1
Ọnwan wụ ozi Osolobuẹ zizi Jerimaya:
2
“Jẹn iwe ọkpụ-ite: m k'a nọ ebahụn gwa ị oku.”
3
Ya m nọ shi iwe ọkpụ-ite: E lee ẹ k'o gi wili ọkpụ-ite gi a kpụ ite a kpụ ihiẹn.
4
Ihiẹn ọ rị a kpụ wiwi, o gi ẹ kpụma ichẹn — k'ọ dọn sụọ a.
5
Ya kẹ Osolobuẹ nọ sị m,
6
“Ụnụ ndị Izrẹlụ, asadẹ m ẹka mẹ ụnụ kẹ ọkpụ-iteni rị e mẹ ụrụa ra? Kẹ ụrụa rị ẹka ọkpụ-ite, ẹrịra kẹ ụnụ ndị Izrẹlụ rị m ẹka.
7
M gwa ndị alị ọwụlẹ mọbụ alị-eze ọwụlẹ nị m jẹnkọ d'e huepụ wẹ mọbụ kụtu wẹ mọbụ tikpọ wẹ,
8
nị ndị ahụn m gwa oku e bihutọ ẹka, latọ eje-ihiẹn wẹ rị e mẹ, mmẹ nwẹn sikọ d'e rohutọ, emẹkọzị m wẹ ihiẹn m te sị nị m k'e mẹ wẹ.
9
O mẹzikwọ nị m sị nị m jẹnkọ d'a pali alị mọbụ alị-eze ọwụlẹ, mẹ ẹ turu ọhụnma-ọhụnma,
10
nị ndị ahụn e mẹmẹ eje-ihiẹn, nupụma isi okpuru m, m sikọ d'e rohutọ, emẹkọzị m ihiẹn-ọma hụ m te k'e mẹni wẹ.
11
“Gwa nwan ndị Juda lẹ ndị ile bi obodo Jerusalẹm nị Osolobuẹ sị: m rị a kwademẹ ihiẹn m jẹnkọ d'e mẹ ụnụ, m rị a mamanị ụnụ eje-ihiẹn. La nị nwan eje-obibi ụnụ tọ; onyẹ-onyẹ imẹ ụnụ ya bihutọ ẹka, mẹmẹ ihiẹn rị mma.
12
“Kanị, wẹ jẹnkọ d'a sị, ‘Ẹlẹkwọ ẹnyi k'ị rị a gwa! Ihiẹn rị ẹnyi obi kẹ ẹnyi jẹnkọ d'e mẹ! Ihiẹn obi ẹnyi ye ẹnyi kẹ ẹnyi sikọ d'e mẹ — ọsụọn'a eje-ihiẹn rọ, ọsụọn'a isi-ikẹn rọ!’
13
“Ufiri ẹ, mmẹ wụ Osolobuẹ sị, ‘D'a jụsọnmẹ ni ndị alị ichẹn-ichẹn: onyẹ nụtu ihiẹn nọ ẹnịna? Nwagbọọ wụ Izrẹlụ e mẹọlẹ arụ ka arụ!
14
Mirin-ọchan wụ sno e ziẹnjun imẹ alị Lẹbanọnụ, hụn rịsọnmẹ mkpọtu ugu Lẹbanọnụ e dẹnpụdẹ nwan edẹnpụ ra — mirin oyi hụn gha ebẹhụ tegbu enwẹn ẹ huhẹ, e huhẹbehi e huhẹbehi?
15
Kanị ndị nke m a zọgụọ m; wẹ hụ a mụyeni mmọn nwọnlẹni-isi nsẹnsi. O mẹgụọ wẹ kpọgburusọnmẹ, latọsọnmẹ ụzọ mbụ-mbụ hụ rị mma; o mẹ wẹ ghasọnmẹ ụzọ-ọfịa lẹ ụzọ rịlẹni mma.
16
Alị wẹ jẹnkọ nwan d'a gba okpokoro, wụrụ ihiẹn w'a mụ ẹmụ jẹnrin ejẹn; onyẹ ghafe, o be ọrịọ, finfin isi.
17
Kẹ okẹn ufere ọwụwa ẹnyanwụn dọn e bu ẹjan ẹrịra kẹ m'a dọn mẹ ndị iṅẹnrẹn wẹ chụzịza wẹ; azụụn m kẹ wẹ jẹnkọ d'a hụn ụhụọhịn okẹn-ihiẹn k'e mẹ wẹ, ẹlẹ ihun m.’ ”
18
O nwọn ndị sị, “Bịa nị, nị ẹnyi chọ ihiẹn ẹnyi e mẹ Jerimaya, makẹni, ẹnyi e nwọnghọ ndị nchụn-ẹjan a kuzi ẹnyi Iwu lẹ ndị marịn ihiẹn hụn a dụn ẹnyi ọdụn lẹ ndị-amụma e ku ọnụ Osolobuẹ. Pụha nị, nị ẹnyi gi ọnụ gbu ẹ; nị ẹnyi gọnbehi ni ntịn ihiẹn ọ rị e ku!”
19
M nọ nwan sị, Osolobuẹ, dodo gọn m ntịn! Gọnkwọ ntịn ihiẹn ndị-iṅẹnrẹn m rị e ku.
20
W'e gidẹ nwan njọ a kụ mma ra? E gutọgụọnị wẹ m olu kẹni m danye. Nyanhankwọ kẹ m dọn nọ ihun i a rịọdọnni wẹ, a rịọ ị n'i mẹyeni wẹ, makẹ ị gha e gi ọnụma e sọn wẹ!
21
Ẹgụn ya gbu nwan ụmụ wẹ. Wẹ gi ọpịa-agha gbu wẹ. Di lẹ ụmụ, wẹ nwụnnahịn ikpoho wẹ; emu ya gbu ikẹnnyẹ wẹ, ọpịa-agha ya gbu ikorọbịa wẹ tọ imẹ agha.
22
Ẹkwan ya rị iwe wẹ, ogẹn y'e gi zi wẹ d'a maye wẹ idẹnmizi. Makẹni e gutọgụọ wẹ olu w'e gi nwụndọn m, kpọtọsọnmẹ ọnyan kẹni m zọye ụkụ.
23
Kanị Osolobuẹ, y'a marịnghọ kẹ wẹ dọn rị e zu eje-umẹ nị wẹ gbu m. Agbagharịkwọlẹ wẹ eje-ihiẹn wẹ mẹ! efinchanpụkwọlẹ njọ wẹ ebe ị rị. Ndị iṅẹnrẹn wẹ wẹ mẹri wẹ ru alị idẹnya ị. Mẹ wẹ ihiẹn ebe olulu i kelẹni rọ.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc