Gia phenda o Del: Cheren kris ta o cha chipe, ta braduin e llene kai si dukhado, katar gua kai dukhavel le, ta na kojaven ta na choren gole kai si katar aver phuv, ni e minonen bi dadenge ta ni e phivlien, ta na mundaren gole kai inai dosalo pe gava than.
Soke te kandea chachimaia gava alav, e charura kai besen po than e Davideko, ka den katar e udara gale foroke ande pe bordona ta upral pe pe gra ta lenchar lenge sluge ta lengo foro.
Soke gia phenda o Del cheres o cher katar e charura e Judaeke: Tu san mange sargo o burdo Galaad, sargo o than mai vazdino katar Libano, a ka cherav te ache pusto, ta sargo e forura kai kote ni zivil niko.
Na rov pala gua kai mulo, ta te na avel chuke zalba letar, rov zurale pala gua kai llaltar, soke ni ka irilpe nikada ta ni ka dikhel pi phuv kote kai biandilo.
Soke gia phenda o Del cheres o Salum chavo katar o Josias, charo katar o Juda, kai charoisarda po than katar o Josias leko dad ta kai likisto katar: Ni ka irilpe ios kate.
¡Tesko goleke kai cherel po cher kojaimaia, ta cherel pe sobe bangimaia, ta thovel e llenen te radin leke llabe ta ni pochinel lenge so mol lengo rado!
Ta phenel: Ka vazdav mange iek cher baro, ta sobe kai del e balav andre, ta cherel lake penllerave ta avrial thovel leke kotora kastune katar o sedro ta makhel le ando lolo.
Goleke o Del phenda gia katar o Joakim chavo katar o Josias, char katar Juda: Te na phenel niko ando roipe pala le: ¡Ioi, phlalorrea! ¡Ioi phiorrie! Ta na phenen ande duk: ¡Ioi gazda! ¡Ioi glamno!
Sa che chobanonen ka arakhel len e balav, ta golen kai volin tut ka inllaren len phangle, ondaka ka avel chuke lallao ta ni ka llane so ka chere pala sa cho bilachipe
Ande mo anav, phenel o Del, kai o Konias chavo katar o Joasim charo katar o Juda te avela vou angrusti ande mi nai pe mo va o chacho, i kotar ikanava tut.
Ka dav tut ande va katar gola kai roden te mundaren tut, ta ande va katar gola kai dara te dikhen pe tute, ea, ande va katar o Nabukodonosor charo katar e Babilonia, ta ande va katar e kaldeura.
¿Si gava lleno o Konias iek piri chudini ta phagi? ¿Si iek ezgoda kai niko ni mangel la? ¿Soke avile chudine vou ta leko porodo, ta chudie len ande iek phuv kai ni pinllarena?
Gia phenda o Del: Pisisaren so ka avelpe gale llenea kai inai le porodo, gava lleno kai ni iek ezgoda lachi ni cher ande po zivoto, soke niko katar leko porodo ni ka resel te besel po trono katar o David, ta ni ka charoil po Juda.