×

Ika Bible 2018

Jerimaya 25

1
Ọnwan wụ oku Osolobuẹ gwa Jerimaya onyẹ-amụma banyeni ndị Juda ile ahụa mẹ ẹ ẹnọ Jehoyakim nwa Josaya kịma alị Juda. (Ahụa ohu hụ kẹ Nebukadineza kịma alị Babilọnụ.)
2
Okuni kẹ Jerimaya onyẹ-amụma gwa ndị Juda ile lẹ ndị ile bi obodo Jerusalẹm, sị wẹ,
3
“Kete ahụa ẹtọ kwasị ọgụn, ya wụ kete ahụa nke mmẹtọ Josaya nwa Amọnụ kịma, Osolobuẹ hụ e zi m ozi, m hụ e zi ụnụ ya e zikwasị, kanị ụnụ egini dọn.
4
“Ọsụọzịkwọn'a nị Osolobuẹ e zihẹsọnmẹgụọ ndị-amụma a d'a gwa ụnụ oku, ụnụ egọnni ntịn, ụnụ achọnị nị ụnụ nụ.
5
Wẹ hụ a sị ụnụ: Bihutọ nị nwan ẹka; onyẹ ọwụlẹ imẹ ụnụ ya latọ eje-ihiẹn ile ọ rị e mẹ lẹ eje-obibi ẹ, kẹni m nị ụnụ bisọnmẹ alị mmẹ wụ Osolobuẹ ye ụnụ lẹ ndị nẹdi ụnụ.
6
Esọnlẹ ni mmọn; arụalẹ ni wẹ; efelẹ ni wẹ; egilẹ ni ihiẹn ẹka ụnụ mẹmẹ a kpasu m iwe, makẹ m gha e mẹ ụnụ ihiẹn.”
7
Osolobuẹ sị, “Kanị, ụnụ egọnni m ntịn. Ụnụ e gigụọ ihiẹn ẹka ụnụ rụn kpasu m iwe. Ụnụ a dọhagụọnị enwẹn ụnụ eje-ihiẹn.”
8
Mmẹ wụ Osolobuẹ ihiẹn ile rị okpuru ẹ rị nwan a sị, “Makẹni ụnụ egọnni ntịn oku m,
9
m jẹnkọ d'a kpọhanị ụnụ ndị alị ile rị ẹbamịn-ugu — uwẹ lẹ odibo m wụ Nebukadineza eze Babilọnụ. M k'e wẹhẹ wẹ d'e mẹ alịnị lẹ ndị rịn'a lẹ alị ndị ọzọ ile fihunmẹ alịnị ihiẹn. M k'e tikpọchanrịn wẹ, mẹ wẹ gba okpokoro, mẹ wẹ wụrụ ihiẹn w'a manị ọsụa (ọsụọ) lẹ ebe mẹ mkpọkọ-mkpọkọ jẹnrin ejẹn.
10
M k'e wepụ ịghọghọ lẹ anwịnrịn imẹ alị ndịnị — hụn wụnị anụkọzị wẹ olu ikẹnnyẹ lẹ ikpoho rị a gba-ẹkụkwọ ẹfọ rị a sụọ ụsụọ, anụkọzị wẹ ukwere ọlọ lẹ odo; ahụnkọzị wẹ ukpẹ rị e nwun iwe ịhịan kaka.
11
Ebeni ile jẹnkọ d'a gba okpokoro, la iwi; alị ndịnị ile k'e fe eze alị Babilọnụ ọrọgbọ ahụa iri kwasị ọgụn-ẹtọ.
12
“Kanị, ahụa iri kwasị ọgụn-ẹtọ ahụn zugụ, m k'e ye eze Babilọnụ lẹ ndị alị a, ndị Kal'di, afụnfụn njọ wẹ. Mmẹ wụ Osolobuẹ e kugụọ a. M k'e mẹ ẹ gba okpokoro jẹnrin ejẹn.
13
M k'e mẹchanrịn alị hụ wụ Babilọnụ ihiẹn ile m sị nị m jẹnkọ d'e mẹ ẹ, ihiẹn ile wẹ detu imẹ ẹkụkwọnị; m k'e mẹchanrịn ihiẹn ile Jerimaya bu amụma ku nị ya kẹ m jẹnkọ d'e mẹ ndị alị ile.
14
“Wẹ lẹ enwẹn wẹ wụ ndị Babilọnụ k'a wụzịkwọ igbọn alị bu ọda lẹ ndị-nze uku; m k'e mẹgwarị wẹ ihiẹn ile wẹ mẹ lẹ ihiẹn ile wẹ rụn.”
15
Lee ihiẹn Osolobuẹ wụ Chuku Izrẹlụ gwa m: “Narịn m mkpuni rị m ẹka — mkpu afụnfụn jun, n'ị hụn ụzọ mẹ ndị alị ile m zikọ ị rarị a.
16
Wẹ ra a, a hanfiemẹ ụkụ kẹ ndị manya rị a tụ, mẹmẹ kẹ ndị ẹra, makẹ agha hụn m k'e gi ẹ zihẹni wẹ.”
17
Ya m nọ weri mkpu hụ rị Osolobuẹ ẹka, mẹ ndị alị ile Osolobuẹ zijẹn m rarị ihiẹn rị imẹ ẹ:
18
kẹ Jerusalẹm kẹ obodo ile rị alị Juda kẹ ndị-nze Juda lẹ ịhaịmẹ wẹ, kẹni wẹ wụrụ alị wẹ gba okpokoro, alị hụn a tụ ịhịan egun, alị w'a mụ ẹmụ lẹ alị wẹ gi a bụ ọnụ. Ọ rị nwan ẹrịra tannị.
19
E mẹzighọ m Fẹro eze alị Ijiptu lẹ ndị e jẹnn'ẹ ozi lẹ ịhaịmẹ ẹ lẹ ndị nke ẹ ile rarị afụnfụn Osolobuẹ hụ rị mkpu hụ,
20
uwẹ lẹ ndị alị ọzọ ile rị alị wẹ; e yezighọ m ndị-nze alị Uzu lẹ ndị-nze alị ile rị ichẹn-ichẹn rị okpuru ndị Filistia — kẹ hụn kị Ash'kẹlọnụ kẹ hụn kị Gaza kẹ hụn kị Ẹkrọnụ lẹ ndị ile họdụ imẹ Ash'dọdụ;
21
e yezi m ndị Ẹdọm mkpu afụnfụn Osolobuẹ hụ rarị, yezi ndị Mụabụ lẹ ndị Amọnụ
22
lẹ ndị-nze alị Taya lẹ ndị-nze alị Sidọnụ lẹ ndị-nze alị ndị rịsọnmẹ nfetu Ohimin Mẹditerenia;
23
e yezighọ m ndị alị Dedanị lẹ Tẹma lẹ Buzu lẹ ndị ile rị ebe teni hụn a kọ ntutu wẹ azụụnnị lẹ azụụnnị
24
lẹ ndị-nze Arebịa ile lẹ ndị-nze ndị ọzọ ile rị imẹ atụ;
25
eyezighọ m ndị-nze ile kị alị Zimri lẹ alị Ẹlam lẹ alị Mẹdịa
26
lẹ ndị-nze ile kị alị rịsọnmẹ ẹbamịn-ugu, kẹ ndị rị ẹhụ nsue kẹ ndị rị ebe teni, k'o ru k'o ru; alị-eze ile rị elu-ụwa kẹ m mẹ rarị afụnfụn rị mkpu Osolobuẹ hụ. Wẹ ile rarịgụ, eze alị Shẹshakị wụ Babilọnụ lẹ enwẹn ẹ jẹnkọ d'a rarịzịkwọ a.
27
Osolobuẹ sị m, “Sị wẹ nị Osolobuẹ ihiẹn ile rị okpuru ẹ hụn wụ Chuku Izrẹlụ sị, ‘Ra nị tụ, gbọma ẹgbọ, dangungwọn, yeni ọpịa-agha m zila imẹ igunrun ụnụ.’
28
Osolobuẹ sị, ‘Wẹ sị anarịnkọ wẹ i mkpu ahụn rarị, sị wẹ: Osolobuẹ ihiẹn ile rị okpuru ẹ sị: Ụnụ k'a rarịrị a!
29
Lee ẹ nị e tikpọmagụọdẹ m obodo Jerusalẹm hụn rị a za ẹfan m, nanị ụnụ e dọn nwan la ọfẹ? Ụnụ alakọkwọ ọfẹ, makẹni m zilanị ndị ile bi elu-ụwa ọpịa-agha. Mmẹ wụ Osolobuẹ ihiẹn ile rị okpuru ẹ e kugụọ a.’
30
“Gi nwan okuni ile buni wẹ amụma — sị wẹ: Osolobuẹ jẹnkọ d'a gha imẹ-elu dẹn rịkẹ ẹwọrọ; olu ẹ jẹnkọ d'a gha ebẹhụ rị nsọ o bi han rịkẹ akpara; o k'e yini alị a eje-oro. O k'e yi oro nọkẹ ndị rị a zọ vaịnị; o k'e yini ndị bi elu ụwa oro.
31
Wẹ k'a nụdẹ ụzụn a ụwa ile, makẹni Osolobuẹ sikọ d'a ma alị ile ikpe. O sikọ d'e ye ndị ile rị ụwa afụnfụn, gi ọpịa-agha gbupụ ndị eje-omumẹ.” Osolobuẹ e kugụọ a.
32
Osolobuẹ ihiẹn ile rị okpuru ẹ sị, “Lee n'ẹ, wẹ hụ e tikpọ otikpọ-otikpọ a gha alị, a pu alị; nsọngbu a kpọmagụọ nọkẹ okẹn ẹbi — ọ ghakwọrị ebe ụwa ru lala.”
33
O ru ogẹn hụ, ndị Osolobuẹ gi ọpịa-agha gbu jẹnkọ d'e jun ụwa ile — gha isini d'e ru isini. Akwankọ wẹ wẹ, ekpọngbamakọ wẹ wẹ, elikọ wẹ wẹ — wẹ k'e jun alị kẹ nsịn anụ.
34
Kwanma nị, gomẹ ni, ụnụ ndị-ndu! Dan nị, kperemẹ imẹ uzunzun, ụnụ ndị kị alị ichẹn-ichẹn — makẹni ogẹn w'e gi gbu ụnụ e ruọlẹ; ụnụ k'a dan, gungwọnpụ kẹ ite ụrụa!
35
Ndị-ndu alị ichẹn-ichẹn ahụnkọ ebe w'a gbashi, ndị a kị ndị alị ichẹn-ichẹn ahụnkọ ebe w'a nọ wanahịn.
36
Gọn ntịn ẹkwan ndị-ndu rị a kwan! gọn ntịn kẹ ndị a kị alị ichẹn-ichẹn rị e goo! Wẹ rị e goo ni Osolobuẹ rị e tikpọ alị wẹ.
37
Osolobuẹ k'e tikpọdẹ alị ile te mẹ jụụ — makẹ olulu Osolobuẹ hụn rị a dụn kẹ ọkụn.
38
Ọ ghagụọ ebe o bi pụ nọkẹ ẹwọrọ; alị wẹ k'a gba okpokoro, yeni olulu onyẹ rị e mẹshi wẹ ikẹn, olulu ẹ hụn rị a dụn kẹ ọkụn.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes