A Nabikodonozor tãnsoaben-dãmba kẽe tẽngã la b wẽ-la b sika n pẽneg Sʋk dignoorã. Yɩ-la a Nergal-Sarezɛr, b na-kãsengã, n paas a Samgar-Nebo, a Sar-Sekim, dĩma yam sẽn da kẽ a soab n yɩɩdã la tãnsoaben-dãmba fãa.
Zɩɩda dĩm, a Sedesiyas, ne a tãb-biisa fãa sẽn yãend-ba, b zoeeme n tũ dĩma zẽedã n yi tẽngã ne yʋngo; noor n da be lals a yiib sẽn ya bɛd sʋka la be la b tũ n yi n dɩk Zʋrdẽ bãg-faaga.
Kalde rãmba tãb-biis pʋg-b lame, la b tɩ paama a Sedesiyas Zeriko sẽnẽ. B sẽn paam-a n yõke, b tall-a lame n kẽng Ribla, Amat tẽnga, Babilon dĩm a Nabikodonozor nengẽ. A Nabikodonozor kẽes-a-la bʋʋdo, n paalg-a.
Gũudba tãnsoabã, a Nebuzaradã, talla neb niynsi sẽn da ket tẽngã n kẽng Babilon, n paas neb niynsi sẽn zoe-b n wa kẽ yẽ, la tʋʋm mitbã, a tall-b-la fãa n loog Babilon.
Sã n ya a Nebuzaradã, gũudba tãnsoaba, yẽ basa Zɩɩda neb niynsi sẽn da ya-b naong rãmba n ka tar bũmbu; dẽ pʋgẽ me, a pʋɩɩ-b-la bugsuntund pʋto, n paas pʋt a taaba.
Yaa rẽ yĩnga la gũudba tãnsoaba, a Nebuzaradã, yẽs ne a Nebusazbã, dĩma sẽn da lakd a sũur zãng n wilgd a soabã, n yẽs ne a Nergal-Sarezɛr, tãnsoaben-dãmba kãsma, n paas Babilon dĩma tãnsoaben-dãmb a taaba,
tɩ b tɩ yiis a Zeremi gũudba zakẽ n tɩ kɩs a Gedaliya, a Ayikam biiga la a Safã yagenga. A Gedaliya ra kõt-a-la sore t'a lebd a zakẽ. Dẽ la a Zeremi tõog n paad ne tẽnga rãmba.
«Kẽng n tɩ yeel a Ebed-Melɛk, Kus raoa tɩ dũni fãa Soaala, a Israyɛl Wẽnda, gomda woto: ‹Ade, mam sẽn da kãab tɩ m na maana tẽn-kãnga bũmb ninga na n taasame, ka na n yɩ b sũ-noog yĩng ye, na n yɩɩ b sũ-sãang yĩnga. M na n taasa kãab-beedã la ka na n le kaoos ye.
N-yẽe! Sɩd menga, mam na n kɩtame tɩ fo põse: b ka na n kʋ foom ne sʋʋg ye, vɩɩm n na n yi fo pʋɩɩre, tɩ bala fo pelga f pʋg ne maam. Soaala n yeele.› »