Oni tigaoni aguari pati gaoni ukumbo ni tironi nga gu mi afu fu roni, mi ki sa roni oni mangi pa avuraroni rogo gu ringara nga gu oni aina nga ha ya, bambiko rago gi zinga mi ginda we nga gu nikaagbi nye anye kindi.”
Ni du wa yegbende ngua rogo ngbi ngume, ka ni abí nga wiri wenepai ye fu ni ya. Ni aráka rogo ugu rago nga ga ngbakungba, rogo ringara tikpo yo aboro araka nga ni ya.
Ni wa ngua rú yo ho pangba ime, nga gu nakparaka tarãha ku ime yo, ka si agunde nga ho faarago nida ni ya, bambiko akpehe ninye ni kina iwo ho, ka ngbaduhe akua nga garã ugure ya, bambiko si aongoda nga ti zu te.”
Wa gbate nadungura awiri azire nga agu ra u ateta nga ra ya, wo du gu ni nadia aukumuko ono ni ruru paha te; bangbanda gani rame si agúari be ni, na ti digida gani rago ni adú ni iramungo.
Ako Yekova, nga ga aYisaraere maabangirise, agu yo dunduko mbu ro i abá zee ku ri yo; agu yo sa tiyo ku sa yo ti ro i aké rimoyo rogo kpotosende, bambiko i mbu Yekova, nga unga ime.
Mi ata ipisa nga tire ka guari ti babanda aboro fuo ro te; mi akpi nga nyemu rago sarangbanga a te, mo ini gere; gu pai nakuru ngbare yo si adu kina ku bangiro.
I bá zee ku ri agu yo narungosi re, ono ka mo bá nga zee ku ri re ya; i yungura, ono ka mo ídi nga ha fere mi yungura ya; mo yé na rago gbigbitapai ku ri yo; mo gbárasi yo na gbarasaahe bara ue!
Ya Yekova fere wẽ: “Mo ndú ki ru ti Ngbadimo Benyamina, nga gu abakindo naarima ti ni nga ga aYudo yo, na yo i naakura ni a, na ti angbadimo bakporo dú du Yerusarema yo,
Ka oni nitindi nga tindiro ku zegi yo dimo kpuroni yo rago sabiti watadu manga sunge wa sa ya, ono oni niká kuti rago sabiti ni kparakpara ziazia rago, wa mi arugu abaroni.
“‘Oni ka oni dége turoni fere, wo poi Yekova ka oni ayé nga na tindiro kono ku ngbadimo bakporo yo rago sabiti ya, ono oni ki ka kuti rago sabiti ni kparakpara ziazia rago, ka oni amánga nga sunge rago ho ya,
abakindo aríma ti ngbadimo gi bakporo re nikasunga auru ga Dawidi mbatabakindo, nioro ri angbagidavura na ri afarasi, i na gayo abazogo, aboro Yuda na araki Yerusarema yo; i aráka rogo gi bakporo re nye anye kindi.
Aboro ki ye rogo abaakporo Yuda yo na rogo agu aba du pati Yerusarema kirikiri, tona ringara Benyamina yo, na ngboongboorago yo, ringara agangara yo, na Negebe yo. I ki niye na zozo amotumo na amotumo, amotumo zende ahe na fuõngua, ki niye na agamunihe nga ga tambuahe ku rogo ga Yekova bambu yo.
Ono ka oni adéga nga turoni fere ya, ka ka kuti rago sabiti ni kparakpara ziazia rago, na aka tindiro ka rima ti angbadimo Yerusarema ti rago sabiti, si du mi ka ginda we ti ni ti gaha angbadimo, i ki riti abambu bakindo Yerusarema yo, ka i abísa nga ha ya.’ ”