Wakat n wate tɩ m neba yelle, a Israyɛl la a Zɩɩda yelle, na n teeme. Mam na n leb n tall-b lame n wa tẽng ninga mam sẽn da kõ b ba rãmba la b na n le soog-a lame. Dẽ yaa Soaala gomde.»
Sã n ya foo, Israyɛl, m neda, da zoe rabeem ye, Yaa Soaala n gomde, foom a Zakoob, da maan dabeem ye tɩ bala m watame n na n fãag-fo, m wat n na n yiis-f-la tẽn-zãorgẽ, m wat n na n yiisa f kamba, b yembd tẽngẽ. Israyɛl, f na n le paama laafi, ned kõn le wa sãam f gãag ye.
M bee ne foo n na n fãag-fo Soaalã n yeele. M datame tɩ d yɛla yaa n baase, maam ne bu-zẽmbã, mam sẽn sẽeg foo b rãmb tẽngẽ. Sã n ya foo, m ka bas-f saal ye; M waa n kong n sɩbg-f lame wala sẽn segde, m da ka tõe n bas f saal woto ye.
Bõe yĩnga la f kũmd f sãmpogr yĩnga, n kũmd f tooga sẽn ka woogda yĩnga? Ad-m sã n maan-f woto, yaa f beegra sẽn yɩ kãsenga yĩnga, yaa f kongra sõor sẽn labsa yĩnga.
La bãng tɩ sẽn da namsd-b fooma, na n paama namsgo fo bɛɛba nengẽ. Sẽn kis-b fooma na n looga yembdo; sẽn yeesd-b fo futã, b na n yeesa bãmb me futu; sẽn zɛɛd-b fooma, b na n zɛɛ bãmb me. Bɛɛba fãa na n looga yembdo.
Ad Soaala-Wẽnd koɛɛg a to: «Israyɛl buudu, m na n teema y vɩɩm, m na n zoe-la y nimbãanega; tẽnsa na n le maneg n meeme la na n yɩɩ rabooda zugu. Ro-neeba na n le me b pĩnd zĩisẽ.
Neb na n zĩnda yɩng n wʋm yɩɩla, n wʋm sũ-noog yɩɩla; la yãmba, Zakoob kamba, ad-y y sõora ka na n boog ye. M na n paasa y neba sõore. B kõn saag n le ges yãmb kegr ye, m na n pids-y-la ne waoogr kũuni.
Yãmb nin-yende n na n lebg yãmb naaba; N-ye, yãmb nin-yend n na n yɩ-y naaba! M na n kõ-a-la sore t'a pẽneg maam, tɩ ned ba a ye ka na le saag n koos a yõor ye, n sak n kolg maam tɩ m ka bool-a ye, yaa Soaala-Wẽnd n togs rẽnna.