Sefatya morwa wa Mathane, le Gedalia morwa wa Phashuri, le Jukale morwa wa Selemia, le Phashuri morwa wa Malakia, ba kwa ditaba tše Jeremia a di boditšego setšhaba ka moka, mola a re:
Morena o re: E a tlogo šala motseng wo o tlo hwa ka lerumo le ka tlala le ka dinkhu. E a lobago Bakaladea o tlo phela; o tlo phonyokga a ithopetše bophelo bja gagwe.
Matona ao a bolela le kgoši a re: A monna eo a bolawe, ka gobane ka mokgwa o bjalo o hlephiša matsogo a banna ba bahlabani ba ba šetšego motseng wo. O hlephiša matsogo a batho ka moka, ka go bolela le batho ka mokgwa woo. Ga a nyake tša go agiša batho; o ba nyakela bošula.
Ke moka ba swara Jeremia ba mo lokela moleteng wa ga mokgomana Malakia, o bego o le lapeng la kgolego, ba mo fološa ka manti. Moleteng go be go se meetse, go le leraga; mme Jeremia a totobela lerageng.
Kgoši mong wa ka! Banna bao, ka tšohle tše ba di dirilego moporofeta Jeremia, ba šaeditše; ge ba mo lahletše moleteng, o tlo hwela moo ka tlala; gobane motseng ga go sa ne bogobe.
Ebede-Meleke a ya ngwakong wa kgoši a na le banna bao, a tsena phapošing ya ka tlase ga ntlo ya matlotlo, a tšea dikobo tše di onetšego tša mankgeretla, a ya a di fološetša moleteng go Jeremia ka manti.
Kgoši Tsedekia a roma mohlanka a bitša moporofeta Jeremia, a tla kgorong ya boraro ya Ngwako wa Morena. Kgoši ya bolela le Jeremia ya re: Ke go botšiša taba; o se ke wa mphihlela selo.
Kgoši Tsedekia a enela Jeremia thopeng a re: Ka bophelo bja Morena e a re filego bophelo bjo, ge nka go bolaya, ge nka go gafela matsogong a banna bao ba ratago go go bolaya, e tlo ba e se nna.
Ke mo Jeremia a boditšego Tsedekia taba ye, a re: Morena Modimo wa mašaba Modimo wa Isiraele, o re: Ge o ka loba ditona tša kgoši ya Babele, gona o tlo phela le ba leloko la gago.
Fela, Ge o sa lobe ditona tša kgoši ya Babele, gona motse wo o tlo wela diatleng tša Bakaladea, mme ba tlo o tšhuma ka mollo; le wena o ka se ke wa ba phonyokga.
Ke gona basadi ba gago ka moka ba ba šetšego ngwakong wa kgoši, ba tlogo ntšhetšwa ditona tša kgoši ya Babele, mme ba tlo lla ba re: Ba go forile, ba go kgonne, banna ba o bego o lakane nabo; ba go lahletša o totobetše, maoto a le lerageng.
Basadi ba gago ka moka, le bana ba gago, ba tlo ntšhiwa ba išwa go Bakaladea; le wena o ka se ke wa phonyokga. O tlo swarwa ke kgoši ya Babele; mme motse wo o tlo tšhungwa ka mollo.
Ge ditona di ka kwa gobane ke boletše le wene, mme ba tla go wene ba re: Re botše tše o di boditšego kgoši, o se ke wa re fihlela selo, gona re ka se ke ra go bolaya; re botše le tše kgoši a go boditšego tšona;
Ka kgonthe ba tla, ditona ka moka tša botšiša Jeremia; mme yena a fetola ka mo kgoši e mo laetšego ka gona; mme ba mo tlogela, gobane taba ye e be e sešo ya kwala.
Jeremia, gona moo lapeng la kgolego o dutše gona, gwa ba gwa tla letšatši le motse wa Jerusalema o thopilwego ka lona. O be a sa le moo, ge motse wa Jerusalema o thopša.