Ad-y a Sefatiya, a Matã biiga, a Gedaliya, a Pasewur biiga, a Yukal, a Selemiya biiga, la a Pasewur, a Malkiya biiga, ad-y b wʋma goama a Zeremi sẽn da togsd neb niyns fãa sẽn da pɩʋʋgd-b gũudba zakẽ:
«Ad-y Soaala-Wẽnd gomda woto: ‹Ned ninga fãa sẽn na n paa tẽn-kãnga pʋgẽ, sʋʋg n na n kʋ-a, ka rẽ bɩ kom, bɩ bã-longdem; la ned ninga sẽn na n yi-a tẽn-kãnga n tɩ kẽ Kalde rãmba, yẽ soab na n vɩɩndame, vɩɩm n na n yɩɩ yẽ pʋɩɩre.› »
B sẽn wʋm woto a Zeremi noorẽ, tãnsoaben-dãmba yeela a Sedesiyas: «Tõnd datame tɩ b kʋ a Zeremi, t'a sẽn gomd woto wã a woogda tãb-biisa raoodo, sẽn pa-b tẽnga pʋgẽ wã raoodo. A ka baood n na n yols neb pɛt ye, b nimbãanega la a baood n na n paase.»
Tãnsoaben-dãmb a naasa kɩtame tɩ b yõk a Zeremi n tɩ bas-a a Malkiya ko-baoora pʋga; a Malkiya yaa gũudba naab a ye. Ko-baoora ra bee gũudba zakẽ. B bao wĩiri n loe a Zeremi n sik-a be. Koom da ka leb n be ko-baoorẽ wã ye, a da pida ne begd bala; a Zeremi da suta begdã.
«M naaba, nin-bãmba sẽn maan bãngda a Zeremi bũmb ningã ka neer ye, b ning-a-la ko-baoorẽ, a na n kii kom beene, tɩ bala bur ka leb n yãet tẽnga pʋgẽ ye»
A Ebed-Melɛk sɩd baoo neba wala dĩma sẽn kõ noorã; a kẽnga na-yiri n kẽ teeda bĩngr roogẽ n wʋk kʋds rãmba, n dɩk wĩ n loe kʋds rãmba, n sik ko-baoorẽ wã a Zeremi yĩnga.
Dĩm a Sedesiyas tʋmame tɩ b tɩ bool bãngd a Zeremi t'a wa sake. Dĩma da bee Soaala rooga dignoor a tãab soaba. Dĩma yeela a Zeremi: «M na n soka bũmb a yembre, la togs m sɩda, da solg-m bũmb ye!»
Tɩ dĩma na n soos n kãab a Zeremi woto: «M wẽend ne Wẽnd ninga sẽn vɩ la sẽn kõt vɩɩma, m wẽend tɩ m ka na n kɩt tɩ b kʋ-f ye, la m ka na n ning foo neb niyns sẽn dat-b n kʋ fooma nugẽ ye.»
Dẽ la a Zeremi yeel a Sedesiyas: Ad dũni fãa Soaala, a Israyɛl Wẽnnaama koɛɛga: «Fo sã n yi n tɩ kẽ Babilon dĩma, fo na n põsa kũum, foo ne f zaka, la b ka na n yõog tẽn kãnga bugum ye.
Pagb niyns fãa sẽn na n pa-b na-zakẽ wã, b na n tall-b lame n tɩ kɩs Babilon dĩma tãnsoaben-dãmba. Fo pagba mens n na n pʋd yɩɩl kãnga n la-foo: Ges belgr ninga f zo-rãmba sẽn belg foo. Yella sẽn pak fooma b ka bas-f tɩ f lʋɩ sɩda?
N-yẽe! Yaa sɩda, f pagba fãa ne f kamba, b na n tall-b lame n tɩ kɩs Kalde rãmba. La fo ka na n põs-b ye, b na n suii foom bi-bees roogẽ. Sã n ya tẽn-kãnga, b na n yõog-a-la bugum!»
Tãnsoaben-dãmba kãsem-dãmba na n bãngame tɩ tõnd sõsa ne taaba. Ad-b na n wa sok-f lame n bãng d sẽn gom bũmb ningã. B na n tol n kãab-f lame tɩ bũmb kõn maan-fo, fo sã n ka solg-b bũmb ye.
Tãnsoaben-dãmba kãsem-dãmba sɩd waa a Zeremi nengẽ n sok-a. La a Zeremi leoka wala dĩma sẽn da yeel yẽ t'a leok bũmb ningã. B sẽn wʋm woto, b bas-a-la ne laafi, la b ka bãng dĩma ne a Zeremi sõasgã sẽn yɩ a soab ye.