To ummaatoore wonnde malla laamu salake jagganaago Nabukodonosor, laamiiɗo Baabila, jaɓaay kaɓɓirgal laamu maako, nden kam mi hiitoto ummaatoore man bee konu e weelo e nyawu kalluŋgu ndaaɓoowu, haa to mi nattini ummaatoore nde'e bee juŋngo maako.
Ammaa to ummaatoore jaɓi kaɓɓirgal laamiiɗo Baabila, huuwani mo, nden kam mi accan nde nde tokko remugo lesdi maare, nde jooɗo ton.” Non Jawmiraawo wi'i.
Walaa haaje on maayra bee konu e weelo e nyawu kalluŋgu ndaaɓoowu, an e ummaatoore ma! Ngam Jawmiraawo wi'i kanjum laatanto ummaatoore koo ndeyeere nde sali jagganaago laamiiɗo Baabila.
To kamɓe ɓe laati annabi'en fakat, to wolde am ɗon wondi bee maɓɓe, sey ɓe toro yam min Jawmiraawo honooɓe asama, ngam taa kuuwruɗe luttuɗe nder haykaliiru am e nder saare laamiiɗo Yahuuda e nder Urusaliima njahre haa Baabila.
Saa'i Nabukodonosor, laamiiɗo Baabila dahi Yekoniya ɓii Yooyakim, laamiiɗo Yahuuda e tedduɓe Yahuuda e Urusaliima fuu haa Baabila, o acci daŋraŋge e ko wi'ete loonde mawnde e kuuwruɗe goɗɗe nder Urusaliima.
Ndaa nii Jawmiraawo honooɓe asama, Allah Isra'iila wi'i dow kuuwruɗe luttuɗe nder haykaliiru Jawmiraawo e nder saare laamiiɗo Yahuuda e nder Urusaliima fuu: