×

Ika Bible 2018

Jerimaya 16

1
Ya Osolobuẹ nọ sị m,
2
“Alụkwọlẹ nwunyẹ mọbụ mụ ụmụ alịnị.
3
Nị m gwa ị ihiẹn jẹnkọ d'e mẹ ndị wẹ mụ alịnị lẹ ihiẹn k'e mẹ ndị nẹdi wẹ lẹ ndị nnẹ wẹ:
4
Eje-emu jẹnkọ d'e gbu wẹ; onwọnni onyẹ jẹnkọ d'a kwannị wẹ mọbụ li wẹ; ozun wẹ jẹnkọ d'e jun alị kẹ nsịn-efin. Agha lẹ ụnwụn jẹnkọ d'e gbu wẹ; ozun wẹ k'a wụrụnị nnụnụ lẹ anụ-ọfịa ihiẹn-oriri.
5
“Mmẹ wụ Osolobuẹ rị nwan a sị ị: Ejẹnkwọlẹ izu wẹ, ejẹnkwọlẹ d'a kwan wẹ mọbụ hụhụ onyẹ ihiẹn mẹ, makẹni arịzị m a chọ ọrịrịmma ndịnị, ihiẹn wẹ asụọzịnị m, omikẹn wẹ emẹkọzị m.
6
Kẹ onyẹ uku kẹ onyẹ nta jẹnkọ d'a nwụntọ alịnị; onwọnkọ onyẹ k'e lini wẹ mọbụ kwan wẹ; onwọnzikwọnị onyẹ jẹnkọ d'e be enwẹn ẹ ihiẹn mọbụ kọ ntutu ẹ n'ọ rị a kwan wẹ.
7
Onwọnni onyẹ k'e buye ndị umẹ mẹ ihiẹn-oriri, ọsụọn'a ọnwụn nnẹ, ọsụọn'a ọnwụn nẹdi! Onwọnni onyẹ k'e wejẹnni wẹ manya n'o gi rọkọ wẹ obi, ọsụọn'a mkpu ohu sụọ.
8
“Ejẹnkwọlẹ iwe ndị rị e ri oriri d'e du wẹ ri, ra.
9
Mmẹ wụ Osolobuẹ ihiẹn ile rị okpuru ẹ, Chuku ndị Izrẹlụ rị e ku ẹ nị m'e d'a nọ idẹnya ụnụ, ogẹn nke ụnụ, kụsị ẹbụ-ịghọghọ lẹ anwịnrịn imẹ alịnị, anụkọzị wẹ olu ikẹnnyẹ lẹ ikpoho rị a gba-ẹkụkwọ ẹfọ rị a sụọ ụsụọ.
10
“Ị gwa wẹ ihiẹn ndịnị ile, nị a jụma wẹ i, sị, ‘Kị haịn Osolobuẹ gi e kuni o k'e mẹ ẹnyi eje-ihiẹn han ẹnịna? Kịnị kẹ ẹnyi mẹ? Elee njọ kẹ ẹnyi mẹ Osolobuẹ wụ Chuku ẹnyi?’
11
Sị wẹ nị Osolobuẹ sị, ‘Makẹni ndị nẹdi ụnụ kanị gbakitọ m azụụn, sọnmẹ mmọn ichẹn-ichẹn, e fe wẹ, a kpọnị wẹ isi-alị; wẹ gbakitọ m azụụn; edọnmẹni wẹ Iwu m.
12
Kanị, ụnụ e mẹkarịgụọdẹ nwan ndị nẹdi ụnụ njọ! Onyẹ-onyẹ hụ e bu isi-ikẹn ebe ọ rị e mẹ ihiẹn eje-obi ẹ gwa a, jụ nị ụnụ egọnkọ m ntịn.
13
M jẹnkọ nwan d'a gha alịnị ma ụnụ tuhu, ma ụnụ ye alị ụnụ marịnlẹni, ndị nẹdi ụnụ marịnlẹni, ụnụ a nọ ebẹhụ fe mmọn-lẹ-iyi ichẹn-ichẹn uhinhin lẹ efinnaị, makẹni emẹkọnị m ụnụ omikẹn.’
14
“Kanị, mmẹ wụ Osolobuẹ rị e ku ẹ nị ogẹn lala asịkọzị wẹ, ‘Ma Osolobuẹ hụn gha alị Ijiptu gbapụha ndị Izrẹlụ.’
15
Wẹ k'a gha a sị, ‘Ma Osolobuẹ hụn gha alị rị ẹbamịn-ugu lẹ alị ile o te chụshi ndị Izrẹlụ wekinhẹn wẹ alị wẹ.’ Makẹni m jẹnkọ d'e wekinhẹn wẹ alịnị hụn m ye ndị nẹdi wẹ kanị.
16
“Kanị, m zila nwan ndị bu ọda d'a nwụn wẹ kẹ azụụn. Omẹgụ, a kpọha m ndị k'a chụ wẹ kẹ w'a chụ ọfịa, a chụ wẹ wẹ ebe ọwụlẹ wẹ warị, elu ugu lẹ òke ile lẹ imẹ okporo ọmụma.
17
M hụ a hụn ihiẹn ile wẹ rị e mẹ, onwọnni hụn zuerini ebe m rị, onwọnni njọ wẹ m ghalẹni e legha.
18
“M jẹnkọ d'e ye wẹ afụnfụn njọ lẹ eje-ihiẹn wẹ mẹ, ye wẹ ya ụzọ ẹbụọ, makẹni e gigụọ wẹ eje-ihiẹn ndị ahụn wẹ kpụtọsọnmẹ mẹrụ alị m, ihiẹn ndị ahụn rụnị rịlẹni ndụn hụn wẹ rị e fe.”
19
Euu, Osolobuẹ, Ikẹn m lẹ Ebe m'a gbaban, Onyẹ m'e gbọnni ogẹn nsọngbu! Ndị alị ile rị elu-ụwa jẹnkọ d'e buruhẹ i, sị ị, “Mmọn ndị ahụn ndị nẹdi ẹnyi fe ẹlẹ Chuku nke-esi, ihiẹn wẹ kpụhụ kẹ wẹ wụ o nwọnni erere wẹ bannị wẹ.
20
Ịhịan e mẹmẹdẹ nwan ihiẹn o sikọ d'e fe ra? Ihiẹn wẹ e mẹmẹ ẹlẹ Chuku!”
21
Osolobuẹ nọ sị, “M jẹnkọ nwan d'a ghọsị wẹ — m jẹnkọ d'a ghọsị wẹ ikẹn m. Ogẹn ahụn, a marịn wẹ nị mmẹ wụ Osolobuẹ.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes