Israyɛll nebã, dẽ yĩnga, mam ka tõe n maan yãmb wa yagbã sẽn maandã sɩda? Yagdã sẽn yaa bũmb ning yagbã nugẽ wã, yãmb me yaa a woto mam nugẽ. Maam a Sẽn-Ka-Saab n yeele.
La moasã, mam kota foom tɩ f yeel Zʋʋda ne Zeruzalɛm nebã yaa: Ade, Sẽn-Ka-Saab yetame: «Mam segenda toog y yĩnga, mam saagda zabr y yĩnga. Dẽ, bɩ yãmb ned kam fãa tek yam n bas a manesem-wẽnsã. Tek-y y manesmã ne y tʋʋmã!»
Mam nebã yaool n yĩma mam yelle. Bãmb yõogda wisd n kõt belgr wẽnnaam-dãmba. B belga bãmb tɩ b bʋdg n bas b kʋdem-wẽndẽ soayã, n kɩt tɩ b tũ so-bugsi, la soay sẽn ka kõoge.
B kɩtame tɩ bãmb tẽngã lebg zĩ-vɩʋʋgo. B kɩtame t'a lebg yɛɛsg bũmb wakat fãa. Neb nins fãa sẽn tũud be n loogdẽ wã sã n yãnd-a, b pɛleng yɩkdame tɩ b gird b zutu.
Nebã yeelame: «Wa-y tɩ d sɩɩg taab noor n kɩt t'a Zeremi meneme! Bala, tõnd ka na n kong maan-kʋʋdb sẽn na n zãms tõndo, wall yam dãmb saglgo, wall Wẽnnaam no-rɛɛs koɛɛg ye. Wa-y tɩ d kãneg-a, la d ra kelg a sẽn togsd goam ninsã fãa ye!»
Yel-sõmd yaood yaa beem la? Bãmb tuu bok n dat tɩ m lʋɩ a pʋgẽ. Tẽeg-y tɩ mam dag n yalsa yãmb taoore, n yõk yãmb sɛɛg bãmb yĩnga, tɩ y sũurã ra wa puug ne-b ye.
Woto yĩnga, kɩt-y tɩ kom ne zabr sʋʋg kʋ b kambã. Kɩt-y tɩ b kambã ki, la y kɩt tɩ b pagbã lebg pʋg-kõapa. Kɩt-y tɩ bã-longds kʋ b raopã, tɩ b ra-sãmbã pa tãpẽ.
Kɩt-y tɩ b wʋm b kelems b yiyã pʋsẽ, wakat ning b bɛɛbã sẽn na n wa ling bãmb n wʋk b teedã. Bãmb tuu bok n dat n bẽd maam, bãmb dɩgla bẽdg mam naoã sẽn na n tabgẽ wã.
Sẽn-Ka-Saabo, yãmb mii saagr nins fãa b sẽn saagd n dat n kʋ maamã. Ra kõ-b sugr b yel-wẽnã yĩng ye. Ra yẽes-y bãmb yel-wẽnã ye! Bas-y tɩ b lʋɩ y nifẽ! Sɩbg-y bãmb y sũ-yikrã pʋgẽ!