×

Ika Bible 2018

Jerimaya 3

1
“Okẹnnyẹ kpechan nwunyẹ ẹ, nị hụn okpoho a pụ, lụma okẹnnyẹ ọzọ, nị di ẹ mbụ lụmazị a? Alị a rụchanrịnkọ o mẹ ẹ? Kanị ị hụ e bi kẹ ịgbaraja ya lẹ ndị bu ọda rị a sụọ, nị ị buruhẹzi m nwan?” Ya kẹ Osolobuẹ ku.
2
“Ledẹ ẹnya elu òke ndịnị nwọnlẹni ihiẹn rịn'a, elee hụn ị nọtulẹni we enwẹn i ye wẹ gi mẹ ihiẹn sụọnị wẹ? Y'a nọdị alị mkpẹnrẹn ụzọ kẹ ịgbaraja, a rịọ alị ichẹn-ichẹn, e chedẹ wẹ ụzọ a dọdọn lekẹ onyẹ Arabụ rị imẹ atụ; y'e mẹrụchanrịngụọ alịnị ebe ị rị e sọn mmọn kẹ ịgbaraja lẹ ebe ị rị e bi eje-obibi.
3
Ya haịn m gi kwọndọn mirin, mirin udu-mirin ezuezini; bụ ụnụ hụkwọ e bu isi-ikẹn nọkẹ ịgbaraja, jụ nị ifẹnrẹn emẹkọ ụnụ.
4
Ẹlẹ kikẹnni kẹ ụnụ hịgụ m, ‘Euu, nẹdi m, ọwụ m kete m rị okoro,
5
n'ị tọ e ze ize? N'i busọnmẹ olulu jẹnrin ejẹn?’ Ẹnịna kẹ ụnụ e ku, kanị ụnụ e mẹsọnmẹ eje-ihiẹn ile a nị ụnụ e mẹ.”
6
Ogẹn Josaya gi wụ eze Juda, Osolobuẹ nọ sị m, “Y'a hụngụọ ihiẹn Izrẹlụ Ẹbamịn-ugu danpụgụnị mẹ? O jẹnsọnmẹgụọ elu òke jẹn elu lẹ okpuru osisi ọwụlẹ duni d'a gba ịgbaraja a wụ ife mmọn ichẹn-ichẹn.
7
Ihiẹnni ile o mẹ, m te roni o k'e kinhẹn d'e kunrun m, kanị, o kinhẹnni. Juda nwẹnẹ-ẹ-okpoho ẹnya rịlẹni ụzọ ohu a hụnghọ ihiẹn mẹni.
8
E yeghọ m Izrẹlụ Ẹbamịn-ugu danpụgụnị ẹkụkwọ-mpechan, chụpụ a — makẹ ughẹrẹ ẹ, ife mmọn ichẹn-ichẹn. M nọ hụn a nị egun atụnị Juda nwẹnẹ ẹ hụn ẹnya rịlẹni ụzọ ohu, ọ pụ ogbe d'a ghẹrẹmazị ughẹrẹ ife mmọn ichẹn-ichẹn.
9
Makẹni onwọnkẹni ihiẹn Izrẹlụ Ẹbamịn-ugu kpọ eje-obibi ẹ, o mẹrụchanrịn alịnị ile — rụasọnmẹ osisi lẹ ọmụma — lekẹ okpoho ẹnya rịlẹni ụzọ ohu.
10
Ihiẹn ndịnị ile mẹni, Juda nwẹnẹ ẹ ẹnya rịlẹni ụzọ ohu egikwọnị obi ẹ ile kinhẹn d'e kunrun m — o kinhẹnhụ nke ọnụnụ-ire. Ya kẹ Osolobuẹ ku.”
11
Osolobuẹ nọ sị m, “Izrẹlụ Ẹbamịn-ugu hụn danpụnị kazịdẹ nwan Juda ẹnya rịlẹni ụzọ ohu mma.
12
“D'e bu ẹnya zinmẹ ẹbamịn-ugu n'ị hị ihiẹnni: sị wẹ, ‘Izrẹlụ danpụgụnị, kinhẹn azụụn.’ Ya kẹ Osolobuẹ ku. ‘Ebupụkọzị m ụnụ ihun, onyẹ omikẹn kẹ m wụ.’ Ya kẹ Osolobuẹ ku. “Ewekọ m iwe jẹnrin ejẹn.
13
Ka kwerihụ nị y'e mẹọlẹ njọ, nị y'e nupụgụọ isi okpuru Osolobuẹ wụ Chuku i, y'e wegụọ enwẹn i kwanị mmọn alị ọzọ rị ichẹn-ichẹn okpuru osisi ọwụlẹ duni, y'e mẹni ihiẹn m sị ị mẹ.” Ya kẹ Osolobuẹ ku.
14
Osolobuẹ sị, “Ụnụ ndị danpụgụnị: kinhẹn ni, nị mmẹ wụ di-nwọnni ụnụ! M k'a gha imẹ igunrun ụnụ họrịsọnmẹ onyẹ ohu-ohu imẹ obodo ọwụlẹ, madụ ẹbụọ-ẹbụọ imẹ ebọn ọwụlẹ, e welụa m wẹ obodo Zayọnụ.
15
E tumẹni m ụnụ ndị-ndu hụn k'e du ụnụ kẹ m chọ. Wẹ k'e gi amamihiẹn lẹ nghọta du ụnụ.”
16
Osolobuẹ sị, “Ogẹn ahụn, ụnụ k'a bawaye ọda-ọda imẹ alịnị; ekukọzị wẹ oku Ẹkpẹti-nkwerigbama Osolobuẹ. Ọ bankọzị wẹ obi, anyanhankọ w'a, ọ dakọ wẹ, arụnkọ wẹ ọzọ.
17
O ru ogẹn ahụn, wẹ k'a kpọ Jerusalẹm Ukpo-eze Osolobuẹ, alị ile k'a gha e zu imẹ Jerusalẹm ebẹhụ d'e ye ẹfan Osolobuẹ ọghọ. Esọnkọzị wẹ eje-obi wẹ hụn wẹ gi a gba isi-akwanran.
18
O ru ogẹn ahụn, ikpụlọ Juda k'a bannị ikpụlọ Izrẹlụ. Wẹ ile k'a wị gha alị rị ẹbamịn-ugu lụaha alịnị m ye ndị nẹdi ụnụ kanị weri nị ya wụ ukuu wẹ.
19
“Mmẹ nwẹn, m te sị enwẹn m, ‘Nkẹ ọ sụọka m nị m mẹ ụnụ kẹ ụmụ, ye ụnụ alị rị mma, alị manahịn nke ndị alị ọzọ ile mma.’ M te ro ni ụnụ k'a kpọ m, ‘Baba’; nị ụnụ esọnbehikọ m.
20
Kanị, ịyụ wụ ikpụnọ Izrẹlụ a lagụọ m tọ sọnmẹ ihiẹn ọzọ kẹ okpoho ẹnya rịlẹni ụzọ ohu e mẹ di ẹ.” Ya kẹ Osolobuẹ ku.
21
Ụzụn rị elu-ugu ndịnị fọnni, ụzụn ẹkwan lẹ arịrịọ ndị Izrẹlụ rọ, makẹni e bimẹgụọ wẹ ghẹrẹ-ghẹrẹ-ghẹrẹ, zọ Osolobuẹ wụ Chuku wẹ.
22
Ụnụ ndị danpụgụnị, kinhẹn ni; m k'a zụọ ụnụ emu ịdankin-azụụn. “Ẹghẹẹ, ẹnyi k'e kinhẹn, makẹni ịyụ wụ Osolobuẹ Chuku ẹnyi.
23
Eziẹ, ụzụn ile ẹnyi a zụn ebe ẹnyi rị a rụa mmọn elu òke lẹ elu-ugu enwọn isi; ezioku, ẹka Osolobuẹ wụ Chuku ẹnyi sụọ kẹ nzụọpụha k'a gha bịanị Izrẹlụ.
24
Gha alị lala, ihiẹn ifẹnrẹn ndịnị ẹnyi e fe e richanrịngụọ ihiẹn ile ndị nẹdi ẹnyi wẹ rụn — kẹ atụnrụn kẹ efin, kẹ mmụ ikẹnnyẹ lẹ ikpoho.
25
Nị ẹnyi gi ifẹnrẹn ihiẹn ẹnyi mẹ dan alị, nị ẹnyi nị ifẹnrẹn ihiẹn ẹnyi mẹ ru ẹnyi ẹhụ. Ẹnyi e mẹgụọ Osolobuẹ wụ Chuku ẹnyi njọ — kẹ ẹnyi kẹ ndị nẹdi ẹnyi; ghakwọrị ebe ẹnyi rị nwata d'e ru tannị, ẹnyi e ara humẹni Osolobuẹ wụ Chuku ẹnyi isi.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes