×

Ekitabo Erikwera 2008

Yeremia 24

1
Nebukadenezaari omugabe wa Babulooni ku yaaherize kwiha Yerusalemu Yekoniya mwene Yehoyakimu omugabe wa Buyuda, hamwe n'abategyeki baayo n'abanyamyoga n'abaheesi akabazaahiza Babulooni, Nyakubaho yaanyoreka eki: Naareeba ebiibo bibiri by'emitiini bitairwe omu maisho ga Nyaruju ya Nyakubaho.
2
Ekiibo ekimwe kikaba kirimu ebijuma by'emitiini birungi munonga nk'ebibanza kwera; kandi ekindi kirimu ebijuma by'emitiini bibi munonga, ebitarikubaasa kuriibwa.
3
Atyo Nyakubaho yambuuza ati: Yeremiya, nooreeba ki? Naanye ngira nti: Nindeeba ebijuma by'emitiini ebirungi biri birungi munonga, n'ebibi biri bibi munonga, ebitarikubaasa kuriibwa.
4
Bwanyima Nyakubaho angambira ati: Nyowe Mukama Ruhanga wa Isiraeli ningira nti: Nk'oku ebi bijuma by'emitiini biri birungi, n'abaazaahiibwe barugire Buyuda, abu naabingire omuri eki kyanga, nkabatwara omu nsi y'Abakaludaaya, nikwo ndiguma nimbeeta barungi.
5
Ndyaguma mbataireho eriisho nimbakorera ebirungi, na bwanyima mbagarure omuri egi nsi.
6
Ndyabombeka, tindibasheenya; ndyababyara, tindibakuura.
7
Ndyabaha omutima gw'okummanya ku ndi Nyakubaho, babe abantu bangye, naanye mbe Ruhanga waabo; ahabw'okuba baryangarukira n'omutima gwabo gwona.
8
Kwonka Nyowe Nyakubaho ningira nti: Nk'oku ebi bijuma by'emitiini ebibi biri bibi munonga, ebitarikubaasa kuriibwa, nikwo nditwaza Zedekiya omugabe wa Buyuda, n'abategyeki be, n'aba Yerusalemu abaahonokireho bakatsigara omuri egi nsi, n'abatwire omu nsi ya Misiri.
9
Ndyabahindura ekirikunugwa ab'omu nsi z'obugabe zoona, babe abarikujumwa, abarikucwerwaho enfumu, abarikugaaniizibwa kandi abarikukyeenwa omu byanga byona ebi naababingiiremu;
10
reero mbooherereze rurara, enjara n'orufu, okuhitaya obu baricwekyererera kimwe, bakahwa omu nsi ei naabahaire na baishebo.
Nyankole Bible 2008
The Bible with Apocrypha in Runyankore-Rukiga, new revised joint translation The Bible Society of Uganda, 2008
:
Save Notes