä kɛ wä pal kɛ kui̱ rikädiɛn.
15
Ɛ cuɔ̱ŋ in mith kä nɛy tin nhɔakä rɛy luaakdä, kä lät kɛn ni jiäk? Ɛ dee muc da̱kdiɛn ku gaŋ? Kä dee ku tɛɛth ni lo̱ckiɛn?
16
Kä ci Kuoth Nhial kɛ kɔŋ cɔl i̱, ‘Jiath Ɔ-lip mi tɔ̱c, mi tekɛ dɛy ti gɔw.’ Kä täämɛ kɛ wuɔ̱w jiɔam mi di̱i̱t bɛ jɛ döp mac mi bi karkɛ waŋ.
17
Ci Kuoth Nhial in la Ruey Ɣɔaa min piith ji̱ da̱k lat kɛ kui̱du, kɛ kui̱ jiäkni tin ca la̱t ɛ dhɔr I-thɛ-rɛl kɛnɛ dhɔr Juda, tin ca ɣä jak kä gak kɛ ɣöö ca kuth Baal wa̱ŋ wal.”
18
Kä cu Kuoth Nhial ɣä nyuɔ̱th min cäp kɛn ɛ ɣä, kä cua̱ jɛ ŋa̱c kɛ ɣöö cɛ jɛ nyuɔ̱th ɣä.
19
Duundɛ ɣöö cua̱ ce̱tnikɛ dɛl mi wa ŋot. Kä cua̱ jɛ kui̱c i̱ ca̱p kɛ ni jɛ ɣä kä wä kɛ i̱, “Da̱k nɛ jiath kɛnɛ dɛykɛ ŋuɔk nɛ jɛ jɔ̱ɔ̱r wi̱i̱ muɔ̱ɔ̱n, kɛ ɣöö /ca ciötdɛ bi lɛ nyɔk kɛ këk.”
20
Duundɛ ɣöö lö Kuoth Nhial in la Ruey Ɣɔaa min la luk kɛ cuŋ, min la ɣɔ̱n lo̱c kɛnɛ cär, cä go̱o̱nydä la̱th nhiamdu a ji̱ nɛ̈ɛ̈nä a duääci kɛ.
21
Kɛ kui̱ ɛmɔ cu Kuoth Nhial ruac ɛmɛ lat kɛ kui̱ ji̱ Ä-na-thoth tëë go̱r kɛ näkdu wä kɛ i̱, “/Cu ruac go̱o̱kä lat kɛ ciöt Kuɔth Nhial, kiɛ bakɔ ji̱ näk.”
22
Kä cu Kuoth Nhial in la Ruey Ɣɔaa wee i̱, “Nɛnɛ, ɣän bä kɛ duäc, ba ŋuɛ̈tni wutni näk kɛ mut. Kä bi gaatkiɛn kɛnɛ nyieekiɛn li̱w kɛ buɔth,
23
a thilɛ ram mi bi duɔth kɛ tëk kä kɛ. Kɛ ɣöö ɣän bä ji̱ Ä-na-thoth nöŋ riɛk kɛ ruɔ̱n däkädiɛn.”
Nuer Bible 1998
Nuer Bible Bible Society in South Sudan 1998, 2012
:
Tɔ̱a̱w Notethni̱