Dĩm a Sedesiyas tʋma a Yukal, a Selemiya biiga, la maan-kʋʋd a Sefaniya, a Maaseya biiga, bãngd a Zeremi nengẽ. A tʋm-b lame tɩ b tɩ yeel-a: «D kotame tɩ f pʋʋs Soaala, tõnd Wẽnnaam, d yĩnga.»
Ad Soaala, a Israyɛl Wẽnnaama koɛɛga: «Tɩ yeel-y Zɩɩda dĩma sẽn tʋm yãmb tɩ y wa sok maama; tɩ leok yã tɩ Ezipt naaba tãb-biisa sẽn da wat y sõngrã lɛɛg n lebda b tẽngẽ.
Ad-y y sã n wa tẽed tɩ y tõog n diga Kalde rãmba sẽn zabd ne yãmbã, n tẽed tɩ sẽn kell-bã yaa neb sẽn gãe b sẽgdẽ ne sãmpoaga, bãng-y tɩ bãmb n na n yik n wa sãam tẽn-kãnga n yõog-a bugum. Ba yãmb sã n da tõog n digẽ-la Kalde rãmba tãb-biisi, sẽn zabd ne yãmbã, ba sã n da keesẽ-la sẽn paam-b sãmpoag n be b rotẽ, b na mao n yik n yõog tẽnga bugum.»
A sẽn waa n tũud a Bẽnzame dignoor n na n yi la ned a yembre, gũudba naaba, sẽn gãd-a. Yɩ-la a Iriya, a Selemiya biiga la a Ananiya yagenga. A Iriya sẽn gãd a Zeremi, a yeel-a lame: «Fo zoet n na n tɩ koosa tõnd ne Babilon dãmba!»
tɩ dĩm a Sedesiyas wa tʋm ned tɩ b bool-a t'a wa, t'a soos n sok-a, a na-zakẽ. A sẽn taa, dĩma sok-a-la woto: «Fo tara Soaala-Wẽnd koɛɛg m yĩng bɩ?» T'a Zeremi leoke tɩ koɛɛg kõn kong ye: «Fo na n lʋɩɩ Babilon naab nugẽ!»
Dẽ la dĩm a Sedesiyas kõ noore tɩ b ning a Zeremi gũudba zakẽ la b kõt-a bur gilga; bura ra koosda Bur-wẽedba sora zugu. Bura sẽn da tõe n paam tẽnga pʋgẽ daar fãa, a Zeremi me ra paamda a rẽnna. Tũu boto t'a Zeremi kell n pa gũudba zakẽ.