×

Biblia Ande Chib Romani 2018

Jeremiah 39

1
Ando burs iniato, ando chon desto kai charoila o Sedekias ando Juda, avilo o Nabukodonosor charo katar e Babilonia, sa pe boñikonenchar po Jerusalem ta thodepe truial katar o foro.
2
Ta ando burs desuiekto, ando chon starto, cherde iek putardipe po zido e foroko.
3
Ta die sa e sudura katar o charo katar e Babilonia ta inzarde pe chare angla o udar kai si po maskaral von sea: O Nergal Sarezer, o Samgar Nebo, o Sarsekim kai saia baro sudo, o Nergal Sarezer kai saia aver baro sudo, ta sa ogola sudura kai radina e charoke katar e Babilonia.
4
Ta kana dikhla len o charo o Sedekias ta leke boñikura, nasle ta lleletar katar o foro orachaia katar o drom kai nakhel katar o vostano e charoko, katar o udar po maskaral katar e dui zidura. Ta o charo likisto katar o drom e Arabako.
5
A e boñikura katar e kaldeura llele pala lende ta resle e Sedekiase ande bare umalia katar o Jeriko. Istarde le ta inllarde le ando Ribla kai si ande phuv katar o Jamat, jote saia o Nabukodonosor charo katar e Babilonia, ta chinda leke kris.
6
Ta o charo katar e Babilonia chinda e korr katar e chave e Sedekiaseke isto angla le ando Ribla, ta i chinda e korr katar e glamne llene katar o Juda.
7
Ta ikanda e akha katar o charo Sedekias ta phangla le pe lanchura te inllaren le ande Babilonia.
8
Ta e kaldeura phabarde o cher e charoko ta e chera e foroke ta perade e zidura katar o Jerusalem.
9
Ta o Nebuzaradan inllarda phangle e llenen kai achile ando foro ta golen kai lleleatar pe lengi rig, ta sa e foro kai achilo ta inllarda len ande Babilonia.
10
A o Nebuzaradan gazda katar e boñikura cherda te achen ando Juda e chorre katar o foro kai ni saia len niso ta dia len umalia drakhenge ta phuvia.
11
Ta o Nabukodonosor phenda so te cherel o Nebuzaradan gazda e boñikonengo, ta phenda gia cheres o Jeremias:
12
Istar le ta arak le ta na cher leke nisavo bilachipe ta cher sa so ka phenel chuke.
13
Ondaka o Nebuzaradan ta o Nebusazban ta o Nergal Sareser, kai sea e mai bare sudura e charoke, ta sa ogola sudura katar o charo e Babiloniako
14
phende te ikanen e Jeremiase katar e bar katar e rubie ta die le kai o Gedalias chavo katar o Ajikam ta unuko katar o Safan, te inllarel le kai leko cher ta zivisarda ando foro.
15
Kana o Jeremias saia phanglo ande bar katar e rubie, o Del diaia lea orba ta phendaia leke:
16
Lla kai o etiope o Ebed Melek ta phen leke: Gia phenda o Del kai si le sa e zor, o Del katar o Israel: Me anav me alava pe gava foro e bilachimake, ta a e lachimake. Ta tu ka dikhe gala ezgode.
17
A ande gua llive me ka braduiv tut, gia phenel le o Del, ta ni ka ave dino ande va katar gola kai tu dara lendar.
18
Soke ka braduiv tut ta ni ka mundaren tut e jarniea, soke cho zivoto ka avel cho chari, soke tu uzdisailan ande mande.
Romani Ursari Bible 2018
Biblia ande chib Romani Sociedad Bíblica Chilena, 2018
:
Save Notes