Upéramo aha ysyry Éufratespe, ajo’o ha ajapyhy che ku’a jokuaha añomi haguégui; ha péina ápe che ku’a jokuaha itujupámara’e; ndojeporukuaavéima mba’evetépe.
Ko tetã kóva iñañaite, nohenduséi voi che ñe’ẽ, ha oiko ipy’apýpe oñandu háichante, ha oho ambue jára rapykuéri oiko hag̃ua hembiguái ramo, ha oñesũ henondepekuéra, upévagui oikóta hikuái ku ku’a jokuaha kóvaicha, naiporãvéima mba’everãme.
Ha pe ku’a jokuaha oja háicha kuimba’e ku’a rehe, péicha aipota Israel retã oja cherehe, he’i pende Ruete, Israel oiko hag̃ua che retã ramo chemomba’eguasu ha chemoherakuã porã hag̃ua ambue tetãnguéra apytépe; ha’ekuéra katu ndoipotái.
Ha napehendúi ramo ko’ã mba’e, ko che ánga ojahe’óta ñemiháme peẽ peñembotuicha haguére ha jahe’o asypópe okuiva’erã tesay che reságui, che retã ojeguerahágui jepokuapýpe tetã mombyrýpe.
Ha ere ramo nde py’apýpe: Mba’érehepa ojehu chéve ko’ã mba’e. Che ambohováita reñemohembiapo vai haguére, ha’ekuéra nemboi, nerãirõ ha oñembosarái nderehe.
Che ahecháma nderakuha ha remyakãratĩ kokue ha cérrope, ne rembiapo vaiete chembojeguarúva. Angái, angái Jerusalen, nereñemopotĩséi piko. Araka’épa reñembyasýta rejapo vai haguére.