×

Ika Bible 2018

Jerimaya 38

1
Shẹfatịa nwa Matanị, Gẹdalia nwa Pashuru, Jehukalụ nwa Shẹlẹmia lẹ Pashuru nwa Mal'kija nụ ihiẹn Jerimaya rị a gwa ndị alị, a sị,
2
“Osolobuẹ sị, ‘Onyẹ nọdị imẹ obodoni ọpịa-agha mọbụ ẹgụn mọbụ eje-emu e gbu ẹ. Kanị, onyẹ hụn fetuni we enwẹn ẹ ye ndị Babilọnụ k'a rị ndụn; o k'a hụn isi wanahịn; ọ nwụnkọ.’
3
A nụgụọzị wẹ kẹ Jerimaya rị e ku nị Osolobuẹ sị, ‘Wẹ k'e burịrị obodoni che ndị-agha eze Babilọnụ ẹka, e mẹri w'ẹ weri.’ ”
4
Ya ndị-isi hụ nọ sị eze, “Okẹnnyẹni furu w'e gbu. Ọ rị e gi ihiẹn ndị ahụn ọ rị e ku e mẹ ndụn a gụ ndị-agha ẹnyi họdụ imẹ obodoni lẹ ndị mmaka họdụnị. Ẹlẹkwọ ọrịrịmma ndịnị kẹ okẹnnyẹni rị a chọ, eje-ihiẹn k'ọ rị e mẹkwọ wẹ.”
5
Eze wụ Zẹdikaya nọ sị wẹ, “Mẹ n'ẹ ihiẹn ụnụ chọ nị ụnụ mẹ ẹ. Mmẹ nwẹn wụ eze as'ẹka gbọndọn ụnụ.”
6
Ya ndị-isi hụ nọ weri Jerimaya, bu ẹ che ọmị Mal'kija nwa eze. Ọmịnị rị ezi-ọgwa ndị-nche. Mirin arị imẹ ẹ ogẹn ahụn, ịkpọtọ sụọ rị a, egi wẹ eriri dọ Jerimaya ye imẹ ẹ, ọ nọ ruban imẹ ịkpọtọ hụ.
7
Ogẹn Ẹbẹdi-Mẹlẹkị onyẹ Ẹtiopịa hụn gi ọkwa imẹ obi-eze gi nụ nị wẹ bu Jerimaya che ọmị, eze rị Ọnụ-mgbọn Bẹnjamini,
8
Ẹbẹdi-Mẹlẹkị nọ gha obi-eze jẹnburu eze ebẹhụ ọ rị, sị a,
9
“Eze nwọnni m! Ẹfọ a jọka ikẹnnyẹ ndịnị mẹ Jerimaya onyẹ-amụma ihiẹnni ile wẹ mẹ ẹ. A tụgụọ w'a ye imẹ ọmị. Ẹgụn k'e gbu ẹ tọ ebẹhụ, makẹni ihiẹn-oriri arịzị obodoni.”
10
Ya eze nọ sị Ẹbẹdi-Mẹlẹkị, “Kịrị ikẹnnyẹ iri kwasị ọgụn ebeni d'a dọpụha onyẹ-amụma wụ Jerimaya imẹ ọmị hụ, o gini d'a nwụn.”
11
Ẹbẹdi-Mẹlẹkị nọ weri ikẹnnyẹ ndị ahụn, we wẹ shi mmughẹ rị okpuru ebe wẹ e dọnmẹ ihiẹn imẹ obi-eze. Ọ nọ kịrị ẹkwa-akan lẹ nkanka ẹkwa ebẹhụ, gi eriri we wẹ ye Jerimaya imẹ ọmị hụ.
12
Ọ nọ hị Jerimaya, sị a, “We ẹkwa-akan ndịnị lẹ ndịnị fagụnị che ẹbụn makẹ eriri gha a rụ ị ẹhụ.” Jerimaya nọ mẹ ihiẹn ọ sị a mẹ.
13
Ya wẹ nọ gi eriri dọpụha Jerimaya imẹ ọmị hụ. Jerimaya nọ nọdị ebahụn wẹ dọnmẹ ẹ imẹ ezi-ọgwa ndị-nche.
14
O mẹgụ, eze wụ Zẹdikaya nọ zi wẹ, wẹ nọ wẹhẹ Jerimaya d'a hụn a ọnụmụzọ nke ẹtọ rị Ụlọ-nsọ Osolobuẹ. Eze nọ sị Jerimaya, “O nwọn ihiẹn m chọ nị m jụ ị. Ezuemẹkwọlẹni m ihiẹn ọwụlẹ.”
15
Ya Jerimaya nọ sị Zẹdikaya, “M gwa ị ezioku, y'e gbukọ m? M dụndẹ i ọdụn, y'e gikọ a dọn.”
16
Eze wụ Zẹdikaya nọ nwan kwe Jerimaya nkwa ebẹhụ wẹ ẹbụbụọ sụọ rị, sị “Ma Osolobuẹ hụn ye ẹnyi ndụnnị, egbukọ m'ị! Ewekọ m'ị ye ndị ahụn chọkọ ị ogbugbu!”
17
Ya Jerimaya nọ sị Zẹdikaya, “Lee ihiẹn Osolobuẹ ihiẹn ile rị okpuru ẹ hụn wụ Chuku Izrẹlụ ku: ọ sị, ‘Ị pụhụ d'e we enwẹn i ye ndị-isi agha eze Babilọnụ, y'a hụn isi; adụnkọ wẹ obodoni ọkụn; yụ lẹ ikpụlọ ị a rị ndụn.
18
Kanị, omẹni y'e weni enwẹn i ye ndị-isi agha eze Babilọnụ, obodoni jẹnkọ d'a ban ndị Babilọnụ ẹka, a kpọ w'a ọkụn ru alị; kẹ yụ lẹ enwẹn i awanahịnkọdẹ wẹ.’ ”
19
Eze wụ Zẹdikaya nọ sị Jerimaya, “M rị a tụ egun ndị Juda ẹnyi hụn fetugụ d'e we enwẹn wẹ ye ndị Babilọnụ, makẹni ndị Babilọnụ we m tan che wẹ ẹka, e ye wẹ m ụya ri.”
20
Jerimaya nọ sị a, “Ewekọ wẹ i ye wẹ. Dodo gọn ntịn ihiẹn Osolobuẹ ku, hụn m rị a gwa ị. Mẹ ẹ kẹni ọ rịn'ị mma, y'a hụn isi.
21
Kanị, omẹni y'e kweni we enwẹn i ye wẹ, Osolobuẹ a ghọsịgụọ m ihiẹn jẹnkọ d'e mẹni. Lee ihiẹn m hụn:
22
Wẹ k'e duru ikpoho ile họdụ obi-eze Juda dupụhanị ndị isi-agha eze ndị Babilọnụ. Ikpoho ahụn k'a mụ ị ẹmụ, a sị, ‘Ndị ọwụ ị nwẹn i gi dọn ẹnya e dufiegụọ ị, mẹri i! Ụkụ ị a tọgụọ nwan imẹ ẹpẹtẹ; ndị ọwụ ị a gbagụọ ị tọ!’
23
“Wẹ k'e duru inyẹnmẹ i ile lẹ ụmụ ị ile jẹnni ndị Babilọnụ, ịyụ lẹ enwẹn i awanahịnkọ wẹ! Eze ndị Babilọnụ k'a nwụndọn i; wẹ k'a kpọ obodoni ọkụn.”
24
Ya kẹ eze wụ Zẹdikaya nọ sị Jerimaya, “Anịkwọlẹ onyẹ ọwụlẹ marịn ihiẹn mmẹ lẹ ịyụ ku. I mẹ wẹ marịn, y'a nwụn!
25
Ndị-isi sikọ d'a nụ nị mmẹ lẹ yụ gba ku. Wẹ k'a bịa d'a sị ị, ‘Gwa ẹnyi ihiẹn ị gwa eze. Gwachanrịnkwọ ẹnyi ihiẹn ile, amamgbe ẹnyi e gbu i.’
26
Sị wẹ, ‘M rị a rịọ eze y'e zikinlẹ m imẹ ngan ahụn rị iwe Jonatanị; amamgbe m'a nwụntọ ebẹhụ.’ ”
27
Ndị-isi ile a bịaghọ d'a jụ Jerimaya. Ọ nọ zachanrịn wẹ ihiẹn eze sị a za wẹ. Onwọnzini ihiẹn wẹ sị a, makẹni onwọnni onyẹ nụ ihiẹn ya lẹ eze ku.
28
Jerimaya nọ nọdị ezi-ọgwa ndị-nche ebẹhụ — d'e ru ụhụọhịn ndị Babilọnụ weri Jerusalẹm.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes