M k'e mẹ ikpoho wẹ di nwụnnahịn barahị, a karị wẹ ẹjan rị mkpẹnrẹn ohimin ọda. M k'e gi efinaị wẹhẹ onyẹ e tikpọnị d'e wiwi ndị nnẹ mụ ikorọbịa wẹ ihiẹn; e hukpu m wẹ eje-ihiẹn idẹnmuzi — hụn k'a fụgbu wẹ, tụgbu wẹ egun.
Okpoho te gi ụmụ ẹsa k'a sọhị, kwọnbepụ, anwụn a rọn'a ebe eki rị elu; ọ fa, ụya e ri ẹ. “ ‘M k'e gi ọpịa-agha gbuzi ndị k'a họdụnị — ghahanị ndị-iṅẹnrẹn wẹ.’ ” Ya kẹ Osolobuẹ ku.
Euu nnẹ m, ọ jọkakwọ n'ị mụ m amụ! E họnringụọ m onyẹ-oku lẹ onyẹ-adịdọ! Ẹlẹ m onyẹ e zinye ịhịan egho, erini m ụgwọ, kanị ịhịan ile hụ nwan a kpọ m iyi.
“Osolobuẹ, y'a marịngụọ ihiẹn ẹnya rị a hụn m; dodo, nyanhan m, n'ị hụn ụzọ lepụ m ẹnya. Mẹgwarịnị m ndị rị e kpokponi m. Anịkwọlẹ wẹ gbu m ebe ị rị e gi ndidin e sọn wẹ; nyanhankwọ mkpari m rị e gi ufiri i a narịn.
Esọntuni m ndị e ri, a ra; esọntuni m wẹ nwọn anwịnrịn wẹ; m'a nọdị nke m, makẹni ẹka ị rị m ukun, makẹni y'e mẹgụọ olulu ihiẹn wẹ rị e mẹ junzi mmẹ nwẹn obi.
Kị haịn nwan afụnfụn m gilẹni a gụ? Kị haịn nwan wẹ gi a rụ m eje-ẹhụ ghalẹni a la? I sikọ d'e mẹ m kẹ iyi a tahịnahịn onyẹ gi ẹ e dọn ẹnya, nọkẹ isi-mirin ghalẹni a gbasọnmẹ mirin?
M k'e mẹdẹ i wụrụ ẹhụ-ẹjan ebe ndịnị rị, ẹhụ-ẹjan igwe-bronzu zegbu enwẹn ẹ. Wẹ k'a lụsọn i ọgụn, kanị onwọnni ihiẹn wẹ k'a saẹka mẹ i, makẹni m nọyeni i anọyeni — m k'a gbapụha ị; m k'a zụọpụha ị — Ya kẹ Osolobuẹ ku.