Yawɛ ni yɛli shɛm m-bɔŋɔ: “Bɛn be tiŋ’ ŋɔ puuni, tɔbu mini kum ni alɔbo ni ti ku ba, amaa bɛn ti zaŋ bɛmaŋ’ niŋ Babilɔnnim’ maa nuu ni, bɛn’ ni be. Bɛ ni ti leei bɛ ni ŋme tɔbu di shɛba ka be.”
Di saha ka kpambaliba daa yɛli naa, “Doo ŋɔ simdila kubu, o ni tɔɣisiri yɛtɔɣ’ shɛŋa n-chɔɣisiri tɔbbi’ shɛb’ bɛn kpalim tiŋ’ ŋɔ ni mini niriba zaa kɔba ni maa zuɣu. Dama doo ŋɔ bi bɔri niriba maa zaɣ’ viɛlli, bɛ zaɣ’ biɛɣu ka o naɣ’ bɔra.”
Dinzuɣu ka bɛ daa zaŋ Jɛrimia nti niŋ nabia Malikia kɔbiliga din daa be yiliguliba dundɔŋ ni la puuni. Bɛ daa zaŋla gabisi niŋ Jɛrimia n-zaŋ o siɣisi kɔbiliga maa puuni. Kom daa ka kɔbiliga maa ni, amaa baɣiri kɔŋko n-daa be di puuni, ka Jɛrimia daa firi baɣiri maa ni.
Ka Ɛbɛdimɛlɛk ŋun daa nyɛ Itiɔpia nira, ka nyɛ namɔɣili be nayil’ la daa wum ni bɛ zaŋ Jɛrimia ti niŋ kɔbiliga maa puuni. Ka di daa niŋ daliri ka naa ʒi Bɛnjamin dunɔdal’ la gbini.
“N dan’ naa, niriba maa ni niŋ shɛlikam zaŋ chaŋ anab’ Jɛrimia polo maa nyɛla zaɣ’ biɛɣu. Bɛ zaŋ’ o niŋla kɔbiliga ni ni kum ku o, dama bindirigu lan ka tiŋ’ ŋɔ ni.”
Di saha ka naa daa bahi Ɛbɛdimɛlɛk ŋun daa nyɛ Itiɔpia nir’ maa noli yɛli “Zaŋmi niriba ata kpe m-pah’ amaŋ’ zuɣu chaŋ ti yihi anabi Jɛrimia kɔbiliga maa ni ka o ku kpi.”
Dinzuɣu ka Ɛbɛdimɛlɛk daa zaŋ niriba maa pah’ omaŋ’ zuɣu ka bɛ chaŋ nayili nɛma duu nti zaŋ situr’ chɛra n-zaŋ gabisi lo li n-zaŋ li ti Jɛrimia kɔbiliga maa ni ha.
Ka Naa Zɛdɛkia daa tim ti boli Jɛrimia ka o kana Yawɛ jɛmbu duu dunoli din pahir’ ata la gbini. Ka naa daa yɛli Jɛrimia, “N yɛn bɔh’ a la yɛtɔɣ’ shɛli, a mi di sɔɣi ma shɛli.”
Dinzuɣu ka Naa Zɛdɛkia daa po pɔri ashilɔni Jɛrimia sani yɛli, “Hal ka Yawɛ ŋun be ka nyɛ ŋun tiri ti nyɛvili ŋɔ zuɣu, n ku ku a, m mi ku zaŋ a niŋ bɛn bɔri ni bɛ ku a maa nuu ni.”
Di saha ka Jɛrimia daa yɛli Zɛdɛkia, “Yawɛ ŋun nyɛ Tɔbbihi Naa, ka nyɛ Izraɛlnim’ Naawuni ŋɔ ni yɛli shɛm m-bɔŋɔ: A yi zaŋ amaŋ’ ti Babilɔn naa kpambaliba, dindina a ni tiligi, ka bɛ ku nyo tiŋ’ ŋɔ buɣim, ka a mini a yiŋnim’ ku kpi.
Amaa a yi bi zaŋ amaŋ’ ti Babilɔn naa kpambaliba maa, dindina bɛ ni zaŋ tiŋ’ ŋɔ niŋ Babilɔnnim’ maa nuu ni, ka bɛ nyo li buɣim, ka a ku tooi zo n-yi bɛ nuu ni.”
Bɛ zaŋ paɣ’ shɛb’ zaa bɛn kpalim Juda nayil’ la chaŋ ti ti Babilɔn naa kpambaliba ka bɛ yɛra, A ni daa niŋ a zo shɛb’ naani la n-yɔhim’ a nyaŋ a maa. Pumpɔŋɔ a naba firi baɣiri ni, ka bɛ zo ka chɛ a.”
Bɛ ni zaŋ a paɣiba zaa min’ a bidibisi yi nti ti Babilɔnnima, ka amaŋmaŋ’ ku tiligi bɛ nuu ni. Amaa Babilɔn naa ni chɛ ka bɛ gbaag’ a, ka nyo tiŋ’ ŋɔ buɣim.
Kpambaliba yi wum ni n tɔɣis’ a yɛtɔɣa, ka kana ti yɛl’ a, ‘Kul yɛlim’ ti a ni yɛli naa shɛm, di sɔɣi ti shɛli, di yi pa lala ti ni ku a. Wula ka naa lee yɛl’ a?’
Ka kpambaliba maa zaa daa ka Jɛrimia sanna nti bɔh’ o; ka o garigi yɛli ba kaman naa ni daa wuh’ o shɛm maa. Ka bɛ daa chɛ ka bi lan bɔh’ o shɛli, dama bɛ daa bi wum bɛ daalizama maa.