Ûtûmane kîrî mûnene wa Edomu, na wa Moabu, na mûnene wa nchiarwa cia Amoni, na wa Tiro, na wa Sidoni. Ûtûme atûmwa ba anene bau barîa bareejîre Jerusalemu batûmi kîrî Zedekia mûnene wa Juda.
“Îndî antû ba mûgongo kana ba waathani bûrîa bûkarega kwathîkîra Nebukadineza, mûnene wa Babiloni, nkaabakanûkia na ndwaa, na mpara, na mîrimo îmîthûûku mwanka rîrîa Nebukadineza akaabathiria. Nîu ûûni MWATHANI nkuuga.
Tontû bûû, bûkáthikîreeni iroria bieenu, kana aringia beenu, kana barîa babûtaûragîra irooto kana barîa baranagîria na roho cia antû barîa baakuîre na aragûri beenu, barîa bakûbwîra, ‘Bûtîtumîkîra mûnene wa Babiloni.’
Kûrî na gîtûmi kîrîkû ûûgwe na antû baaku bûûragîrwa na ndweene, kana bûthirua nî mpara, na mîrimo îmîthûûku? Ûu nîu MWATHANI augîîte gûgaakara kîrî barîa bakaarega gûtumîkîra mûnene wa Babiloni.
Këethîra bo nî iroria na mma, na këethîra nî ni mbarîîtie nî bambereence ni MWATHANI Mweneinya nîkenda into birîa bitigeere kîûrûûne, na gîkaro kîa mûnene wa Juda, na Jerusalemu bitîgaikue Babiloni.
Nabio nîbio into birîa Nebukadineza mûnene wa Babiloni aatigîre rîrîa aikîrie Jekonia mûnene wa Juda, mûtaana wa Jehoiakimu, na atongeeria bangî ba Juda, na ba Jerusalemu kîthamîrioone kûu Babiloni.
Ûûni MWATHANI Mweneinya, Mûrungu wa Israeli ndiuga atîrî, mantûûne jegiî into birîa biatigîrwe kîûrûûne, na gîkaroone kîa mûnene wa Juda, na Jerusalemu: