1
Kɛ tuk ruëc Yɛ-ɣo-ya-kim gat Yo-ci-yaa kuäär Juda, cu ruac ɛmɛ ben kä Kuoth Nhial.
2
Nɛmɛ ɛ jɛn min ci Kuoth Nhial ɛ la̱r ɣä wëë i̱, “Cuŋni rɛy kal luaak Kuɔth Nhial, kä ruacni kɛ ji̱ wi̱i̱ni Juda diaal tin la bä pal rɛy luaak Kuɔth Nhial, lät nikɛ rieet diaal tëë cä lar ɛn ɣöö bikɛ la̱t kɛ, /cu riet kɛl päl raar thi̱n.
3
Kä dɔ̱ŋ bikɛ liɛŋ, a bi ramɔ rɔ ri̱t dupdɛ min jiääk, kä dëë mi jiääk in göörä ɣöö dëë lät kä kɛ, kɛ kui̱ lätnikiɛn tin jiäk cu päl.
4
Kä bi kɛ jiök i̱, ‘Lat Kuoth Nhial ɛ ɛn ɣöö mi /ci yɛn ɣä bi liŋ, kä /ci yɛn bi guɔ̱ɔ̱r ni ŋuɔ̱tkä tin cä la̱th nhiamdun,
5
kä /ci yɛn ruaacni ja̱a̱ŋnikä ni go̱o̱k tin la ja̱kä kä yɛ gua̱thni diaal bi liŋ,
6
ɣän bä luak ɛmɛ jak kä ce̱tnikɛ dhɔr jɔɔkni, kä bä wec ɛmɛ jak kä kuëth rɛy dööri wec muɔ̱ɔ̱n diaal.’ ”
7
Kä cu bööth palä kɛnɛ go̱o̱k kɛ nɛy diaal Yir-mɛ-yaa liŋ ɛ latdɛ kɛn rieet ti̱ti̱ diaal rɛy luaak Kuɔth Nhial.
8
Kä mëë ci Yir-mɛ-yaa thuɔ̱k kɛ lat rieetni diaal tin ci Kuoth Nhial kɛ la̱r jɛ kɛ ɣöö bɛ kɛ la̱t nɛy diaal, cu bööth palä kɛnɛ go̱o̱k kɛ nɛy diaal jɛ käp wä kɛ i̱, “Ji̱n bi li̱w!
9
Ɛŋu mɔ curi ruac go̱o̱kä lat ɔ kɛ ciöt Kuɔth Nhial wi̱i̱ i̱, ‘Bi luak ɛmɛ ce̱tnikɛ wec jɔɔkni, kä bi wec ɛmɛ te lutdä a bɛ thil nɛy ti bi cieŋ thi̱n’?” Kä cu nɛy diaal rɔ dol kɛ kui̱ Yir-mɛ-yaa rɛy luaak Kuɔth Nhial.
10
Kä min ci ruëëc Juda ti̱ti̱ liŋ, cukɛ jiɛɛn dhɔr kua̱r bä kɛ luaak Kuɔth Nhial, cukɛ ben nyuur thok luaak Kuɔth Nhial in pay la̱t.
11
Kä cu bööth palä kɛnɛ go̱o̱k ruac kɛ ruëëc kɛnɛ nɛy diaal wä kɛ i̱, “Wut ɛmɛ ro̱ŋɛ nikɛ lia̱a̱, kɛ ɣöö cɛ ruac go̱o̱kä lat kɛ kui̱ wec ɛmɛ ce̱tnikɛ min ci yɛn ɛ liŋ nikɛ ji̱thkun.”
12
Kä cu Yir-mɛ-yaa ruac kɛ ruëëc kɛnɛ nɛy diaal, wëë i̱, “Ci Kuoth Nhial ɣä ja̱k kɛ ɣöö bä ruac ce̱tnikɛ rieet diaal tin cia liŋ.
13
Kɛ kui̱ ɛmɔ täämɛ rialɛ ciɛŋkun kɛnɛ lätkun ikä, kä luɔ̱thɛ ruac Kuɔth Nhial min la Kuothdun, kä bɛ riɛk in cɛ lar i̱ bɛ lät kä yɛ päl.
14
Kä kɛ kui̱dä, ɣän ɛn ta̱a̱ tetnikun. La̱tdɛ ɣä kä mɔ guic yɛnɛ mɔ gɔaa kɛ yɛ ɔ.
15
Duundɛ ɣöö mi wä yɛn ɣä näk, ŋa̱cɛ jɛ ɛn ɣöö cia rɔ̱ kɛ wec ɛmɛ kɛnɛ ji̱kɛ nöŋ riɛm raam mi kui̱c ŋu, kɛ thuɔ̱k ci Kuoth Nhial ɣä ja̱k kɛ ɣöö bä rieet ti diaal ti̱ti̱ ben lat ji̱thnikun.”
16
Kä cu ruëëc kɛnɛ nɛy diaal, bööth palä kɛnɛ go̱o̱k jiök i̱, “Ɛn wut ɛmɛ /cɛ ro̱ŋ kɛ lia̱a̱, kɛ ɣöö ruacɛ kɛ kɔn kɛ ciöt Kuɔth Nhial min la Kuothdan.”
17
Kä cuɛ tekɛ bööth nath ti cua rɔ̱ jiɛc kä cukɛ ruac kɛ nɛy diaal tin ca rɔ̱ dol, wä kɛ i̱,
18
“Tëë kɛ wut mi cɔal i̱ Mikaa raan Mo-rɛ-cɛth mi cu ruac go̱o̱kä lat kɛ ni̱n Ɣidh-ki-yaa kuäär Juda, cuɛ ji̱ Juda diaal jiök ɛn ɣöö ci Kuoth Nhial in la Ruey Ɣɔaa wee i̱, ‘Ba Dha-yɔn pur ce̱tnikɛ kak, kä bi Jɛ-ru-tha-lɛm a di̱r jiäkni, kä bi päm in te luak thi̱n a rup.’
19
“Kä cu Ɣidh-ki-yaa kuäär Juda kɛnɛ nɛy diaal jɛ näk? Kä /ken Ɣidh-ki-yaa dual kɛ Kuoth Nhial a bɛ wä go̱r ni gɔy kä Kuoth Nhial? Kä /ken Kuoth Nhial mëë jiääk ëë ɛ jɛn i̱ derɛ lät kä kɛ päl? Kä ɛn täämɛ no̱ŋ kɔn ni rɔ̱ riɛk.”
20
Kä cuɛ lɛ tekɛ ram mi dɔ̱ŋ mi cɔali U-ri-yaa gat Cɛ-mɛ̈-yaa raan Kir-yath-ya-rim cuɛ ruac go̱o̱kä lat kɛ ciöt Kuɔth Nhial. Cuɛ ruac go̱o̱kä lat kɛ kui̱ wec ɛmɛ niɛ mun ɛmɛ kɛ rieet ti ce̱tnikɛ rieet Yir-mɛ-yaa.
21
Kä mëë ci kuäär ni Yɛ-ɣo-ya-kim kɛnɛ ji̱ köörɛ diaal kɛ ruëëc diaal rieet kɛ liŋ, cu kuäär ca̱r kɛ ɣöö bɛ jɛ näk. Duundɛ ɣöö mëë ci U-ri-yaa jɛ liŋ, cuɛ dual kä cuɛ rɔ bar kä I-jëp.
22
Kä cu kuäär ni Yɛ-ɣo-ya-kim naath jäk kä I-jëp, Ɛl-na-than gat Ak-bor kɛ nɛy ti kɔ̱kiɛn kɛɛl kɛ jɛ,
23
cuɛ U-ri-yaa wä nööŋ kä I-jëp, kä cua jɛ nöŋ kuäär ni Yɛ-ɣo-ya-kim, mëë cu jɛ näk kɛ thɛp kä cuɛ puɔ̱nydɛ yuɔr guäth kunyä nɛɛni tin duɛk.
24
Kä cu Ä-ɣi-kam gat Ca-pan Yir-mɛ-yaa luäk, kä /ka̱n Yir-mɛ-yaa thöp naath kɛ ɣöö ba jɛ wä näk.
Nuer Bible 1998
Nuer Bible Bible Society in South Sudan 1998, 2012