Na di wɔd dis we kam to Jɛrimaya, we kɔmɔt to PAPA GƆD di tɛm we kiŋ Zɛdikaya bin sɛn Pashɔ, we na Malkaya in bɔypikin, ɛn Zɛfinaya we na di man we de mek sakrifays fɔ pipul sin, we semweso na bin Maasɛaya in bɔypikin, to am se,
“Fɛnɔt to PAPA GƆD fɔ wi, bikɔs Nɛbyukadnɛza we na kiŋ na Babilɔn de mek wa pan wi; sɔntɛnde, PAPA GƆD go yuz ɔl in wɔndaful tin dɛn we i kin du, fɔ ɛp wi, ɛn i go mek i fred fɔ fɛt wi.”
“Go tɛl Zɛdikaya se, ‘Na dis PAPA GƆD we na Izrɛl dɛn Gɔd se: A go gɛda ɔl di wɛpɔn dɛm fɔ fɛt wa, we de na una an, we una de yuz fɔ fɛt di kiŋ na Babilɔn, ɛn di Babilonian dɛm we sɔrawnd una na do na una wɔl dɛm; ɛn a go briŋ dɛm ɔl kam put na di siti sɛnta.
PAPA GƆD se, afta dat, A go mek Nɛbyukadnɛza we na kiŋ na Babilɔn, we na Zɛdikaya dɛn ɛnimi dɛn we de tray fɔ kil dɛm, ebul kapchɔ Zɛdikaya we na kiŋ na Juda, ɛn in wokman dɛm, ɛn ɔl di pipul dɛn na dis siti we nɔ day di tɛm we siknɛs, wa ɛn bad bad aŋri bin mit dɛm; Nɛbyukadnɛza go kil dɛm wit sɔd; i nɔ go luk nɔbɔdi ɛn sɔri fɔ am, ɔ lɛf ɛnibɔdi ɔ fil nain at fɔ nɔbɔdi.
Udat nɔ gri kɔmɔt na di siti go day na wa, ɔ wit bad bad aŋri ɔ siknɛs; bɔt udat go na do go sɔrɛnda to di Babilonian dɛm we sɔrawnd una, nɔ go day, ɛn i go gɛt in layf fɔ in prayz na wa.
Yu Devid in os! Na dis PAPA GƆD se: “kɛri awt jɔstis na mɔnin, ɛn sev pipul dɛn kɔmɔt na di wan dɛn we de sɔprɛs dɛm, dɛn an, in we dɛn dɔn tif, if nɔ so, mi vɛksteshɔn go mit dɛm lɛk faya, ɛn bɔn, we nɔbɔdi nɔ go ebul ɔt am, fɔseka di ivul tin dɛm we una de du.’”