A fɔ u ye ko: ‹Zuda mara masacɛw ni Zeruzalɛmukaw, aw ye mɛnni kɛ Masaba ka kuma la. Masaba, Setigi, Isirayɛli ka Ala ko: Ne bena bɔnɛba lase yɔrɔ nin na fɔɔ mɔgɔ o mɔgɔ mana o kibaruya mɛn, a be kɛ i n'a fɔ saan le pɛrɛnna o tigi tulo kɔrɔ.
Bari u banna ne la, u ye yɔrɔ nin kɛ cogo dɔ la fɔɔ mɔgɔ be fili a ma. U ye siya wɛrɛw ka joow sɔn yen, olu n'u faaw ani Zuda mara masacɛw ma minw lɔn. U ye yɔrɔ nin fa ni mɔgɔ jalakibaliw joli ye.
«O yɔrɔ la, n bena Zeruzalɛmukaw ni Zuda mara mɔgɔw ka kolatigɛninw cɛn. U jugu minw b'u fagayɔrɔ ɲinina, ne ben'a to olu b'u faga ni murujanjanw ye. Ne bena o suuw kɛ kɔnɔw ni kongosogow ka dumuni ye.
Ne ben'a to olu b'u deen cɛmanw ni musomanw sogo ɲimi, olu bena to ka ɲɔgɔn ɲimi, k'o sababu kɛ bɔnɛ ni dusukasi ye, u juguw ye min la u kan. Olu minw b'u ka saya fɛ.
k'a fɔ u ye ko ne Masaba, Setigi ko: ‹Ne bena siya nin halaki, ka duguba nin ci, i n'a fɔ mɔgɔ be daga ci cogo min na. N'a cira, a te se ka dilan. Suuw donyɔrɔ tanya kama, u bena taga suuw don Tafɛti.
Zeruzalɛmu ni Zuda mara masaw ka boonw bena nɔgɔ i n'a fɔ Tafɛti, u ye sɔnni kɛ boon minw bɛɛ sanfɛ ka lolow bato, ani ka batofɛn wɛrɛw sɔn ni jii ye.› »
«Masaba, Setigi, Isirayɛli ka Ala ko: ‹Ne tun ye bɔnɛ min koo fɔ dugu nin kosɔn, ne bena o bɛɛ lase ale n'a gɛrɛfɛduguw bɛɛ ma sisan. Bari u y'u tulo gwɛlɛya, u ma sɔn ka mɛnni kɛ ne fɛ.› »