×

BIBELE 1951

Jeremia 15

1
Morena a fetola a re: Le ge fa pele ga ka go ka ema Moshe le Samuele, tšhaba se nka se kgone go se setša. Ba rake ba tloge fa pele gaka.
2
Ge ba ka botšifša ba re: Re tloge re ye kae? O ba botše o re: Morena o re: Wa lehu a ye lehung. Wa lerumo a ye lerumong. Wa tlala a ye tlaleng. Wa kgolego a ye kgolegong.
3
Gobane ke tlo rapa dilo tša mehuta e mene tša go tlo ba wela godimo. O realo Morena. E tlo ba lerumo la go bolaya; e tlo ba dimpša tša go kokona; le manong a sebakeng, le dibata tša naga, tša go tlo ja le go senya.
4
Ke tlo ba dira setšhošetši mo go mebušo yohle ya lefase ka baka la Manase morwa wa Hiskia kgoši ya Juda, ka baka la tše a di dirilego fa Jerusalema.
5
Ruri, Jerusalema, ke mang a tlogo go gaogela? O kwelwa bohloko ke mang? Ke mang a tlogo go hlola a botšiša maphelo?
6
Morena o re: Nna o ntahlile wa ya mo o tšwago. Nna bjalo ke akga letsogo la go go fediša; ke tennwe ke go go šokelwa.
7
Ka ba fefera ka leselo mo kgorong tša naga ye, ka ba hlakola bana, ka fediša tšhaba sa ka; mme bona ba se lahle tsela tša bona.
8
Ke atetšwe ke basadi ba bahlologadi go fetiša šabašaba la lewatle; mme bommago masogana ao ke ba tlišetša sehulamosegare. Ba tlo tšhoga ke ba ribegetša ka tlalelo le ka tše di šiišago.
9
Mmago bana ba šupago o fedile maatla, o a hwa. O dikelelwa ke letšatši lagwe e sa le mosegare; o lewa ke dihlong, o a hloboga. Mašalela a bona ke a gafela tšhoša ge go tla manaba a bona. O realo Morena.
10
Joo nna joo! Mma! O ntswaletšeng ka ba motho wa dikgang le wa dintwa tša lefase lohle? Ga ka adima; ga ka adingwa; mme bohle ba a nthoga.
11
Morena o re ruri, ke go šadišetša tše dibotse. Lenaba ke tlo le tliša fa la ba la go rapela ka mohlamobe, ka mohla wa kotsi.
12
A tshipi e ka robja, yona tshipi ya leboa ya mphiri?
13
Maruo a gago le thoto ya gago ke di gafela go thopiwa go se theko. Molato ke dibe tša gago tšohle tša mo dileteng tša gago ka moka.
14
Mme ke go lesa wa tloga le manaba a gago wa ya nageng ye o sa e tsebego; ka gobane bogale bja ka bo fehla mollo o tlogo le fiša.
15
Go tseba wene Morena. A ko se ntebale, o tle o ntlhole, o ntefeletše go ba ntlhomarago. O se ntese ka gogolwa o sešo wa ba felela pelo; o tsebe gore ke ka baka lago ge ke gobošwa.
16
Mantšu a gago a hweditšwe ya ba dijo tša ka; mantšu a gago a nkušitše pelo a nthabiša, ke ekwa ke bitšwa ka leina lago, Morena Modimo wa mašaba.
17
Ga ke ešo ka ka ka dula le bakweri ka thabišana nabo; ke dula ke nnoši ka baka la atla sa gago, o ntladitše tshelekego.
18
Ke go reng bohloko bja ka bo se sa kgaotša, ntho ya ka e sa alafege e sa fole? A ke tla fela ke go hwetša o le diba se se gopilego, se se sa botegego?
19
Bjale Morena o re: Ge o boa, ge nna ke go bušetša fa, o tlo ema pele ga ka. Ge o tlo hlaola tše di rategago, wa lahla tše di nyatšegago, gona o tlo ba molomo wa ka. Bona ba tlo boela go wene; ga se wena o tlogo boela go bona.
20
Wena ke go dira morako wo o tiilego wa mphiri mo setšhabeng se. Ba tlo lwa nago; mme ba ka se ke ba go kgona; gobane e a tlogo ema nago ke nna; ke tlo go hlakodiša; ke tlo go namolela. O realo Morena.
21
Ke tlo go namolela diatleng tša babe; ke tlo go ntšha diatleng tša ba sehlogo.
Sotho Bible 1951
Bible Society of South Africa 1986
:
Boloka Lintlha