«Yaa maam, Naaba-Wẽnde, n kõt-f noore: kẽng n tɩ yals wẽnd dooga sɩmandẽ la wilg neb niyns fãa sẽn yit-b Zɩɩda tẽnsẽ n wat n na n waoog Soaalã, togs-b bũmb ning fãa, m sẽn yet tɩ f togs-ba n da kees bũmb a ye meng ye.
Ad-y y sã n pa kelg-ba, m na n wãa wẽnd do-kãnga wala m sẽn wã Silo rẽnna la m na n kɩtame tɩ Zerizalɛɛm yɩ tẽng ning f sẽn wat n dat tɩ f bɛ tẽng fãa wẽneg a soab ne sãoongo.› »
Yaa bõe yĩnga tɩ fo yet tɩ Soaala n kõ-f noore tɩ f togs tɩ wẽnd do-kãnga na n wãa wala Silo, tɩ tẽn-kãnga me na n wã, la ned kõn leb n zĩnd a pʋgẽ?» Sẽn da be-b wẽnd doogẽ wã wa n gũbga a Zeremi, n zabd-a.
La a Zeremi leoka kug-zĩidba la neba fãa. A yeelame: «Yaa Soaala meng n tʋm maam tɩ m wa pĩnd n togs yell ninga sẽn na n pak do-kãnga la tẽn-kãnga; yaa bãmb meng noore.
La bɩ y pĩnd n bãng neere tɩ yãmb sã n kʋ maan, yaa ned sẽn ka tar a toorẽ yelle la y kʋ yã la y na rɩ m zɩɩma taale, yãmb ne y tẽnga, tɩ bala, yaa Soaala meng n tʋm maam tɩ m wa togs-y koees niyns fãa mam sẽn togs yãmba, tɩ yãmb meng tʋbr wʋma.»
B sẽn wʋm woto, nanamsa la neba fãa gilli yeela maan-kʋʋdba la bãngdba: «Nin-kãnga ka tog ne kũum ye, t'a sẽn gom ne tõndã, yaa Soaala, tõnd Wẽnnaama yʋʋr yĩnga la a gom yã!»
«Zɩɩda dĩma a Ezekiyas wakato, bãngd a ye n zĩnd Moresɛt n boond t'a Mise. A Mise waa n yeela Zɩɩda nebã: ‹Dũni fãa Wẽnda tɩ m wilg-y woto: Siõ na n lebga pʋʋgo tɩ b kooda, Zerizalɛɛm na n lebga raboogo, la wẽnd dooga tãnga na n wuka ne tuudu.›
D sok n gese, yãmb yãeeme tɩ Zɩɩda dĩm a Ezekiyas, la Zɩɩda neba kʋ-la a Mise bi? Ayoo! B sulga b meng Soaala taoore la b kos-b lame tɩ b maan sugri. La sɩda Soaala ka bas tɩ b sẽn gom yel-beed ninga lʋɩ b zug ye. Tõnd sã n kʋ a Zeremi rũnna, d kõn dogl yell kãseng d zugu?»
A Zeremi wakatẽ me bãngd a ye n zĩndi n da taasd Soaala koeese. Yaa a Uriya, a Semaya biiga, Kiriyat-Yeyarim tẽng neda. Yẽ soab me da goma wa a Zeremi, n pĩnd n togs yell ninga sẽn na n pak Zerizalɛɛm la Zɩɩda tẽnga.
Dĩm a Zoakim ne a zaka gũudba la a kug-zĩidba sẽn wʋm a Uriya goama, b yikame tɩ b na n kʋ-a. A Uriya sẽn wʋm woto, dabeem yõk-a lame, t'a zoe n kẽng Ezipt tẽnga.