×

Maayong Balita 2012

JEREMIAS 27

1
Sa pagsugod sang paggahom sang anak ni Josias nga si Sedequias subong hari sang Juda, ang Ginoo nagsugo sa akon
2
nga maghimo sing gota nga kahoy kag tabang nga panit, kag itakod sa akon liog.
3
Dayon ang Ginoo nagsugo sa akon sa pagpadala sing isa ka mensahe sa mga hari sang Edom, Moab, Amon, Tiro kag Sidon paagi sa ila mga embahador nga nag-abot sa Jerusalem sa pagpakigkita kay Haring Sedequias.
4
Ang Ginoo sang mga hangaway, ang Dios sang Israel, nagsiling sa akon sa pagsugo sa ila nga sugiran ang ila mga hari nga ang Ginoo nagsiling:
5
“Ako, sa akon daku nga gahom kag kusog, nagtuga sang kalibutan, mga katawhan, kag sang tanan nga mga kasapatan nga nagakabuhi sa duta. Kag sarang ko ini mahatag sa kay bisan sin-o nga akon ginapili.
6
Ako ang nagbutang sini tanan nga mga kapungsoran sa idalom sang gahom sang akon alagad nga si Haring Nabucodonosor sang Babilonia, kag ginhimo ko pa gani nga ang mga kasapatan sa talon mag-alagad sa iya.
7
Ang tanan nga mga kapungsoran magaalagad sa iya, kag sila magaalagad sa iya anak nga lalaki kag sa iya apo nga lalaki tubtob mag-abot ang tion nga ang iya pungsod mapukan. Dayon ang iya pungsod magaalagad sa gamhanan nga mga kapungsoran kag sa gamhanan nga mga hari.
8
“Pero kon ang bisan ano nga pungsod ukon ginharian indi mag-alagad sa iya kag magpasakop sa iya pagdumalahan, dayon akon silutan inang pungsod paagi sa inaway, gutom, kag balatian, tubtob mahatag ko kay Nabucodonosor ang paglaglag sini sing bug-os.
9
Indi kamo magpati sa inyo mga propeta ukon sa kay bisan sin-o nga nagasiling nga mapakot niya ang palaabuton paagi sa mga damgo, ukon paagi sa pagtawag sa mga espiritu sang mga patay, ukon paagi sa babaylan. Sila tanan nagasiling sa inyo nga indi kamo mag-alagad sa hari sang Babilonia.
10
Sila nagapatalang sa inyo kag manginkabangdanan sang pagbihag sa inyo palayo sa inyo pungsod. Tabugon ko kamo, kag malaglag kamo.
11
Pero kon ang isa ka pungsod magpasakop sa hari sang Babilonia kag mag-alagad sa iya, dayon himuon ko nga ini nga pungsod magpabilin sa iya kaugalingon nga duta, sa pagpanguma sini kag sa pag-estar didto. Ako, ang Ginoo, naghambal sini.”
12
Nagsiling ako sang amo man nga butang kay Haring Sedequias sang Juda, “Magpasakop kamo sa hari sang Babilonia. Alagara sia kag ang iya mga tawo, kag magakabuhi kamo.
13
Ngaa bala nga mapatay ka kag ang imo mga tawo sa inaway, ukon sa gutom ukon sa balatian? Amo ini ang ginsiling sang Ginoo nga mahanabo sa bisan ano nga pungsod nga indi mag-alagad sa hari sang Babilonia.
14
Indi kamo magpati sa mga propeta nga nagasiling sa inyo nga indi kamo mag-ampo sa iya. Ginapatalang nila kamo.
15
Ang Ginoo gid nagsiling nga wala niya sila ginpadala, kag nagabutig sila sa inyo sa ngalan sang Ginoo. Gani, tabugon niya kamo kag pamatyon, kamo kag ang mga propeta nga nagasugid sini nga mga kabutigan.”
16
Dayon ginsugiran ko ang mga pari kag ang mga tawo nga ang Ginoo nagsiling: “Indi kamo magpati sa mga propeta nga nagasiling nga sa indi madugay ibalik ang mga manggad sang Templo halin sa Babilonia. Nagabutig sila sa inyo.
17
Indi kamo magpati sa ila! Alagara ninyo ang hari sang Babilonia kag kamo magakabuhi! Ngaa bala nga ini nga siudad mangintinumpokan sang ginub-an?
18
Kon sila matuod gid nga mga propeta, kag kon yara sa ila ang akon mga pulong, papangayua sila sa akon, ang Ginoo sang mga hangaway, nga indi ko pagtugotan nga ang mga manggad nga nabilin sa Templo kag sa palasyo sang hari nga dalhon sa Babilonia.”
19
Sang pagbihag ni Haring Nabucodonosor pakadto sa Babilonia sang hari sang Juda nga si Joaquin, nga anak ni Joaquim, kag sang mga kinilala nga mga tawo sang Juda kag Jerusalem, iya ginpabilin ang mga haligi, ang tangke nga bronsi, ang mga tulongtungan, kag ang iban pa nga mga manggad sang Templo.
20
21
“Pamatii ang akon inugsiling, ako, ang Ginoo sang mga hangaway, ang Dios sang Israel, nahanungod sa mga manggad nga nabilin sa Templo kag sa palasyo sang hari sa Jerusalem:
22
Pagadalhon ini sa Babilonia kag magapabilin ini didto tubtob nga ako magadumdom sini. Dayon dalhon ko ini pabalik kag iuli sa sini nga lugar. Ako, ang Ginoo, naghambal sini.”
Ilonggo Bible 2012
Maayong Balita nga Biblia Philippine Bible Society, 2012
:
Save Notes