×

Ziazia Kekeapai 1978

Yeremaya 27

1
Ti tonatona zogarago nga ga Sedekiya nangia wiri Yosiya, nangia bakindo aYudo, gi pai aye re koyo du Yeremaya ni yo du Yekova ni.
2
Ya Yekova fere wẽ: “Mo mángi giri vodatise na ngbongbo gonga, ki moi he ku goro.
3
Mo kédi pai fu bakindo aEdome, na fu bakindo aMoabo, fu bakindo awiri Amona, fu bakindo aTuro, na fu bakindo aSidono be agu asunge naye ku Yerusarema yo koyo du Sedekiya ni nga bakindo aYudo.
4
Mo fú gi rugute fu yo re tipa abairayo: ‘Ya Yekova nga ga arimbasa ko nga ga aYisaraere Mbori wẽ: Gere nga gu oni ka gumba fu abairaroni:
5
“Mi du na gi bakere tandu nataĩ bere ki mangi kpotosende, na aboro na agu anya du auru kpotosende, mi nafu he fu kina gu ni ru he bangire ka fu he fu ni
6
Awere mi fu agi aringara dunduko re ku be Nebukadenesara, bakindo aBabero, nga gi moyambu, mi ki fu anya ringara fu ko a ami nimangi pako.
7
Arikaaboro dunduko amánga pa ko na pa wiriko na pa titako, daho ndikidi rago gako ringara ka da ni; fuo gure dungu arikaaboro na bakikindigi abakindo asá ko ni gayo kanga.” ’
8
“Ono ka gu rikaaboro watadu gu ngbi amánga nga pa Nebukadenesara bakindo aBabero, ki moi gorõyo ku tii gonga yo nga ga bakindo aBabero ya, mi ambúsa gu rikaaboro re ni basape, ni ngbongi, na tata kaza, wo poi Yekova, daho mi ka nyasa yo ni be ko.
9
Si du ka oni dége nga turoni fu gaoni anebi ya, fu gaoni airasoroka, fu gaoni abarari musumo, fu gaoni abagumba gu pai nikaye, watadu fu gaoni abinza a ya, nga agu yo ninaya fu roni, ‘Oni amánga nga pa bakindo aBabero te.’
10
Bambiko si nga zire i agumba fu roni, si du i agá na oni ti ni tuturu ti gaoni ringara, mi ki do roni rogo ho, oni ki kpiki.
11
Ono gu rikaaboro nga gu nikamaa gorõyo ku tii ga bakindo aBabero gonga yo ka manga pako, mi ambú yo rogo gayo ringara, ka sopa ha na ka raka yo, wo poi Yekova.”
12
Mi gumba pai kina wo a, fu Sedekiya nga bakindo aYudo: “Oni moi gorõroni ku tii ga bakindo aBabero gonga yo ki nimangi pako na pa gako aboro, ki nye ni ungaroni.
13
Tipagine oni ka akpika be basape ti ni na gaoni aboro, be ngbongi, na be tata kaza, wa gumba Yekova ha tipa gu rikaaboro nga agu yo nikamanga pa bakido aBabero?
14
Ka oni dége nga turoni sa agu apai anebi nagumba ha ya, ‘Oni amánga nga pa bakindo aBabero te,’ bambiko zire du i agumba ha fu roni.
15
Mi akeda nga yo te, wo poi Yekova, ono i nagumba pai ni zire na rimore, si du mi adó roni ti ni ku sa yo oni ki kpiki yo, oni na agu anebi nagumba pai fu roni.”
16
Mi ki ya fu aboromotumo na fu agi aboro dunduko re, “Ya Yekova wẽ: Ka oni dége nga turoni sa agu apai gaoni anebi nagumba ha fu roni ya, naaya, ‘Oni ngére, i ayéga na agu aúsunge nga ga ga Yekova bambu awere ngbutuko Babera yo,’ bambiko si nga zire i agumba fu roni.
17
Ka oni dége nga turoni fu yo ya; oni mángi pa bakindo aBabero ka nye ni ungaroni. Tipagine ka gi bakporo du ti ni re ni ngbi ugure?
18
Ka i du ni anebi, na ka sangba Yekova du ti yo, i zúngadi Yekova nga ga arimbasa ko, tipa agu aúsunge nye tii ga Yekova bambu yo, na rogo ga bakindo aYudo bambu yo, na Yerusarema yo, ka i ndú nga na ni ku Babera yo ya.
19
Bambiko ya Yekova nga ga arimbasa ko wẽ tipa agu adangba, na tipa baime, na tipa amburuhe, na gu yangara aũsunge nga gu i ambu rogo gi bakporo re,
20
nga gu Nebukadenesara bakindo aBabero aroga nga ha ya, ho ko aga ni na Yesonya ni zizi ko Yerusarema yo ku Babera yo nangia wiri Yoyakima, bakindo aYudo, na agu agbia akporo nga ga Yuda na ga Yerusarema yo
21
Ya Yekova nga ga arimbasa ko, nga ga aYisaraere Mbori wẽ, tipa agu aúsunge i ambu rogo ga Yekova bambu yo, rogo ga bakindo aYudo bambu yo, na Yerusarema yo:
22
1 agá na ni ku Babera yo si ki nye yo dati gu uru ho mi ka fu rugute ni tipa ha, wo poi Yekova. Fuo gure mi ki ye na ni ki karaga ha ku rogo gi ba re.”
Zande Bible 1978
La Sainte Bible en Zande Alliance Biblique Universelle, 1978
:
Save Notes