×

EBIBILIA ENCHENU 2020

YEREMIA 28

1
Ekaba ase omwaka oyio, ekero Zedekia achagete kogamba, ase omotienyi o gatano bw’omwaka o kane, omobani korwa omochie o Gibeoni, Hanania, mosinto bw’Asuri, agakwana nainche ime ase enyomba y’Omonene. Ekero abakuani na abanto bonsi baigwete, agantebia ng’a,
2
aya naro Omonene bw’Emeganda, Nyasae bw’Abaisraeli, atebire: “Nabunire rikorogoto ri’omoruoti o Babeli.
3
Ekero emiaka ebere etaraera ning’iranie gocha aase aiga ebikorero bionsi bi’enyomba y’Omonene, ebio Nebukadinesaro, omoruoti o Babeli, arusetie aiga, akabiira Babeli.
4
Boigo ning’iranie Yekonia mosinto o Yehoyakimu, omoruoti bw’Abayuda, amo nabanto bonsi bairetwe Babeli ase obosomba korwa ase ense y’Abayuda, ekiagera nimbune rikorogoto ri’omoruoti o Babeli.” Nabo Omonene atebire.
5
Erio Yeremia omobani akairaneria Hanania omobani, agwo ase amasio ’abakuani na ase abanto bonsi bateneine ime ase enyomba y’Omonene,
6
akamotebia, “Amina. Tiga Omonene akore ayio. Ee, tiga akore amang’ana ayio kwabanire aikerane, erio airanie korwa Babeli ebikorero bi’enyomba y’Omonene na abanto bairetwe obosomba.
7
Korende tegerera oigwe amang’ana aya ngokwana naye aiga ekero abanto bonsi baigwete.
8
Ababani abwo bagotang’anerete aye na inche ase chingaki chia kare nigo babanete igoro y’esegi, na enchara, na oborwaire bogoita, ng’a mbichiche ase chinse chinyinge na ase amaruoti are ne chinguru.
9
Korende igoro ase omobani okobana ng’a omorembe nobe, amang’ana ’omobani oyio karaikeranigwe rirorio oyio nomonyakeene, naende namanyekanete ng’a ekeene Omonene nere omotomete.”
10
Erio Hanania, omobani oria, akarusia rikorogoto riria korwa ase rigoti ria Yeremia omobani, akaribuna.
11
Hanania agakwana ase abanto bategererete, agateba: “Aya naro Omonene agoteba: Emiaka ebere etaraika nabo ndabune rikorogoto ria Nebukadinesaro, omoruoti o Babeli, rirue ase amagoti ’ebisaku bionsi.” Korende Yeremia omobani akarua agwo, akagenda.
12
Engaki ende, nyuma Hanania omobani karusirie rikorogoto riria ase rigoti ria Yeremia omobani na koribuna, ring’ana ri’Omonene rigacha ase Yeremia, rikamotebia,
13
“Genda otebie Hanania ng’a inche Omonene nigo ngoteba iga: Aye nkwabuna rikorogoto ri’omote, korende ribaga ri’erio Omonene naroisie eri’ekioma.
14
Nimbeke ase amagoti ’abanto b’ebisaku bionsi rikorogoto ri’ekioma, erinde babe abasomba ba Nebukadinesaro, omoruoti o Babeli, nabarabwo mbamokorere, ekiagera inche Omonene namoeire ching’iti chionsi chi’orosana boigo.”
15
Erio Yeremia omobani agatebia Hanania omobani, “Aye Hanania, tegerera oigwe, Omonene tagotometi aye, korende kwaeire abanto ribaga begene oborimo.
16
Ase engencho eyio Omonene otebire ng’a nagoite orue ase ense. Nokwe ase omwaka oyo, ekiagera gwakwanire amang’ana agerire abanto basaririe ase Omonene.”
17
Ase omotienyi o gatano na kabere ase omwaka oria Hanania omobani agakwa.
Gussi Bible 2020
OLD EKEGUSII BIBLE PROTESTANT EDITION Bible Society of Kenya, 2020
:
Save Notes