“Osolobuẹ sị, ‘Ahụa iri kwasị ọgụn-ẹtọ alị Babilọnụ e gi kpa ikẹn zugụ, a chọha m ụnụ d'e mẹzu nkwa ahụn m gi omikẹn kwe nị m jẹnkọ d'e wekinhẹn ụnụ alị ụnụ.
M k'a nị ụnụ hụn m; m k'e wepụha ụnụ ẹka ndị gini ụnụ, wekinhẹn ụnụ. M jẹnkọ d'a gha alị ile lẹ ebe ile m chụye ụnụ wẹhẹzi ụnụ ebeni — e mẹ m n'ọ rịzịnị ụnụ mma, wekinhẹn ụnụ ebe m gha kpụnrụn ụnụ.’ Ya kẹ Osolobuẹ ku.
Ẹghẹẹ, m k'e gi ọpịa-agha lẹ ụnwụn lẹ eje-emu chụ wẹ. Ndị alị-eze ile rị ụwa hụn ihiẹn m mẹ ndị ahụn, egun a tụ wẹ. Wẹ k'a wụrụ ihiẹn wẹ gi a bụ ọnụ, ihiẹn w'a hụn a jụpụ ẹsọn, ihiẹn w'a mụ ẹmụ lẹ ihiẹn-ifẹnrẹn ẹnya ndị alị ile m k'a chụjẹn wẹ.
Makẹni egini wẹ oku m dọn, oku hụn m gi idibo m wụ ndị-amụma gwa wẹ ọgụgwa-ọgụgwa. Ya kẹ Osolobuẹ ku. Ụnụ nwẹn wẹ kpụnshi alị ndị-ọzọ egizikwọnị oku m dọn. Ya kẹ Osolobuẹ ku.
Lee ni ihiẹn Osolobuẹ ihiẹn ile rị okpuru ẹ hụn wụ Chuku Izrẹlụ ku banyeni Ehabụ nwa Kolaya lẹ Zẹdikaya nwa Maaseya, madụ ẹbụọ hụ gi ẹfan m e buni ụnụ amụma-ntụ: ‘M jẹnkọ d'e bu wẹ che ẹka Nebukadineza wụ eze alị Babilọnụ, o gbu wẹ idẹnya ụnụ.
Ihiẹn m jẹnkọ d'e mẹ wẹ k'a wụrụ ihiẹn ndị Juda ile wẹ kpụnjẹn Babilọnụ e gi a bụ ịhịan ọnụ: a sị ịhịan, “Osolobuẹ ya mẹ i ihiẹn o mẹ Zẹdikaya lẹ Ehabụ, ndị hụn eze Babilọnụ dụn ọkụn.”
M k'e mẹ wẹ ẹbụbụọ ẹrịra makẹni e mẹgụọ wẹ arụ imẹ Izrẹlụ; a nagụọ wẹ ibe wẹ inyẹnmẹ, gi ẹfan m tụ ntụ, ku ihiẹn m gwalẹni wẹ kụ. A marịnghọ m ihiẹn wẹ mẹ; m wụ ọshẹri.’ ” Ya kẹ Osolobuẹ ku.
mmẹ wụ Osolobuẹ rị nwan e ku ẹ nị m jẹnkọ d'e yerịrị Shẹmaya onyẹ Nẹhẹlam lẹ ẹbozo ẹ afụnfụn. Shẹmaya enwọnkọ akpụ onyẹ nke ẹ ohu jẹnkọ d'a họdụnị mọbụ hụn ihiẹn-ọma m jẹnkọ d'e mẹni ndị nke m, makẹni o kugụọ ihiẹn ụnụ e gi a pa oku m.’ ”