×

Ika Bible 2018

Jerimaya 20

1
Ya onyẹ nchụn-ẹjan wụ Pashuru nwa Ima nọ nụ kẹ Jerimaya rị e bu amụma hụ. Pashuru wụ onyẹ-isi ndị-nche ụlọ-nsọ Osolobuẹ ogẹn hụ.
2
Ọ nọ nwụnrụn Jerimaya, sị wẹ fịan a mkpịnsịn, kpọ a ụkụ lẹ ẹka ye aba, Ọnụ-mgbọn ụlọ-nsọ Osolobuẹ, Ọnụ-mgbọn Bẹnjamini hụn rị mkpọnyin.
3
Eki e fọn, Pashuru nọ kpọpụ Jerimaya aba hụ. Jerimaya nọ sị a, “Ebe Osolobuẹ rị, ẹfan ị ẹlẹzi Pashuru. Ẹfan ị wụ nwan ‘Magọ-Misabibu’ hụn wụ ‘Ihiẹn Egun E Jungụọ Ụzọ Ile’.
4
Makẹni, Osolobuẹ sị, ‘M k'e mẹ i ihiẹn k'a tụ kẹ yụ kẹ ndị-ọwụ ị egun. Ndị-iṅẹnrẹn wẹ k'a nọ idẹnya ị gi ọpịa-agha gbu wẹ. M k'e we ndị Juda ile ye eze ndị Babilọnụ mẹri, ọ kpụnrụn ndị ọ k'a kpụnrụn shi Babilọnụ, o gi ọpịa-agha gbu ndị o k'e gbu.
5
M k'e bu ihiẹn ile ndị obodoni wụ Jerusalẹm nwọn ye ndị-iṅẹnrẹn wẹ — m k'e bu ihiẹn ile wẹ rụnpụha imẹ obodoni lẹ ihiẹn ile rị mkpa wẹ butọ lẹ ihiẹn ile ndị-nze Juda butọ ye ndị-iṅẹnrẹn wẹ, a kwarị wẹ wẹ lashi Babilọnụ, ọ wụrụ ihiẹn wẹ nwọnhẹn imẹ agha.
6
“ ‘Yụ nwẹn wụ Pashuru, wẹ k'a kpụn yụ lẹ ndị ile rị iwe i shi Babilọnụ. I k'a nọ ebẹhụ nwụnhụn; ebẹhụ kẹ wẹ k'e litọ ị, kẹ yụ kẹ ndị-ọwụ ị ile ị rị a tụ ntụ n'o nwọnni ihiẹn jẹnkọ d'e mẹni.’ ”
7
Jerimaya nọ sị, “Euu Osolobuẹ, y'e dufie m, m nọ kweyeni i; y'a karị m ẹka, nke i nọ bụn. Ẹmụ-ẹmụ kẹ w'a mụ m nwan uhinhin lẹ efinaị! Ịhịan ile hụ a mụ m ẹmụ!
8
M shịapụhụ ọnụ ku oku, ‘Nsọngbu-nsọngbu lẹ ntikpọ-ntikpọ’ kẹ m'e yisọnmẹ. Oku-Osolobuẹ hụ e buhẹni m mkpari lẹ ifẹnrẹn uhinhin lẹ efinaị.
9
M sị ‘Ekukọzị m banyeni Osolobuẹ, Egikọzị m ẹfan a ku,’ oku ẹ a dụnma m kẹ ọkụn imẹ obi, ọkụn hụn rị m imẹ ọkpụkpụ, ẹhụ a rọ m m gi e kwọndọn ẹ — ọ nịkọ m kwọndọn!
10
M hụ a nụ kẹ ndị bu ọda rị a ka-ụka: a kpọ m ‘Ihiẹn-egun E Jun Azụụn ile!’ A sị ‘Kpe n'ẹ! Nị ẹnyi kpe n'ẹ!’ Ndị ile m kpọ ndị ọwụ m hụzịdẹ nwan e che nị m dan. Wẹ hụ a sị, ‘Ikẹnkwọ nị ẹnyi s'ẹka rẹrẹrị a — ẹka ẹnyi a karị nke ẹ, ẹnyi a hụn ụzọ mẹgwarị a.’
11
“Kanị Osolobuẹ nọyeni m anọyeni nọkẹ okẹn odogun-agha. Ya wụnị ndị rị e kpokponi m jẹnkọ d'a dan, emẹrikọ wẹ; wẹ jẹnkọ d'a fa ọhụnma-ọhụnma ifẹnrẹn wẹ agụkọ.
12
Euu, Osolobuẹ ihiẹn ile rị okpuru ẹ, hụn e lele ndị ezi-omumẹ, e nyọnchan obi lẹ iroro ịhịan! Nị m hụn kẹ ị rị e mẹgwarị wẹ — makẹni e bugụọ m oku m che i ẹka.
13
Bụ nị nị Osolobuẹ ẹbụ! Ja nị Osolobuẹ mma! Ịya a gbapụha ndụn onyẹ wẹ rị a bịangbu ẹka eje-ịhịan.
14
Ọnụ-ẹsọn ya rịnị ụhụọkịn wẹ mụ m! Wẹ ekulẹ oku ụhụọkịn nnẹ m mụ m ọhụnma!
15
Ọnụ-ẹsọn ya rịnị onyẹ hụn gwa nẹdi m nị a mụ wẹ m, onyẹ hụn mẹ ẹ ghọghọma, onyẹ hụn sị a, ‘Y'a mụgụọ nwa — okẹnnyẹ rọ!’
16
Onyẹ hụ ya rị kẹ obodo ndị ahụn, obodo ndị Osolobuẹ tikpọ, o mẹni omikẹn wẹ. Ya nụsọnmẹ ẹkwan-ụya ụtụntụn, nụsọnmẹ oro-agha efinaị,
17
o gilẹni gbu m tọ ẹfọ, nnẹ m a wụrụ ili m, busọnmẹ ogbe-ẹfọ.
18
Kị m ghadẹni nwan ẹfọ pụha d'a hụnsọnmẹ nsọngbu lẹ ụya, d'a tọ imẹ ụya e we m nwụn?!”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes