×

Ika Bible 2018

Jerimaya 37

1
Eze Babilọnụ wụ Nebukadineza tumẹ Zẹdikaya nwa Josaya n'ọ kịma Juda nọkin ẹnya Jekọnaya (wụ Jehoyakini) nwa Jehoyakim.
2
Kẹ eze wụ Zẹdikaya kẹ idibo ẹ kẹ ndị Juda ile, onwọnni onyẹ gi oku Osolobuẹ gi onyẹ-amụma wụ Jerimaya gwa wẹ dọn.
3
Kanị Zẹdikaya wụ eze e zi Jehukalụ nwa Shẹlẹmia lẹ onyẹ nchụn-ẹjan wụ Zẹfanaya nwa Maaseya jẹnni onyẹ-amụma wụ Jerimaya, sị wẹ sị a, “Dodo, rịọ nị ẹnyi Osolobuẹ wụ Chuku ẹnyi.”
4
Wẹ eke kpọkin Jerimaya ye ogẹn hụ. O jẹn ebe ọ chọ n'o jẹn imẹ alị hụ.
5
Ndị-agha Fẹro eze Ijiptu a bangụọ ụzọ wẹ gi lala, ndị-agha Babilọnụ hụn te kehunmẹ Jerusalẹm a nụ a, wẹ nọ gi ufiri wẹ la Jerusalẹm tọ.
6
Osolobuẹ nọ sị Jerimaya ya sị wẹ,
7
“Osolobuẹ, Chuku Izrẹlụ, sị ‘Lee ihiẹn ụnụ sikọ d'e zi eze alị Juda hụn zihẹ ụnụ d'a jụ m ọnụ m: Ndị-agha Fẹro hụn te lala d'e yeni ụnụ ẹka erukọ ebeni, wẹ k'e kin azụụn lakin alị wẹ wụ Ijiptu.
8
Ndị-agha Babilọnụ jẹnkọ d'e kinhẹn. Wẹ k'a lụsọn obodoni agha, mẹri ẹ, kpọ a ọkụn.
9
Osolobuẹ sị ụnụ — atụkwọlẹ ni enwẹn ụnụ ntụ nị ndị Babilọnụ k'a hatu ụnụ ye. Ahatukọkwọ wẹ ụnụ!
10
Ọsụọn'a nị ụnụ e mẹrichanrịn ndị-agha Babilọnụ ile rị a lụsọn ụnụ agha, nke wụnị ọ họdụ ndị wẹ rụ ẹhụ dinẹsọnmẹ imẹ ọdụ wẹ, ndị ahụn rụ ẹhụ jẹnkọ d'e lihi kpọ obodoni ọkụn.’ ”
11
Kẹ ndị-agha Babilọnụ latọgụ Jerusalẹm makẹni ndị-agha Ijiptu lala alala,
12
ya Jerimaya nọ buli, n'ọ gha Jerusalẹm jẹn ẹgbẹrẹ Bẹnjamini d'e sọn ndị nke ẹ keri alị wẹ rị e ke.
13
Kanị, ogẹn o gi chọ n'ọ gha Ọnụ-mgbọn Bẹnjamini pụ, onyẹ-isi ndị-nche Jerusalẹm nọ kwọndọn ẹ. Ẹfan okẹnnyẹ hụ wụ Irija nwa Shẹlẹmia nwa Hanania. Ọ sị Jerimaya, “Ọsọ k'ị gbakọ; ị gbaburukọ ndị Babilọnụ!”
14
Jerimaya nọ sị a, “Ntụkwọ! Ẹlẹ m gbaburukọ ndị Babilọnụ!” Kanị Irija egọnn'ẹ ntịn, ọ nwụnrụn Jerimaya jẹnni ndị-isi.
15
Ndị-isi hụ nọ gi olulu sọn Jerimaya — e gbu w'ẹ mkpịnsịn, kpọkin ẹ ye ebe wẹ gi họnrin ụlọ-ngan iwe akanwe wụ Jonatanị.
16
Ngan wẹ gu alị nọkẹ ọmị kẹ wẹ kpọkin Jerimaya ye. Ọ nọbie imẹ ngan ahụn a nọbie.
17
Eze wụ Zẹdikaya nọ sị wẹ wẹhẹ Jerimaya imẹ obi-eze. Ọ nọ we ẹ shi ụsụọ, jụ a, “O nwọnghọ ihiẹn Osolobuẹ ku?” Jerimaya nọ sị a, “O nwọnghọ. Ọ sị wẹ k'e we i che ẹka eze Babilọnụ.”
18
Jerimaya nọzị sị Zẹdikaya, “Elee njọ kẹ m mẹ ịyụ mọbụ idibo i mọbụ ndị Juda ụnụ gi kpọkin m ye?
19
Elebe kẹ ndị-amụma ụnụ nwẹn rị nwan — ndị nwẹn sị ị nị eze Babilọnụ abịakọ d'a lụsọn yụ mọbụ alịnị agha?
20
Dodo nwan, eze nwọnni m, gọn m ntịn mẹni m ihiẹn m k'a rịọ ị: ewekinlẹ m ngan rị iwe akanwe wụ Jonatanị — makẹ m gha a nwụntọ ebẹhụ.”
21
Ya kẹ eze wụ Zẹdikaya nọ sị wẹ bu Jerimaya che ezi-ọgwa ndị-nche, sị wẹ a gha ọdụ ndị brẹdi e wẹhẹn'ẹ ogbe brẹdi ohu ụhụọhịn-ụhụọhịn, d'e ru mgbe brẹdi gụchanrịn imẹ Jerusalẹm. Ezi-ọgwa ndị-nche hụ kẹ Jerimaya nọdịsọnmẹ.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes