×

Maayong Balita 2012

JEREMIAS 24

1
Ginpakita sa akon sang Ginoo ang duha ka mga alat sang higos nga nabutang sa atubangan sang Templo. Natabo ini sa tapos madala ni Haring Nabucodonosor sang Babilonia ang anak ni Joaquim nga si Joaquin nga hari sang Juda, lakip ang mga pangulo sang Juda, ang mga panday kag ang mga panday sa salsalon subong mga binilanggo gikan sa Jerusalem pakadto sa Babilonia.
2
Ang nahauna nga alat may maayo nga mga higos, nga madali maluto. Ang isa ka alat may indi maayo nga mga higos, nga indi na makaon.
3
Dayon ang Ginoo nagsiling sa akon, “Jeremias, ano ang makita mo?” Nagsabat ako, “Mga higos. Ang maayo nga mga higos maayo gid, kag ang indi maayo nga mga higos kalain gid kag indi makaon.”
4
Gani ang Ginoo nagsiling sa akon,
5
“Ako, ang Ginoo, ang Dios sang Israel, nagakabig nga ang mga tawo nga ginbihag sa Babilonia kaangay sining maayo nga mga higos, kag pagakaluoyan ko sila.
6
Bantayan ko sila kag pabalikon sa sini nga duta. Patindugon ko sila liwat kag indi na pagpukanon. Itanom ko sila, kag indi na paggabuton.
7
Hatagan ko sila sing handom sa pagkilala nga ako amo ang Ginoo. Dayon sila mangin-akon mga tawo, kag ako mangin-ila Dios, tungod kay magabalik sila sa akon sa bug-os nila nga tagipusoon.
8
“Kon nahanungod kay Haring Sedequias sang Juda, ang mga opisyales sa palibot niya, kag ang nabilin nga mga tawo sang Jerusalem nga nagpabilin sa sini nga duta, kag nagkadto sa Ehipto—ako, ang Ginoo, magakabig sa ila tanan kaangay sini nga malain nga mga higos nga indi na makaon.
9
Padalhan ko sila sing tuman nga kalalat-an, sa bagay nga ang tanan nga mga kapungsoran sang kalibutan magakahadlok. Ang mga tawo magayaguta sa ila, magalangulango, magahikay, kag magagamit sang ila ngalan subong pagpakamalaut sa bisan diin nga ginapaalaplaag ko sila.
10
Padalhan ko sila sing inaway, gutom, kag balatian, tubtob nga wala sing isa nga mabilin sa ila sa duta nga akon ginhatag sa ila kag sa ila mga katigulangan.”
Ilonggo Bible 2012
Maayong Balita nga Biblia Philippine Bible Society, 2012
:
Save Notes