He he Zôsia sawchapawpa Zudâh bei Zehôki â beina kô palihna liata, Zudâh phopi zydua kyh liata Zeremiah hnohta bie a vaw tlôpa a châ. Cha daihti cha Babylaw bei Nebukaneza abeina kô khana nata â su.
“Amawna sawchapawpa Zudâh bei Zôsia abeina kô hrawh hleithôhna tawhta tanoh taihta, Kô kih nata kô thôh chhôh tlai, Abeipa bie ei hnohta vaw tlô tyh ta. Cha biezy cha nama hnohta ei phuah chanei ngâ thlâh ha tyh. Châhrasala nathlie veih ei chi.
Abeipa ta a chakaotuhpa hrohsopa zydua nâmo lâ a vaw tuah chanei ngâ thlâh hapa chhao ei ta, nathlie leipa ei chi ta, ama bie thei awpa ta nama nah pachôh hra veih ei chi.
Hrohsopazy ta, ‘Chyhsa to nama moleina lâpi tawhta nata nama hmotaopa pha leipazy tawhta vaw kua u la, Abeipa ta nâmo nata châ pathlatuhpazy hnohta hlâno tawhta chhâzaw châta a cha piepa râh liana he pahrâ teh u.
Khazoh hropazy pazi leipa u la, âmo cha chakao leipa ta, a chhy hra leipa u la, nama ku ta a taopazy ta ei hie na pahâh hra khuh vy. Cha hawhta nama tao khiahta cha, cha pasasa aw veih ei na,’ tahpa ta Abeipa bie cha chho ei ta.
pachâ teh u, maw lâta chipho zydua bieta aw ei na ta, na chakaotuhpa Babylaw bei Nebukaneza chhao bieta aw na ta, âmo cha he râh nata a chhôh liata a pahrâpazy nata he chheipâh liata phopi zydua a dyuh awpa ta ei vaw chhi aw ei. Tlokhuh pahleipadia khai aw ei na ta, rarôh ypa nata hmaotô chiepa nata roryhrapa ta chhâzaw ta y awpa ta ei tao aw ei,” Abeipa ta a tah.
A chô liata bie ei reipa zydua kha, cha râh chô liata patlôsa aw na ta, Zeremiah ta phopi zydua chô liata hrohsona bie a phuahpa, he châbu liata ropa zydua ei patlôsa aw.
Phopi hluhpi nata bei rônahpazy ta Babylaw mo chhao tlai cha sei ta tao aw ei ta, ama hmotaopa lymâ hawhta nata ama ku rai hriapa lymâ hawhta ei thô aw ei,” Abeipa ta a tah.
Tanoh duahmo hawhna heta, roryhrapa nata rypa ta paysapa awpa nata hmaotô chiepa nata chhiesapa ta paysa awpa ta, Zerusale nata Zudâh khihpizy nata a beizy nata beimachâzy;
nata ama hry liata chipho a pahlaopa pathla zydua; Uzi râh bei zydua nata Philistinâ râh bei, Askelaw, Kâza, Ekaraw nata Asadô liata laibâhpa bei zydua;
maw lâta bei zydua, lâhla nata lâhnia a pazi lymâpa ta, hiehâhna nyu cha padosapa châ ei ta, alei chô liata a ypa khizaw khinarâh zydua chhao padosapa ama châ. Âmo khai tawhta Babylaw bei ta a doh awpa a châ.
“Chatawcha ama hnohta hetana heta na tah aw: ‘Pheisaihzy Abeipa, Izarei Khazohpa ta hetana heta a tah: Nama hry liata zaozi ei vaw tuah awpa vâta, doh u la, pari u la, pali u la, pao u la, thyu khao khah u.’”
“Na ku tawhta nyu cha la khoh leipa ei sala, ama doh khoh vei khiahta cha, ama hnohta hetana heta na tah aw, ‘Pheisaihzy Abeipa ta hetana heta a tah: Nama doh thlyu awpa a châ!
Moh teh u, ei moh a phaohpa khihpi chô liata chhiena patlôsa pathao ha na ta, hrie leipa ta nama y aw ma? Alei liata a pahrâpa zydua a dyuh awpa ta zaozi aw ha na ta, chavâta hrie leipa ta y aw veih ei chi,’” Pheisaihzy Abeipa ta a tah.
“Chavâta ama chô liata he hrohsona biezy he phuah thlu aw chi ta, ama hnohta hetana heta na tah aw: “‘ Abeipa cha su sâhpa tawhta a rôh aw ta, A pahrâna pathaihpa tawhta a ao a papua aw; A mietaku sadô thata a rôh thlu aw ta, Kre saohtuhpazy hawhta, Alei liata a pahrâpa zydua a awh thlu aw ei.
Abeipa cha phopizy lyuhtua awpa a hneipa vâta, Â rôhpa pyu cha alei chhâna taihta a khaihpalie aw; Sapa zydua pachiana liata a ngiakhei aw ta, Hmoparaopazy cha zaozi lâ a hlâ aw ei,’ Abeipa ta a tah.
“Cha noh liata Abeipa ta a thiepa chyhsazy cha, alei chhâna hiakha lâ tawhta alei chhâna hiakha lâ taihta amâ zawh aw. Mâchhiesapa leipa aw ei ta, ama ri lapa châ leipa aw ta, pabupa châ hra aw veih ei. Alei chô liata ie hawhta ama châ aw.
“Nâmo, mietaku vaituhpazy saih u, Sâh u la, cha teh u; Nâmo, mietaku zaw zibeipazy saih u, Buchâh liata a hluah teh u; Thiepa ta nama y nawpa nohzy vaw tlô ha ta, Nama paipatla nawpa nohzy a vaw tlô haw; Hmobaoh sôhpa hawhta nama pao aw.
Abeipa ta mietakuzy tlaihna sibiepa su cha, Roryhrapa ta a tao hapa vâta, Mietaku vaituhpazy chana ao vaw pua ta, Mietaku zaw zibeipazy awhsâhpa pyu a vaw pua!
Tlybaituhpa zaozi vâta, Abeipa hiehâhna ru ngaitapa vâta, Ama râh cha roryhrapa ta a y haw; Chakeibarôhneipa ta a lôpu a puasaipa hawhta, Abeipa ta a pahrâna a puasai haw.”