«Maam a Sẽn-Ka-Saab yetame: ‹Kẽng n tɩ yals Sẽn-Ka-Saab roogã zak pʋga, n gom ne neb nins fãa sẽn yit Zʋʋda soolem tẽmsẽ wã fãa, n wat n wõgemded maam a Sẽn-Ka-Saab roogẽ wã, n togs bãmb goam nins fãa mam sẽn yet foomã, n da bas ba a yembr ye.›
Daarninga, b na n kelgame tɩ b ned kam fãa bas a manesem-wẽngã. Sã n yɩ a woto, mam na n basa wẽng ning m sẽn dag n saagd n dat n maan-b b tʋʋm-wẽnsã yĩngã.
La a Zeremi sẽn gom goam nins fãa Sẽn-Ka-Saab sẽn yeel yẽnda t'a togs nebã fãa wã n sɛ, maan-kʋʋdbã ne no-rɛɛsdbã la nebã fãa yõka yẽnda n yeel-a yaa: «Fo na n kiime!
Bõe yĩng tɩ fo togsd pĩnd-n-bãngr goam ne Sẽn-Ka-Saab yʋʋre, n yetẽ tɩ ro-kãngã na n yɩɩ wa Sɩlo, tɩ la tẽn-kãngã na n lebga raboog tɩ ned ka leb n zĩnd a pʋgẽ?» Dẽ, nebã fãa gũbga a Zeremi Sẽn-Ka-Saab roogã pʋgẽ.
Dẽ, maan-kʋʋdbã ne no-rɛɛsdbã goma ne nanambsã la nebã fãa n yeel-b yaa: «Rao-kãngã toga ne kũum, bala, a togsa pĩnd-n-bãngr gom-toos sẽn kẽed ne tẽn-kãngã wɛɛngẽ, wa yãmb sẽn wʋmã.»
La a Zeremi yeela nanambsã fãa ne nebã fãa yaa: «Yaa Sẽn-Ka-Saab meng n tʋm maam tɩ m wa togs pĩnd-n-bãngr goam nins fãa yãmb sẽn wʋme, sẽn kẽed ne ro-kãngã la tẽn-kãngã wɛɛngẽ wã.
Moasã, bɩ y tek y yel-manesmã ne y tʋʋmã. Kelg-y Sẽn-Ka-Saab sẽn yaa yãmb Wẽnnaamã koɛɛgã, tɩ b bas toog ning b sẽn dag n saagd n na n kɩt tɩ wa yãmb zugã vaale.
La bãng-y tɩ y sã n kʋ maam, mam zɩɩmã raagr taal na n zĩnda y zugu, la tẽn-kãngã ne a nebã me zugu. Bala, yaa Sẽn-Ka-Saab n sɩd tʋm maam tɩ m wa togs yãmb gom-kãensã fãa.»
Dẽ, nanambsã ne nebã fãa yeela maan-kʋʋdbã ne no-rɛɛsdbã yaa: «Rao-kãngã ka tog ne kũum ye. Bala, yaa ne Sẽn-Ka-Saab sẽn yaa tõnd Wẽnnaamã yʋʋre, la a gom ne tõndo.»
«Wakat ning a Ezekɩyaas sẽn dag n yaa Zʋʋda rĩmã, Moresɛt dao a Miise rag n togsa Zʋʋda nebã fãa pĩnd-n-bãngr goam n yeele: ‹Ad Saasẽ-Pãng-Soabã sẽn yeta: Sɩyõ na n lebga wa pʋʋg b sẽn gudgi. Zeruzalɛm na n lebga raboogo, la tãng ning Sẽn-Ka-Saab roogã sẽn be-a zugã na n lebga kãgre.›
Dẽ yĩnga, Zʋʋda rĩm a Ezekɩyaas ne Zʋʋda nebã fãa kʋʋ no-rɛɛs a Miise la? Ayo, rĩm a Ezekɩyaas zoee Sẽn-Ka-Saabo, n kos Sẽn-Ka-Saab tɩ b sik b sũuri. Dẽ, Sẽn-Ka-Saab basa toog ning b sẽn dag n saagd n na n kɩt tɩ wa bãmb zugã tɩ vaale. Tõnd na n maana yel-kãseng a woto n dogl yell d mens zut sɩda?»
Rao a yembr me n dag n togsd pĩnd-n-bãngr goam ne Sẽn-Ka-Saab yʋʋre. Yẽnda yʋʋr ya a Uuri, n yaa Kiryat-Yeyarim dao a Semaya biiga. A Uuri togsa pĩnd-n-bãngr gom-toos sẽn kẽed ne tẽn-kãng wɛɛngẽ, wa a Zeremi sẽn dag n togs goam ninsã.
Rĩm a Yoyakim ne a gãndaadã la a nanambsã fãa wʋma gom-kãense, la rĩmã baoome n na n kʋ a Uuri. La a Uuri sẽn wʋm dẽnda, rabeem yõka yẽnda t'a zoe n kẽng Ezɩpte.