|
| 1 |
|
| Yehoyakimu mwene Yosiya omugabe wa Buyuda ku yaabaire akitandikire kutegyeka, Nyakubaho yangambira ati: |
|
| 2 |
|
| Irooko oyemerere omu kibuga kya Nyaruju ya Nyakubaho, ogambire boona abarugire omu ndembo za Buyuda, abaizire kuramiza omuri Nyaruju ya Nyakubaho, ebigambo ebi byona ebi ndikukuragiira kubagambira. Otagira eki waatsigayo. |
|
| 3 |
|
| Obundi bakaatega okutu, buri omwe ahinduka, areka emitwarize ye mibi; naanye nyegarukamu, ndeka kubareetera akabi aku ndikwenda kubareetaho, nimbatura ebibi bi bakora. |
|
| 4 |
|
| Obagambire oti: Nyakubaho naagira ati: Ku muraabe mutampuriire, mukakuratira amateeka gangye agu naabateereireho, |
|
| 5 |
|
| kandi mukata omutima aha bi abaheereza bangye abarangi abu ntuura nimbatumaho kubagambira, kwonka mutarikukyeetaho, |
|
| 6 |
|
| obwo Nyaruju egi ndyagigira nk'oku naagizire Shiilo, n'oru rurembo nduhindure orw'okukyeenwa amahanga goona ag'omu nsi. |
|
| 7 |
|
| Abahongyerezi n'abarangi n'abantu boona bakahurira Yeremiya naagambira omuri Nyaruju ya Nyakubaho ebyo bigambo. |
|
| 8 |
|
| Reero Yeremiya ku yaaherize kugamba byona ebi Nyakubaho yaamuragiire kugambira abantu, abahongyerezi n'abarangi n'abantu boona baamukwata, baamugira bati: Ori ow'okufa! |
|
| 9 |
|
| Waarangiririra ki omu iziina rya Nyakubaho oti: Nyaruju egi eryaba nka Shiilo, n'oru rurembo ruryaba eitongo, rubure ow'okurutuuramu? Abantu boona batyo bateeranira ahari Yeremiya omuri Nyaruju ya Nyakubaho. |
|
| 10 |
|
| Abategyeki ba Buyuda ku baakihuriire, baaruga omu kikaari ky'omugabe, baija omuri Nyaruju ya Nyakubaho, baashutama omu kisasi ky'Eirembo Risya ryayo. |
|
| 11 |
|
| Reero abahongyerezi n'abarangi baagambira abategyeki n'abantu boona bati; Ogu muntu ashemereire kucwerwa orubanja rw'okwitwa, ahabw'okuba yaarangira kubi oru rurembo, nk'oku mwayehuririra n'amatu gaanyu. |
|
| 12 |
|
| Yeremiya atyo agambira abategyeki n'abantu boona ati: Nyakubaho antumire kurangira kubi Nyaruju egi n'oru rurembo byona ebi mwahurira. |
|
| 13 |
|
| Mbwenu nimushemeze emitwarize yaanyu n'ebi murikukora, kandi mworobere ebi Mukama Ruhanga waanyu arikubagambira; na Nyakubaho naija kwegarukamu, arekye akabi aku agambire kubareetera. |
|
| 14 |
|
| Kwonka nyowe, reeba ndi omu mikono yaanyu. Munkore eki muraareebe ngu ni kirungi kandi kihikire! |
|
| 15 |
|
| Kwonka shi mukimanyire kimwe ngu ku muraanyite, nimwija kwereetera orubanja rw'okwita omuntu ori mwere, murureetere n'oru rurembo n'abarutwiremu; ahabw'okuba omu mazima Nyakubaho niwe antumire kubagambira ebyo byona ebi mwahurira. |
|
| 16 |
|
| Bwanyima abategyeki n'abantu boona bakagambira abahongyerezi n'abarangi bati: Ogu muntu tashemereire kucwerwa orubanja rw'okwitwa, ahabw'okuba yaatugambira omu iziina rya Mukama Ruhanga waitu. |
|
| 17 |
|
| Reero bamwe omu bakuru b'omuri egyo nsi baimuka baagambira abantu boona abateeraniire aho bati: |
|
| 18 |
|
| Miika owa Moresheeti akaranga omu busingye bwa Hezekiya omugabe wa Buyuda, yaagambira abantu ba Buyuda boona ati: Mukama ow'amahe naagira ati: Siyooni eryatabirwa nk'omusiri, Yerusalemu ebe ekirundo ky'amatongo, orushozi rwa Nyaruju rushwekwe ebishaka. |
|
| 19 |
|
| Mbwenu Hezekiya omugabe wa Buyuda n'aba Yuda boona bakamwita? Hezekiya taratiinire Nyakubaho, akamweshengyereza kumugirira embabazi? Na Nyakubaho tareegarukiremu akareka akabi aku yaabaire agambire kubareetera? Kwonka itwe nitwenda kwereetera akabi kahango! |
|
| 20 |
|
| Kandi hakaba hariho ondiijo muntu owaarangire omu iziina rya Nyakubaho. Niwe Uriya mwene Shemaaya owa Kiriyatiyearimu. Akaranga kubi ahari oru rurembo, n'ahari egi nsi, ebigambo ebirikushushana n'ebya Yeremiya. |
|
| 21 |
|
| Haza omugabe Yehoyakimu n'amamanzi ge goona, n'abategyeki boona, ku baahuriire ebi yaagamba, omugabe yaayenda kumwita. Uriya ku yaakihuriire yaatiina, yaacwa, yaahungira Misiri. |
|
| 22 |
|
| Bwanyima omugabe Yehoyakimu yaatuma abantu Misiri, Elinatani mwene Akiboora n'abandi bashaija abu yaabaire aine, |
|
| 23 |
|
| baihayo Uriya baamureetera omugabe Yehoyakimu, yaamwita; kandi omutumbi gwe baagunaga omu iziikiro ry'abantu abatari banyamaziina. |
|
| 24 |
|
| Kwonka Ahikaamu mwene Shafani yaarwana munonga ahari Yeremiya, tibaamurekurira bantu kumwita. |
|
|
|
|