×

RUAC KUƆTH IN RƐL RƆ 1998

Yir 24

1
Kä kɛ kɔr kä mëë ci Nɛ-bu-kad-nɛ-dhar kuäär Bɛ̈-bi-lɔn Yɛ-kɔn-ya gat Yɛ-ɣo-ya-kim kuäär Juda kɛnɛ ruëëc Juda kɛ bel kɛnɛ ta̱a̱th naŋ kä Jɛ-ru-tha-lɛm ala pɛ̈ɛ̈c naŋɛ kɛ kä Bɛ̈-bi-lɔn, cu Kuoth Nhial ɣä nyuɔ̱th kɛ nyuuth diënyni da̱ŋ rɛw ti tekɛ dɛy ŋɔ̱a̱p ti ca la̱th thok luaak Kuɔth Nhial.
2
Te dieny kɛl kɛ dɛy ti gɔw ɛlɔ̱ŋ, ti ce̱tnikɛ dɛy ŋɔ̱a̱p ti nhiam, te dieny in rɛwdɛ kɛ dɛy ti jiäk ɛlɔ̱ŋ, ti jiäk ti /ca dee cam.
3
Kä cu Kuoth Nhial ɣä jiök i̱, “Ɛŋu mi nɛɛni Yir-mɛ-yaa?” Kä cua̱ jɛ loc i̱, “Nɛ̈ɛ̈nä dɛy ŋɔ̱a̱p, dɛy ŋɔ̱a̱p ti gɔw ɛlɔ̱ŋ, kɛnɛ ti jiäk ɛlɔ̱ŋ, ti jiäk ti /ca dee cam.”
4
Kä cu ruac Kuoth Nhial ben kä ɣä,
5
nɛ mi ɛ min laar Kuoth Nhial ni Kuoth I-thɛ-rɛl ɛ i̱, “Ce̱tnikɛ dɛy ŋɔ̱a̱p ti gɔw ti̱ti̱, ɣän bä nɛy tëë pɛ̈ckɛ kä Juda, tëë cä jak kä naŋkɛ raar ɛn wa̱nɛ tëë ca naŋ muun ji̱ Kɛ̈l-da-ya jak kä ti gɔw.
6
Ɣän bä kɛ tit ala ti gɔw, kä bä kɛ luɔ̱c ɛn muun ɛmɛ. Bä kɛ kap nhial, kä /cä kɛ bi da̱k piny. Ɣän bä kɛ pith, kä /cä kɛ bi yuɔ̱t raar.
7
Kä bä kɛ jak kä ŋa̱c kɛ jɛ kɛ lo̱ckiɛn ɛn ɣöö ɛ ɣän Kuoth Nhial. Kä bi kɛn a nɛɛkä, kä bi ɣän a Kuothdiɛn, kɛ ɣöö bi kɛ luny kä ɣä kɛ lɔcdiɛn kɛɛliw.”
8
Kä cu Kuoth Nhial wee i̱, “Ce̱tnikɛ dɛy ŋɔ̱a̱p tin jiäk tin /ca dee cam, ɛ jɛn ciaŋ in bä ciɛŋ ni Dhid-ki-yaa kuäär Juda kɛnɛ bööth nath kɛ nɛy tin ci duɔth kɛ tëk kä Jɛ-ru-tha-lɛm, kɛnɛ nɛy tin cieŋ muun I-jëp.
9
Ɣän bä kɛ moc riɛk mi bi ji̱ wec muɔ̱ɔ̱n diaal jak kä dual, kä bi kɛn a cäät gua̱thni diaal tin bä kɛ riaw kä thi̱n.
10
Kä bä kɛ jäk kä ko̱o̱ri kɛ buɔth kɛnɛ juey, amäni mi cikɛ tɛ̈ŋ rɛy muɔ̱ɔ̱n ëë cä ka̱m kɛ kɛnɛ gua̱ni.”
Nuer Bible 1998
Nuer Bible Bible Society in South Sudan 1998, 2012
:
Tɔ̱a̱w Notethni̱