Ya re ge go fetile matšatši a mantši Morena a bolela le nna a re: Nanoga o ye kua Forate, o yo tšea mohlantšhu wola, wo ke go laetšego ka re o o ute gona.
Setšhaba se sebe se, se se ganago go kwa lentšu la ka, sa ya le bonganga bja pelo ya sona, sa latela medimo e šele, sa hlankela yona sa e khunamela se tlo etša mohlantšhu woo e sa hlwego e le wa selo.
Gobane ke be ke re moloko wohle wa Isiraele le moloko wa Juda o tlo nkgomarela bjalo ka mohlantšhu ge o gomarela letheka la monna. O realo Morena. Ke be ke re e tlo ba setšhaba sa ka, le leina la ka la go retwa, le botšhepi bjaka. Mme bona ba gana go kwa.
Ba botše lentšu le, o re Morena Modimo wa Isiraele o re: Dipitša ka moka di tlo tšhelwa sebela tša tlala! Gona ba tlo re: A o re ga re tsebe ge dipitša tšohle e le tša go tšhelwa sebela di tlale?
Ke mo o tlogo fetola wa re: Morena o re: Tsebang gore bohle ba ba agilego nageng ye, le dikgoši tše di dutšego sedulong sa Dafida, le baperisita le baporofeta, le bohle ba ba agilego fa Jerusalema, ke tlo ba tšhelela ba tlala ba buiwa.
Ke tlo ba thulanya, monna a thulana le wa gabo; ke tlo thulanya botatago bana le bana. O realo Morena. Nka se ke ka ba namola, nka se ke ka ba setša, nka se ke ka gaogela motho; nka se lese go ba fediša.
Lobang Morena Modimo wa lena e sa le bjale, leswiswi le sešo la swara, dinao tsa lena di sešo tša kgopša dithabeng, leswiswing, le hlologetšwe seetša, se le fetogetše thiti ya lehu, leru la leswiswi.
Fela, ge le sa kwe, pelo ya ka e tlo itelela e utame, ka baka la boikgodišo; mme mahlo a ka a tlo šiphola megokgo, a tlo ela megokgo, ge mohlape wa Morena o thopiwa.
Ge o tlo eletša wa re: Dilo tše di reng di ntlela? Gona o tsebe gore ge o amogilwe diaparo, ge nao tšago di ekwa bohloko, molato ke dibe tšago tše dikgolo.
A Mokushe a ka fetola mmala wa gagwe? A nkwe e ka tlogelana le mebalabala ya yona? Ge di ka kgonega, gona le lena ba le tlwaetšego bošaedi, le ka be le kgona go dira tše botse.
Tša bootswa bja gago, tša dikganyogo tšago, tša bohlola bjago bja bootswa. Makgapha a gago ke a bone mebotong le mo mašemong. Joo Jerusalema! O ka se be wa hlapa. Di tlo feletša kae?