1
Ọnwan wụ ihiẹn Osolobuẹ gwa Jerimaya ogẹn eze wụ Zẹdikaya gi zi Pashuru nwa Mal'kija lẹ onyẹ nchụn-ẹjan wụ Zẹfanaya nwa Maaseya d'a hụn a, wẹ sị a,
2
“Dodo rịọnị ẹnyi Osolobuẹ n'o d'e yeni ẹnyi ẹka. Makẹni Nebukadreza wụ eze alị Babilọnụ rị nwan a lụsọn ẹnyi agha. Ikẹnkwọ nị Osolobuẹ rụnzịnị ẹnyi ọrụn atụmẹnya k'o dọn a rụn mbụ-mbụ, kẹni Nebukadineza yeni ẹnyi efe.”
3
Ya Jerimaya nọ sị wẹ, “Sị nị Zẹdikaya nị
4
Osolobuẹ wụ Chuku alị Izrẹlụ sị, ‘M'e d'e gi ihiẹn-agha ị lụsọn i agha. Ndị-agha ị ahụn i gi nwan e mẹ uche i rịhụ a lụsọn Nebukadineza eze Babilọnụ lẹ ndị ya lẹ wẹ wị kehunmẹ ụnụ agha mmaka, makẹni m jẹnkọ d'e webanhandẹ Nebukadineza wẹ imẹ obodoni.
5
Mmẹ lẹ enwẹn m jẹnkọ d'e gi ikẹn m mẹ ụnụ ihiẹn. M k'e gi ẹka-ikẹn, okẹn iwe lẹ ọnụma mẹ ụnụ ya.
6
M k'e gbu ihiẹn ile rị imẹ obodoni — kẹ ịhịan kẹ anụmanụ, eje-emu k'e gbu wẹ.
7
O mẹgụ, m k'e we eze Juda wụ Zẹdikaya lẹ ịhaịmẹ ẹ lẹ ndị ile k'a wanahịn eje-emu hụ lẹ ọpịa-agha lẹ ẹgụn hụ lala imẹ obodoni ye Nebukadineza wụ eze ndị Babilọnụ lẹ ndị iṅẹnrẹn wẹ ndị ọzọ chọkọ wẹ ogbugbu. O jẹnkọ d'e gi ọpịa-agha gbu wẹ; o mẹkọnị wẹ omikẹn mọbụ ebere, o lekọdẹ wẹ ẹnya ihun. Ya kẹ Osolobuẹ ku.’
8
“Gwazịkwọ wẹ nị mmẹ wụ Osolobuẹ sị, ‘M rị e butọnị ụnụ ụzọ ndụn lẹ ụzọ ọnwụn, nị ụnụ hanrịn ohu.
9
Onyẹ ọwụlẹ hụn nọdị imẹ obodoni, ọpịa-agha mọbụ ẹgụn mọbụ eje-emu k'e gbu ẹ. Kanị, onyẹ ọwụlẹ hụn jẹn d'e we enwẹn ẹ ye ndị Babilọnụ hụn kehunmẹni ụnụ k'a rị ndụn; o k'a hụn isi wanahịn.
10
A kwademẹgụọ m nị m jẹnkọ d'e mẹ obodoni eje-ihiẹn, ẹlẹ ihiẹn rị mma — mmẹ wụ Osolobuẹ ku ẹ. M k'e bu obodoni che ẹka eze ndị Babilọnụ, o yi ẹ ọkụn!’
11
“Sịzịdẹ ndị ikpụlọ eze alị Juda, ‘Gọn ni ntịn ihiẹn Osolobuẹ ku: ọ sị:
12
Ụnụ ndị ikpụlọ Defidi, lekwọ nị ihiẹn Osolobuẹ ku: E gikwọ nị ezioku a kị ụhụọhịn-ụhụọhịn; a zụọpụhakwọ nị ndị wẹ rị a bịangbu ẹka ndị rị a bịangbuni wẹ — amamgbe m'e gi ufiri eje-ihiẹn ụnụ mẹ gi ọnụma m mẹ ụnụ ihiẹn lekẹ ebe ọkụn nọ a dụn, ọkụn wẹ jẹnkọlẹni d'e tinyụn.
13
Ihiẹn m k'e mẹ i, Jerusalẹm, ịyụ hụn rị ọdanmgbugbu ahụn ugu fihunmẹ; ịyụ, okẹn-ọmụma ahụn rị etintinnaị alị-aradan. Ụnụ hụ a sị, “Onyẹ k'a s'ẹka bịa ebeni d'a lụsọn ẹnyi agha?! Onyẹ k'a s'ẹka banhan ebeni ẹnyi rị?!”
14
Kanị, m jẹnkọ d'e ye ụnụ afụnfụn ihiẹn ụnụ mẹ. Mmẹ wụ Osolobuẹ ku ẹ. M k'a mụ ọkụn ye ẹgboko ụnụ hụ, ọkụn hụn k'a dụnpụ ihiẹn ile rị ebe ụnụ rị.’ ”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc