1
Ẹnịna kẹ ndị Babilọnụ dọn mẹri Jerusalẹm weri ẹ: Ifọn nke iri imẹ ahụa nke itenẹi eze wụ Zẹdikaya kịma Juda, Nebukadineza eze Babilọnụ nọ kịha ndị-agha a ile d'e kehunmẹ Jerusalẹm,
2
d'e ru ahụa nke mmanaị eze wụ Zẹdikaya kịma. Nke akpọhịn itenẹi imẹ ifọn nke ẹnọ, wẹ nọ s'ẹka tikpọ mgbọn Jerusalẹm, banhan.
3
Ya kẹ ndị-isi ile eze Babilọnụ zihẹ nọ banhan, weri ọnọdị ẹhụ Ọnụ-mgbọn-Etintinnaị — kẹ Nẹgalụ-Shareza onyẹ Samga kẹ Nẹbo-Sasẹkim hụn rị ndị-isi agha kanị kẹ Nẹgalụ-Shareza hụn rị ndị-isi ọkịkị kẹ ndị-isi ọzọ ile.
4
Mgbe eze Juda wụ Zẹdikaya lẹ ndị-agha Juda ile gi hụn wẹ, Zẹdikaya wẹ nọ gba ọsọ; gi imẹ uhinhin gha imẹ obodo hụ pụ. Ugbo-ezumikẹn eze kẹ wẹ gha pụ, ghashi ọnụ-mgbọn hụ rị ẹgbata ọgbara-ẹjan ẹbụọ. Ya wẹ nọ dọn ihun Ọdanmgbugbu Iyi Jọdanị.
5
Kanị ndị-agha Babilọnụ nọ chụ wẹ, kunrun Zẹdikaya imẹ alị-aradan Jẹriko. Wẹ nọ nwụndọn ẹ, we ẹ jẹnni Nebukadineza wụ eze Babilọnụ ebe ọ rị Ribla imẹ alị Hamatị, Nebukadineza nọ nọ ebẹhụ ma a ikpe.
6
Imẹ Ribla ebahụn, eze Babilọnụ nọ nọ idẹnya Zẹdikaya gbuchanrịn ikẹnnyẹ ile Zẹdikaya mụ, gbuzikwọ ndị ile alị Juda rị ẹka.
7
Ọ nọ gụpụ Zẹdikaya akpẹnya ẹbụbụọ, kpọma a ẹgan igwe-bronzu, wẹ ẹ shi Babilọnụ.
8
Ya ndị Babilọnụ nọ dụn Jerusalẹm ọkụn — kẹ obi-eze kẹ ụlọ ndị Jerusalẹm, kụtu mgbọn Jerusalẹm.
9
Nebuzaradanị hụn kị ndị-agha e che eze Babilọnụ nche nọ kpụnrụn ndị họdụ imẹ obodo Jerusalẹm shi Babilọnụ, wẹ lẹ ndị we enwẹn wẹ ye ẹ kẹ ndị Babilọnụ kelẹni banye imẹ Jerusalẹm lẹ ndị ọzọ ile.
10
Kanị, ọ nọ latọ ụfọdụ ndị igbẹnnyẹ imẹ Juda, ndị hụn nwọnlẹni ihiẹn ọwụlẹ; ọ nọ yesọnmẹ wẹ alị vaịnị lẹ ugbo.
11
Nebukadineza wụ eze ndị Babilọnụ a gwagụọlẹ Nebuzaradanị hụn wụ onyẹ-isi ndị-agha e che ẹ nche ẹka w'e gi sọn Jerimaya. Ọ sị a,
12
“Weri Jerimaya; lepụ a ẹnya. Emẹkwọl'a ihiẹn ọwụlẹ, ka mẹn'ẹ ihiẹn ọwụlẹ ọ sị ị mẹn'ẹ.”
13
Ya kẹ Nebuzaradanị onyẹ-isi ndị-agha e che eze Babilọnụ nche lẹ Nebushazịbanị hụn rị ndị isi-agha lẹ Nẹgalụ-Shareza hụn rịzị ndị-isi lẹ ndị-isi ile eze Babilọnụ zihẹ nọ zi ozi,
14
ndị wẹ zi nọ jẹn ezi-ọgwa ndị nche d'e wẹhẹ Jerimaya. Wẹ nọ we ẹ che ẹka Gẹdalia nwa Ahikam nwa Shafanị sị a we ẹ la iwe ẹ; ya Jerimaya nọ sọn ndị họdụ alị Juda nọdị.
15
Ogẹn hụ wẹ gi kpọkin Jerimaya ye imẹ ezi-ọgwa ndị-nche, Osolobuẹ sị a,
16
“Jẹn d'a gwa Ẹbẹdi-Mẹlẹkị onyẹ Ẹtiopịa nị mmẹ wụ Osolobuẹ ihiẹn ile rị okpuru ẹ, hụn wụ Chuku Izrẹlụ, sị, ‘M'e d'e mẹ obodoni ihiẹn m sị nị m k'e mẹ ẹ. Eje-ihiẹn kẹ m k'e mẹ ẹ — ẹlẹ ihiẹn rị mma. O ru ogẹn hụ, idẹnya ị k'o jẹnkọ d'a nọ mẹ.
17
Kanị, mmẹ wụ Osolobuẹ rị e ku ẹ nị m jẹnkọ d'a gbapụha ị ụhụọhịn ahụn! Ewekọ wẹ i ye ndị ị rị a tụ egun wẹ.
18
Ẹghẹẹ, m k'a zụọpụha ị, aghanị erikọ ị isi; kama ị k'a hụn isi wanahịn, makẹni i gi m dọn ẹnya. Ya kẹ Osolobuẹ ku.’ ”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc