Lat Kuoth nhial ɛ ɛn ɣöö la̱tdɛ cuŋ kɛnɛ thuɔ̱ɔ̱k, kä lua̱kɛ ram in mackɛ tetni nɛɛni tin ciaŋ kɛ kɛ a jiäk. Kä /cuarɛ juɔ̱r lät kä duer kä /cuarɛ nyiëëny kɛ jɛ, kä /cuarɛ rɛɛt kɛnɛ ciek jɔkä ciɛŋ ɛ jek, kä /cuarɛ riɛm raam mi kui̱c ŋu wuɔ̱th piny ɛn guäth ɛmɛ.
Kä mi wi̱i̱ ruacdä nɛmɛ wä luɔ̱th, bi kua̱r tin te wi̱i̱ kɔam kuäärä Dee-bid ben rɛc kɛ thuk rɛ̈ɛ̈k dhɔaar ɛmɛ, a ko̱tkɛ kɛ thurbiɛɛli kɛnɛ jio̱ŋko̱o̱ri kɛɛl kɛ ji̱ kɔaariɛn kɛnɛ nɛɛkiɛn.
Kä cu nɛmɛ a min laar Kuoth Nhial ɛ kɛ kui̱ dhɔaar kua̱r Juda wëë i̱, “Cäŋɛ ni mɔ gɔaa i̱ kä ɣä mɔ ce̱tnikɛ Gil-yad, kä ce̱tdi kɛ pääm Lɛ-ba-nɔn, kɛ thuɔ̱k ɣän bä ji̱ jak kä ce̱tnikɛ därdɔaar kɛnɛ wi̱i̱ ti /ca ciɛŋ.
/Cuarɛ wiee kɛ kui̱ kua̱r in ci li̱w, kä /cuarɛ jɛ par, duundɛ ɣöö wieeɛ ɛlɔ̱ŋ kɛ kui̱ raam in ca naŋ, kɛ ɣöö dɔ̱ŋ /cɛ bi luny jɔk, kä /cɛ wecdiɛn bi nyɔk kɛ nën.
Kɛ kui̱c ɛmɔ cu Kuoth Nhial nɛmɛ lar kɛ kui̱ Cɛ̈-lum gat Yo-ci-yaa kuäär Juda mëë ruec kɛ gua̱a̱th gua̱n, mëë ci jiɛɛn ɛn guäth ɛmɛ wëë i̱, “/Cɛ bi luny ɛn wan ɛmɛ,
Kä bɛ wee i̱, ‘Ɣän bä rɔ lät kä duel mi di̱i̱t mi bi tekɛ duël nhial ti gɔw,’ kä bɛ jɛ lät kä wernyini, kä bɛ jɛ kal kɛ jiɛn ŋuer, kä bɛ jɛ rɔth kɛ biɛl mi dɛ̈ɛ̈r.
Ɛn nɔmɔ bɛ ji̱ jak kä kuäär ɛn ɣöö bi duelu moc jiɛn ŋuer ti ŋuan? Kä /ciɛ ɣöö te guur kɛ mi̱th ti ŋuan kɛnɛ ɣöö cɛ la̱t ni thuɔ̱ɔ̱k kɛnɛ cuŋ? Ɛ jɛn ci ŋɔak gɔw kɛ jɛ mɔ.
Kɛ kui̱c ɛmɔ cu Kuoth Nhial nɛmɛ lar kɛ kui̱ Yɛ-ɣo-ya-kim gat Yo-ci-yaa kuäär Juda i̱, “/Ca jɛ bi par i̱, ‘Aɣ dämaar!’ Kiɛ i̱, ‘Aɣ nyimaar!’ Kä /ci kɛ jɛ bi par i̱, ‘Aɣ kuäär!’ Kiɛ i̱, ‘Aɣ kuäärä!’
Kä ɛn wut ɛ cɔali Kɔn-yaa ɛmɛ, ca jɛ lo̱k a ce̱tdɛ nikɛ dhaar mi ci tiath, mi thil ram mi lɛ jɛ go̱r? Ɛ jɛn ca lo̱k ni jɛ mɔ kɛnɛ gaatkɛ, kä yuɔr kɛ nikɛ ro̱o̱l mi kui̱c kɛn ɛ?
Ci Kuoth Nhial wee i̱, “Gɔ̱ri nɛmɛ piny kɛ kui̱ wutdä mɛmɛ, ba ram mi thil gaat, ba ram mi /ci rɔ bi luäŋ teekädɛ, kɛ ɣöö thilɛ ram mi bi nyuur wi̱i̱ kɔam kuäärä Dee-bid kä gaatkɛ, mi bi ruëc kä Juda.”