1
Ring’ana rikarwa ase Omonene rigacha asende inche Yeremia, rigantebia,
2
“Imoka, otirimboke, ogende ase enyomba y’omokori chinyongo, ningotebie amang’ana aane.”
3
Ase ayio nkagenda ngaika ase enyomba eyio y’omokori chinyongo. Ere nigo arenge gokora emeremo ase emesa yaye y’okoroisia chinyongo.
4
Enyongo y’amaroba arenge koroisia egasareka ase okoboko kwaye. Ase ayio akabomba esike eria naende, akaroisia enyongo ende buna aganetie ebe.
5
Erio ring’ana ri’Omonene rigacha asende, rigantebia,
6
“Inche Omonene nigo ngoteba iga: Inwe Abaisraeli, Inee, tinkonyara kobakora inwe buna omokori chinyongo oyo akorete? Ee, inwe Abaisraeli, buna koreng’ana esike ere ase okoboko kw’omokori chinyongo, naboigo nainwe more ase okoboko kwane.
7
Engaki ende yonsi ndakwane igoro y’egesaku, gose oboruoti, ng’a ngochia koborusia inde aroro, mbotagore na kobasiria kegima,
8
na abanto b’oboruoti obwo nakwanire amang’ana aane igoro asebare, kobaraonchoke na batige ebibe biabo, na inche ning’onchoke ntige amabe aria nare gochia gokora asebare.
9
Na engaki ende yonsi inche ndakwane igoro y’okoagacha na gokinia abanto b’egesaku gose oboruoti,
10
na abanto abwo kobarakore ebibe ase obosio bwane baange konyigwera, inche ning’onchoke, ntige amaya aria narengereretie kobakorera.
11
Bono tebia Abayuda na abanto ba Yerusalemu ng’a: Aya naro Omonene agoteba: Naama! Nkoroisia inde na nkore emeroberio emebe igoro asemore. Kera oyomo tiga airane atige chinchera chi’obobe, morongeyie chingencho chiaino na ogokora kwaino.
12
Korende barabwo mbatebe: Ayio namang’ana a bosa. Ntoganetie tokore buna torengereretie, kera oyomo nigo arabwatie obomwenu bw’enkoro yaye embe.”
13
Ase ayio, aya naro Omonene agoteba: “Boria abanto b’ebisaku gose bana koigwa amang’ana anga buna ayio. Abaisraeli, abwo banga buna omoiseke omwekungi, bakorire amang’ana are amabe mono.
14
Inee! Amagena ’embura a Lebanoni ana koruao atige ebitare bia igoro? Gose ebirooche bikorwa ase ebitare biana koborwa amache amakendu?
15
Korende abanto baane banyebire, basambire ubani ase emegwekano bagosasima. Ase ayio bagochirwe na kogwa ase chinchera chiabo, ekiagera batigire goeta ase chinchera chia kare, baetire ase ebinchera gose tari ase enchera enene.
16
Basaririe ense yabo na koyekora ey’ogoichanerwa, na ey’ogosekererigwa kare na kare. Kera omonto ogoeta aroro nigo agokumia na gosingisia omotwe oye.
17
Nimbaserebanie ase obosio bw’ababisa babo, buna omwaga o moocha ogoserebania. Ning’onchoke imbae omogongo, gose tinkoborokia obosio bwane ase rituko ri’emechando yabo.”
18
Abanto bagakwana, bagatebania, “Inchuo tokore omoroberio bw’ogoita Yeremia. Ntobwate abakuani, na barabwo tibagotiga gotworokereria, gose abanto abang’aini tibagotiga gotosemia, gose ababani tibagotiga gotorareria amang’ana. Inchuo tomosoere titobaisa koigwera amang’ana aye nonya nerimo.”
19
“Aye Omonene, inyigwe, tegerera amang’ana aya ababisa baane bagokwana.
20
Inee! Amaya naakanwe namabe? Abanto bakunyire engoro, erinde basirie obogima bwane. Omonene, ing’inyore buna natenenete ase obosio bwao kobasabera na gokwana amang’ana amaya ase engencho yabo, erinde aye oonchoke na otige endamwamu yao korwa asebare.
21
Ase ayio, oite abana babo nenchara, orue abwo abanyene babugwe nababisa babo na baitwe nemioro; tiga abakungu babo bakwerwe nabana babo amo nabasacha babo, batigwe babe ababoraka. Abanto babo abasacha baitwe namarwaire, na abamura babo baitwe nemioro ase esegi.
22
Obarentere abauri mobosokano, erinde ebirero biigugwe korwa ase chinyomba chiabo, ekiagera bakunyire eirima, erinde basirie obogima bwane: babekire oboreba ng’a amagoro aane abwatwe.
23
Korende aye Omonene nomanyete omoroberio obo bw’okong’ita. Tobaisa kobaabera ebibe biabo, gose tobitinyia birue ase obosio bwao. Obatige babugwe ase obosio bwao, obakorere ayio ekero ore nendamwamu.”
Gussi Bible 2020
OLD EKEGUSII BIBLE PROTESTANT EDITION Bible Society of Kenya, 2020