A zing ciangin Pashhur in a kolbulhna panin Jeremiah a khah khit ciangin Jeremiah in, “ Topa in nang, Pashhur ci-in hong sam nawn lo a, ‘Mun Khempeuhah Launa,’ ci-in hong samta hi.
Bang hang hiam cih leh Topa in hong cihin-ah, ‘En in, keimah in nang le na lawmte’ lau nadingin nang kong bawl ding hi. Babylon kumpipa’ khut sungah Judah gam khempeuh ka pia ding hi. Amah in sal dingin amaute Babylon khua-ah paipih ding a, namsau tawh a thatlum ding hi.
Tua tham loin khuapi sunga hauhna khempeuh, a nasepsa uh khempeuh, a neih a lam a thupiteng khempeuh uh le Judah kumpite’ sumlepai khempeuhte a galte’ khut sungah ka pia ding a, amaute in sutin, manin, Babylon khua-ah a paipih ding uh hi.
Pashhur aw, nang le na innsung uha omte khempeuh sal dingin Babylon khua-ah na pai ding uh a, tua lai munah nang na si ding hi. Nang a kipan a man lopi a na thuhilh a ngai na lawmte khempeuh hong kivui ding uh hi,” a ci hi.
Topa aw, kei nong khem a, khemna ka thuak takpi hi. Kei sangin nang na hatzaw a, keimah nong zo hi. Nisimin mite’ nuihsat lel ka suak a, mi khempeuh in kei hong zahko uh hi.
Bang hang hiam cih leh thu ka gen simin, “Ngongtatna le kisiatna!” ci-in ka kiko den hi. Bang hang hiam cih leh Topa’ kammal ka gen khiatna hangin nisimin simmawhna le zahpihna ka thuaklawh hi.
Keimah in, “Ama thu ka gen kei ding a, ama min ka lo kei ding hi,” ci mah leng zong, ama thu ka lungsim sungah mei bangin hong kuang a, ka guh ka tang sungah kikhumcip ahih manin ka ki-ipipna-in ka gimlua a, gen loin ka om thei kei hi.
Mite’ kihuau simna thu tampi ka za a, mun khempeuh lauhuai hi. Ka lawm itte khempeuh in ka cihmawh ding hong ngak gige uh a, “A mawhna pulak ni! A mawhna pulak ni! Amah i khemzo kha ding hi. Tua hileh i zo kha ding a, tua ciangin i thukkik ding hi,” hong ci uh hi.
Ahih hangin Topa pen a kihtakhuai galhang pa bangin kei tawh hong omkhawm gige hi. Tua ahih manin kei hong bawlsiate tuk ding uh a, kei hong zo lo ding uh hi. A tawntung a a mindaina uh kimangngilh ngei lo ding hi.
A thuman mite a entel, lungsim le ngaihsutna a mu Vanglian Topa aw, amaute na thukkikna kei hong musak in. Bang hang hiam cih leh nangma khut sungah ka thu kong ap khin hi.