×

現代台語譯本羅馬字版

耶利米書 22

1
Siōng Chú kiò góa ji̍p-khì Iû-tāi ông-kiong, kā chē Tāi-pi̍t ông-ūi ê Iû-tāi -ông, koaⁿ-oân, í-ki̍p Iâ-lō͘-sat-léng ê jîn-bîn kóng, “Tio̍h chù-ì thiaⁿ Siōng Chú ê ōe.
2
3
Siōng Chú án-ni kóng, ‘Lín tio̍h péng-kong-hêng-gī, tùi khi-ap ê lâng ê chhiú kái-kiù siū ap-chè ê lâng; m̄-thang ge̍k-thāi á-sī ēng kiông-pō ê chhiú-tōaⁿ tùi-thāi gōa-cho̍k-lâng, ko͘-jî, kóaⁿ-hū, mā m̄-thang tī chit-tè thó͘-tōe lâu bû-ko͘ ê lâng ê huih.
4
Lín nā chhiat-si̍t chun-siú góa ê bēng-lēng, chē Tāi-pi̍t pó-chō ê kun-ông, kap hiah-ê koaⁿ-oân, jîn-bîn chiū thang chē bé-chhia á-sī khiâ-bé, keng-kè siâⁿ-mn̂g chìn-ji̍p ông-kiong.
5
M̄-kú lín nā bô beh ho̍k-chiông góa ê bēng-lēng, góa kí ka-kī li̍p-sè, chit-ê kiong-tiān ōe chiâⁿ-chòe hong-po͘. Góa Siōng Chú án-ni soan-kò.
6
“‘Tùi góa Siōng Chú lâi khòaⁿ, Iû-tāi ê ông-kiong chhin-chhiūⁿ Ki-lia̍t, chhin-chhiūⁿ Lê-pa-lūn ê soaⁿ-téng hiah-ni̍h súi; m̄-kú góa beh hō͘ i pìⁿ-chòe hong-po͘, bô lâng khiā-khí.
7
Góa ōe phài lâng kā i húi-bia̍t; in ōe tòa pó͘-thâu lâi chhò-tn̄g hiah-ê pek-hiuⁿ-chhiū chòe ê thiāu, kā hiat-lo̍h hé.
8
“‘Ōe ū chin chōe gōa-cho̍k-lâng keng-kè chit-ê siâⁿ, hō͘-siōng kóng-lâi-kóng-khì: Siōng Chú sī-án-chóaⁿ án-ni tùi-thāi chit-ê tōa ê siâⁿ?
9
Ū lâng ōe kóng: Sī in-ūi chit-ê siâⁿ ê lâng ûi-pōe Siōng Chú — in ê Siōng-tè kap in li̍p ê iok, khì ho̍k-sāi kèng-pài pa̍t-ê sîn-bêng.’”
10
Iû-tāi -lâng, m̄-bián ūi-tio̍h í-keng sí--khì ê ông ai-khàu, m̄-bián ūi-tio̍h i pi-siong; tio̍h ūi i ê kiáⁿ Iok-hap-su ai-khàu, in-ūi Iok-hap-su siū-lia̍h bōe koh tńg--lâi, bōe-tàng koh khòaⁿ-tio̍h ka-kī ê hiong-thó͘.
11
Iú-koan kè-sêng i ê lāu-pē Iok-se-a chòe Iû-tāi -ông ê Iok-hap-su, Siōng Chú án-ni kóng, “I siū-lia̍h lī-khui chit-ê só͘-chāi, éng-oán bōe koh tńg--lâi.
12
I ōe sí tī siū lia̍h--khì ê só͘-chāi, bōe-tàng koh khòaⁿ-tio̍h chit-tè thó͘-tōe.”
13
Chit-ê lâng ū chai-hō lah! I ēng bô kong-gī ê chhiú-tōaⁿ khí ka-kī ê kiong-tiān, ēng bô kong-tō ê hong-hoat khí lâu-á-chhù; i hō͘ ka-kī ê tông-pau chòe pe̍h-kang, lóng bô hō͘ in kang-chîⁿ.
14
I kóng, “Góa beh ūi ka-kī khí koân-lâu-tōa-chhù, kā chhù khui thang-á, ēng pek-hiuⁿ-chhâ chong-hông, piah-pang chhat âng-sek.”
15
Lí ēng pek-hiuⁿ-chhâ chō ko-kùi ê kiong-tiān, beh piáu-sī lí pí pa̍t-lâng khah gâu choh-ông sī--bô? Lí ê lāu-pē kiám m̄-sī péng-kong-hêng-gī, chi̍t-sì-lâng hióng-siū hok-khì, sū-sū heng-thong?
16
I ūi khùn-khó͘ kap sàn-chhiah ê lâng sin-oan, hit-sî i sū-sū heng-thong; che kiám m̄-sī in-ūi i chin-chiàⁿ bat góa? Siōng Chú án-ni kóng.
17
M̄-kú lí ê sim-ba̍k kan-ta khòaⁿ ka-kī ê lī-ek, lâu bû-ko͘ ê lâng ê huih, khi-hū ap-chè jîn-bîn.
18
Só͘-í, chiam-tùi Iok-se-a ê kiáⁿ Iû-tāi -ông Iok-ngá-kèng, Siōng Chú án-ni kóng: Bô lâng ōe ūi-tio̍h i ai-siong, kóng, “Ài ah, góa ê hiaⁿ-tī, góa ê chí-bē!” Bô lâng ōe ūi-tio̍h i ai-khàu, kóng, “Ài ah, góa ê chú, góa ê ông!”
19
I siū bâi-chòng chhin-chhiūⁿ lâng teh tâi lû-á, hō͘ lâng thoa-cháu, hiat chhut-khì Iâ-lō͘-sat-léng siâⁿ-gōa.
20
Iâ-lō͘-sat-léng ê chū-bîn ah, tio̍h peh-chiūⁿ Lê-pa-lūn-soaⁿ tōa-siaⁿ hoah! Khì Pa-san tōa-siaⁿ khàu! Khì Mô͘-ap ê soaⁿ-téng tōa-siaⁿ hoah! Kap lí kiat-bêng ê pêng-iú lóng siū phah-pāi lah.
21
Lín chá-chêng an-tēng ê sî, góa kéng-kò lín, lín lóng m̄ thiaⁿ! Lín tùi siàu-liân chiū án-ni, m̄ thiaⁿ góa ê ōe.
22
Lín ê siú-léng ōe hō͘ hong chhe-cháu; kap lín kiat-bêng ê pêng-iú ōe siū-lia̍h. Lín lóng ōe siū bú-jio̍k, in-ūi lín ê só͘-chòe lóng sī pháiⁿ.
23
Lín tòa tī Lê-pa-lūn, tī pek-hiuⁿ-chhâ khí ê kiong-tiān, lín lia̍h chòe an-choân; chai-lān chi̍t-ē kàu, lín ōe chhin-chhiūⁿ hū-jîn-lâng chhui-chūn, thòng-khó͘ ai-kiò.
24
Siōng Chú tùi Iok-ngá-kèng ê kiáⁿ Iû-tāi -ông Iok-ngá-kun kóng, “Góa beh kí góa éng-oán ê oa̍h-miā li̍p-sè, sui-jiân lí sī góa chiàⁿ-chhiú ê chhiú-chí-ìn, góa mā beh kā lí pak--lo̍h-lâi,
25
kau hō͘ hiah-ê lí só͘ kiaⁿ, beh thâi lí ê lâng, chiū-sī Pa-pí-lûn -ông Nî-pò͘-kah-nî-sat kap i ê kun-tūi.
26
Góa beh chiong lí kap lí ê lāu-bú kóaⁿ-khì gōa-kok, khì m̄-sī lín chhut-sì ê só͘-chāi; lín ōe sí tī hia.
27
Lín chin ài tò--lâi, m̄-kú éng-oán bōe-tàng tò--lâi.”
28
Siōng Chú koh kóng, “ Iok-ngá-kun kiám m̄-sī chhin-chhiūⁿ chi̍t tè phò-chhùi, bô lâng beh ti̍h ê pôaⁿ-á? Sī-án-chóaⁿ i kap i ê kiáⁿ-jî, cha-bó͘-kiáⁿ lóng siū hiat-ka̍k, liû-bông tī gōa-tōe?
29
Tāi-tōe ah, tāi-tōe! Tio̍h chù-ì thiaⁿ Siōng Chú ê ōe.
30
Tio̍h kì chi̍t pit: Chit-ê lâng bô hō͘-sû, sī it-seng lóng bô sêng-chiū ê lâng; i bô hō͘-tāi kè-sêng Tāi-pi̍t ê ông-ūi, thang kè-sio̍k thóng-tī Iû-tāi.” Siōng Chú án-ni soan-kò.
Chinese TTVR
The Bible Society in Taiwan
:
保存笔记