|
| 1 |
|
| Eki nikyo Nyakubaho yangambiire, nyowe Yeremiya, ati; |
|
| 2 |
|
| Irooko oshuume, oze ow'omunogoozi, haza okwo niyo oraahuririre eki ndaakugambire. |
|
| 3 |
|
| Ntyo naanye nshuuma, nza ow'omunogoozi, nshanga naabumbisa enziga ye. |
|
| 4 |
|
| Kwonka eki yaabaire naanogoora omu ibumba kimwabira omu ngaro. Agaruka arinogooramu ekindi, nk'oku yaabaire naayenda. |
|
| 5 |
|
| Mpaho Nyakubaho angira ati: |
|
| 6 |
|
| Imwe b'eihanga rya Isiraeli 'mwe, tiinyine bushoboorozi bw'okubagira nk'oku ogu munogoozi yaagira? Nyakubaho naagira ati: Nk'oku omunogoozi aine obushoboorozi aha ibumba, naanye nikwo mbwine ahariimwe ab'eihanga rya Isiraeli. |
|
| 7 |
|
| Kiro mushana, ku naakugambira eihanga nari ensi y'obugabe ku ndikwija kurirandura, kurisheenyagura nkaricwekyereza; |
|
| 8 |
|
| kwonka eryo ihanga ri naagambaho ku ryakweteisa ryareka kukora ebibi, naanye nkaayegarukamu, ndeka kureeta akabi aku naaba niinyenda kurireetaho. |
|
| 9 |
|
| Kandi kiro mushana, ku naakugambira eihanga nari ensi y'obugabe ku ndikwija kuritaho, nkarihamya; |
|
| 10 |
|
| kwonka ku ryakukora ebibi ryangwisa kubi, ryayanga kuhurira ebi ndikugamba, naanye nkaayegarukamu ndeka kukora ebirungi ebi mbaire niinyenda kurikorera. |
|
| 11 |
|
| Mbwenu nu, gambira aba Yuda n'abatwire omuri Yerusalemu oti Nyakubaho naagira ati: Reeba, ninteekateeka kubareetaho akabi, kandi ncumire enaama y'okubarwanisa. Mbwenu nimwegarukyemu, buri muntu arekye emicwe ye emibi, mushemeze emitwarize yaanyu n'ebi murikukora. |
|
| 12 |
|
| Kwonka bo nibaija kukugarukamu bati: Ogahwe! Itwe nitwija kutwaza nk'oku tuteekateekire; buri muntu akore nk'oku omutima gwe engangaazi kandi omubi guri. |
|
| 13 |
|
| Nyakubaho nikyo arikugambira ati: Mubuuririze omu mahanga, ku haraabe hariho orahuriire ekintu nk'eki? Abaisiraeli bakozire kubi munonga! |
|
| 14 |
|
| Mbwenu orubaare rwa Lebanooni rukaabura aha nengo za Sirioni? Nainga emigyera y'amaizi garikufuka, ehimintika neeruga omu nshozi, ekaayoma? |
|
| 15 |
|
| Kwonka abantu bangye baanyebirwe; baayoterera baaruhanga abatari b'amazima obubaani; baateishuka emihanda yaabo eya ira, baatoora otuhanda tw'aha rubaju, baareka omuhanda rugyendwa, |
|
| 16 |
|
| ensi yaabo baagihindura erikutiinisa, yaaba ey'okutama abantu ebiro byona. Orikugirabamu weena agyenda aitsirwe obwoba, naayemaamaata. |
|
| 17 |
|
| Ndyabataataanisa bahungye abazigu baabo, nk'oku omucuucu gutuntumurwa omuyaga gwa burugwa-izooba. Aha izooba eri barigwerwaho akagwe, ndyabateera omugongo, tindibahindukira. |
|
| 18 |
|
| Bwanyima abantu bakagira bati: Ka tugiire Yeremiya omu naama. Manya abahongyerezi tibarikwija kubura kutwegyesa eby'omu iteeka, abanyabwengye kubitushoboororera n'abarangi kuturangira ebi Ruhanga abatumire. Nimwije tumubeiherere, kandi tuteeta aha bi arikugamba byona. |
|
| 19 |
|
| Yeremiya nawe nikwo kushaba ati: Ai Nyakubaho, hurira ebi ndikwetonganira; kandi otegye okutu ebi ababisha bangye barikungambaho. |
|
| 20 |
|
| Mbwenu ekirungi kizimuurirwa ekibi? Kwonka bo bantimbiire obusya. Ijuka oku mbaire ninkwemerera omu maisho kubatonganira ngu mbakize ekiniga kyawe. |
|
| 21 |
|
| Mbwenu itsa abaana baabo enjara, kandi obaheyo bamarweho rurara, abakazi baabo babe encwekye, kandi babe abafaakazi, abashaija baabo baitwe orufu, n'abatsigazi baabo bagwe aha rugamba. |
|
| 22 |
|
| Booherereze emigogo y'ababisha, ebateere kitaraariire, enduuru zihurirwe omu maka gaabo. Manya bantimbiire obusya bw'okugwamu, bantega ebifuruma by'okuntegura. |
|
| 23 |
|
| Kwonka, ai Nyakubaho, noomanya enaama zi baanyiniire kuunyita. Otabasaasira ekicumuro kyabo; nobu kwakuba okwiha omu maisho gaawe ekibi kyabo! Bahwerekyerereze omu maisho gaawe, obakoreho okibainiire ekiniga. |
|
|
|
|