O haɗi min boo mahugo cuuɗi e remugo lesdi e jubaago gese inabooje e marugo ɗe. O umri min min njooɗo nder cuuɗi laymaaji ngeendam amin fuu, ngam haa min njuutina balɗe amin nder lesdi ndi min koɗata.
Ammaa nde Nabukodonosor, laamiiɗo Baabila hippi lesdi ndi'i, min mbi'i sey min ngara haa Urusaliima, ngam min ndaɗa jama'aaje konu Kaldiya'en e Siriya'en. Ngam maajum min ɗon njooɗi haa Urusaliima jonta.”
Mi tokki nelugo sukaaɓe am annabi'en haa mooɗon, ɓe mbi'a on: Lorte diga laabi mon kalluɗi, mbaɗe ko fotti, taa tokke ɗowanteeɓe woɗɓe, taa njaggane ɓe, ngam haa on njooɗo nder lesdi ndi ndokkumi on, onon e kaakiraaɓe mon. Ammaa on nananaay yam, on kakkilanaay bolle am.
Ngam maajum min Jawmiraawo honooɓe asama, Allah Isra'iila, mi wi'i: Onon yimɓe Yahuuda e jooɗiiɓe nder Urusaliima, mi ukkanan on sarru ngu mbi'mi on fuu. Ngam mi wolwani on, ammaa on nanaay, mi ewni on, ammaa on njaabaaki.”
Nden Yeremiya wolwani Rekabi'en: “Ndaa nii Jawmiraawo honooɓe asama, Allah Isra'iila wi'i: On ɗowtani ko kaaka mon Yonadabu umri on. On njogi umrooje maako fuu, on mbaɗi ko ɗe umri boo.