×

Ekitabo Erikwera 2008

Yeremia 3

1
Hari omushaija ku ashenda omukazi we, ogwo mukazi yaamurugaho yaashwerwa ondiijo mushaija, iba omukuru aba naakimugarura? Obwo egyo nsi tekaasiisikara munonga? Mbwenu iwe oraayire na nkunzi zaawe nyingi, ebyo okangarukira? Nikwo Nyakubaho arikugamba.
2
Naga amaisho aha bibungo by'emparamaata oreebe? Ni nkahi, ahu otakabyamire na muntu? Okaba oshutama aha rubaju rw'omuhanda otegyereize nkunzi zaawe, nk'oku Omuharabu aba aine eki ategyerereize omu ihamba. Otyo washiisha ensi n'emicwe yaawe mibi ey'obwamaraaya.
3
Nikyo enjura yaarekyeire kusheesheka; n'eya Katumba etagwe; Haza waaguma oyomire ahamaisho nka maraaya, otaine na kashoni.
4
Tokamazire mwanya muraingwa ontakiire oti: Taata, munywani wangye w'omu buhangare! Obwo nooteekateeka oti:
5
Ebyo aryaguma aine ekiniga? Aryaguma angwereirwe kubi ebiro byona? Eego; nikwo waagambire, kwonka waaguma nookora ebibi byona nk'oku orikwenda.
6
Omu busingye bw'omugabe Yosiya, Nyakubaho akangira ati: Oreebire eki Isiraeli oteesigwa yaakozire; oku yaagiire ahari buri kibungo kiraingwa n'aha nsi ya buri muti gw'omurinzi akaraayirayo?
7
Haza nkateekateeka ngu ku ariheza kukora ebyo byona, aryangarukira. Kwonka shi taragarukire; n'omurumuna Yuda, otari w'amazima, akakireeba.
8
Yuda ogwo akareeba ku naabingire Isiraeli otari mwesigwa, nimmutura obushambani bwe; nkamuha ebaruha y'okumushenda, kwonka omurumuna Yuda, otari w'amazima, taratiinire, kureka nawe akagyenda yaaraaya.
9
Ahabw'obwamaraaya kumurahukira, yaashiisha ensi, yaashambana n'amabaare n'ebiti.
10
Ebyo byona nobu biraabe byabaire bityo, omurumuna Yuda, otari w'amazima, tarangarukiire n'omutima gwe gwona, kureka akaryarya; nikwo Nyakubaho arikugamba.
11
Kandi Nyakubaho akangira ati: Isiraeli otari mwesigwa ayeyorekire ku aine orubanja rukye okukira orwa Yuda otari w'amazima.
12
Mbwenu irooko orangirire ab'omu bukiizi-bwa-bumosho ebi bigambo oti: Nyakubaho naagira ati: Iwe Isiraeli otari mwesigwa, garuka! Tindikwija kukureebesa kiniga; ahabw'okuba ndi ow'embabazi. Nyakubaho naagira ati: Tindiguma nyine ekiniga ebiro byona.
13
Kureka yemera orubanja rwawe, ku waagomeire Mukama Ruhanga waawe, okayaabaatikanira omu baaruhanga b'abanyamahanga; okanga kworobera ebiragiro byangye; Nyakubaho nikwo arikugamba.
14
Nyakubaho naagira ati: Imwe abagomi, nimugarukye. Manya niinye mukama waanyu. Ndyabatwara niinyiha omwe-omwe omu rurembo, na babiri-babiri omu ruganda, mbahitsye Siyooni.
15
Kandi ndyabaha abariisa abaine omutima nk'ogwangye, babariise n'obwengye n'okwetegyereza.
16
Nyakubaho naagira ati: Reero omu biro ebyo, ku murikanya mwaba baingi omuri egyo nsi, abantu baryaba batakigamba ha by'eshanduukye yangye y'endagaano. Baryaba batakigiteekateekaho, batakigiijuka, batakigijura, nobu kwakuba okugaruka kugikora.
17
Omu biro ebyo Yerusalemu eryayetwa ekitebe ky'obugabe ekya Nyakubaho, amahanga goona gakiteeranireho kuheera Nyakubaho ekitiinwa omuri Yerusalemu; batakikora n'obugangaazi bw'emitima yaabo mibi.
18
Omu biro ebyo ab'omuryango gwa Yuda baryakwatanisa n'ab'omuryango gwa Isiraeli, barugye kumwe omu nsi y'omu bukiizi-bwa-bumosho, baije omu nsi ei naahaire baashwenkuriimwe kuba obutaka bwabo.
19
Nkagira nti: Ka nkubarire omu baana bangye, nkuhe ensi nungi y'obutaka, erikuhitira kimwe ez'omu mahanga goona. Kandi naateekateeka ngu oryanyeta sho, otakindugaho.
20
Kwonka buzimazima, nk'oku omukazi otari mwesigwa atsigaho iba, naimwe ab'omurayango gwa Isiraeli nikwo mwambeereire abatari b'amazima; Nyakubaho nikwo arikugamba.
21
Okuborooga n'okurira n'okutaka eby'Abaisiraeli nibihuririrwa omu bibungo by'emparamaata, ahabw'okuba bakareka emitwarize yaabo, baayebwa Mukama Ruhanga waabo.
22
Imwe baana 'mwe ebirare, nimugarukye mbatambire oburare. Naimwe mugire muti: Reeba, twakwetuurira, ahabw'okuba niiwe Mukama Ruhanga waitu.
23
Buzimazima okuteerera emihira aha bibungo, n'okubandirwa aha nshozi n'ebya busha; Kureka Mukama Ruhanga waitu niwe mujuni wa Isiraeli.
24
Kwonka okwiha omu buto bwaitu Baali ruhanga w'ebirikwitsa enshoni atumazireho byona ebi baatatenkuriitwe baahendekyeire; amasyo gaabo g'entaama n'ag'ente na batabani baabo na bahara baabo.
25
Mbwenu ka tugume twitsirwe enshoni, ekihemu kitujwengize, ahabw'okuba okwiha omu buto n'okuhitsya eri izooba, itwe na baatatenkuriitwe tutuura nitucumura ahari Mukama Ruhanga waitu, twangire kworobera ebiragiro bye.
Nyankole Bible 2008
The Bible with Apocrypha in Runyankore-Rukiga, new revised joint translation The Bible Society of Uganda, 2008
:
Save Notes