Lee nwan ihiẹn Osolobuẹ hụn wụ Chuku Izrẹlụ ku banyeni ndị rị e du ndị nke m: “Makẹni ụnụ a chụzịzagụọ ndị nke m, chụpụ wẹ — hụn nkẹ ụnụ e gi lepụ wẹ ẹnya, m k'e ye ụnụ afụnfụn eje-ihiẹn ụnụ mẹ. Mmẹ wụ Osolobuẹ e kugụọ a!
Obi e d'a gbawapụ m makẹ ndị amụmanị rị a tụ ntụ; ọkpụkpụ ile rị m ẹhụ hụ e mẹhunmẹ. M nọ kẹ onyẹ manya rị a tụ, onyẹ manya rị e nuhunmẹ makẹ ụya wẹ rị e ye Osolobuẹ lẹ oku ẹ rị nsọ.
Alịnị ile e mẹ ndị ughẹrẹ ndị ughẹrẹ; abụmọnụ Osolobuẹ e mẹgụọ alị kpọpụ nkụn, ẹfịfịa rị ebe wẹ nọ a zụn anụ e shinwụn — makẹni wẹ rị e bi eje-obibi, e gi ikẹn wẹ e mẹ ihiẹn ile.
Ufiri ẹ, ụzọ wẹ k'a rị e kpo; wẹ sikọ d'a chụ wẹ ye imẹ ishi, a dantọ wẹ ebẹhụ. M k'e mẹ wẹ okẹn-ihiẹn o ru ogẹn m'e gi ye wẹ afụnfụn. Mmẹ wụ Osolobuẹ e kugụọ a!
A hụnzị m nwan ihiẹn a gba ẹnya-mirin ẹka ndị amụma Jerusalẹm: Wẹ rị a ghẹrẹ, e gi ntụ e bi. Wẹ hụ a kwadọn ndị eje-omumẹ, hụn o gi mẹni onwọnzini onyẹ a latọ eje-ihiẹn. Wẹ ile rị nwan kẹ alị Sodọm ẹnya m; ndị Jerusalẹm rị nwan kẹ alị Gomora ẹnya m.”
Lee ni nwan ihiẹn Osolobuẹ ihiẹn ile rị okpuru ẹ ku banyeni ndị-amụma Jerusalẹm: “M k'e mẹ elu lu wẹ ilu kẹ ihiẹn-oriri e lu ilu, ye wẹ nsọngbu ra kẹ mirin wẹ buche nshi, makẹni ndị amụmanị e mẹgụọ eje-obibi ghagbarị alịnị ile.”
Mmẹ lẹ ndị-amụma gi ihiẹn wẹ rọhụn hụn wụlẹni oku m e bu amụma rọ. Wẹ hụ e ziẹn nrọ ndị ahụn, e gi ihiẹn ile wụlẹni nke m wẹ rị e mẹ e dufie ndị nke m, ihiẹn ile wẹ rịlẹni a jụ m e mẹ; ezini m wẹ, etumẹni m wẹ. Onwọnni ẹka wẹ rị e yeni ndị nke m kaka.’