omẹni ụnụ hụ e gi ezioku lẹ ẹka rị mma lẹ ezi-omumẹ a sị, ‘Ma Osolobuẹ’ ụnụ gi e kun ẹfan m ogẹn ahụn alị ndị ọzọ e gi ẹfan Osolobuẹ gọzimẹ ibe wẹ, gi Osolobuẹ nyanma isi.”
“Hị ihiẹnni alị Juda, ku ẹ imẹ obodo Jerusalẹm, sị wẹ, Gbu ni (opi) ọdụ ghagbama alịnị ile! Weshi ni olu elu, sị: ‘Zugbama nị! Nị ẹnyi gbashi ni obodo ẹnyi ndị zeni d'a hụarị!’
Ẹwọrọ a ghagụọ ebe o bi pụha; onyẹ rị e tikpọ alị ichẹn-ichẹn e buligụọ. Ọ ghaọlẹ ebe ọ rị pụha d'e tikpọ alị ụnụ la iwi. Obodo ile rị alị ụnụ jẹnkọ d'e họnrin mkpọkọ-mkpọkọ, obodo ịhịan bilẹni.
Heuu, ụya e gbuẹ m! Ụya e gbuẹ m!! Lee ihiẹn m rị e fie-o. Heuu, ọ fụru m akpobi! Akpobi hụ a dụ m kpum-kpum. Asa m ẹka gba nkịtịn, makẹni a nụgụọ m opi agha; a nụgụọ m oro-agha.
Ntikpọ hụ a bịa, ọbịbịa-ọbịbịa; alịnị ile e mẹ mkpọkọ-mkpọkọ. Imẹ njube-ẹnya ohu e tikpọchanrịn wẹ ụlọ m ile, imẹ njube-ẹnya ohu e tikpọ wẹ ebe m'e butọ isi.
Hụn wẹ gihụ nụ ukwere ndị-agha gi ẹshin a lụ agha lẹ ndị hụn a gba ụta, ndị rị obodo ọwụlẹ a gbapụ: ndịnị rụban imẹ ọfịa d'a hụarị, ndị ọzọ a gbashi ọmụma rị elu ugu d'a warị; obodo ile a gba okpokoro, onwọnzini onyẹ bi imẹ wẹ.
M rị a nụ olu rị a kwan lekẹ okpoho imẹ rị e mẹ, lekẹ okpoho rị a mụ nwa ibuzọ! M rị a nụ kẹ Nwagbọọ wụ Zayọnụ rị e kwọn elu-elu, a tịnpụ ẹka, e yi, “Heuu, m'e d'a nwụnhụn; e we wẹ ndụn m ye ndị-izighẹ!”