|
| 1 |
|
| Nyakubaho naagira ati: Iwe Isiraeli, ku origaruka, obe niinye waagarukira; Ku oriiha ebihagaro by'ebishushani omu maisho gangye otarikuguragurutsya, |
|
| 2 |
|
| Nyowe Nyakubaho wandahira omu mazima n'omu buryo ohikire; nibwo orihaisa amahanga omugisha, gakakwesingirizamu. |
|
| 3 |
|
| Manya Nyakubaho naagira aba Buyuda n'abatwire Yerusalemu ati: Mutabire endaara zaanyu, mutabiba omu mahwa. |
|
| 4 |
|
| Imwe bashaija ba Buyuda 'mwe, n'abatwire Yerusalemu nimweshare, mube abangye, Nyowe Nyakubaho. Mweihe ekikoba aha mitima yaanyu, kashanga yangye etakaababugumaho nk'omuriro ahabw'ebibi bi mukora, ekabootsya; haza hakabura owaagiraaza. |
|
| 5 |
|
| Mukigambire ab'omuri Buyuda, mukirangirire ab'omuri Yerusalemu muti: Muteere enzamba omu nsi yoona, mwamuze nimugira muti: Nimuteerane tuhungire omu ndembo z'ebigo bigumire. |
|
| 6 |
|
| Nimwimutsye orurango murworekyeize Siyooni. Muhungye, mwerondere obukiriro. Haza muteeziringa: ahabw'okuba niinyija kubagwisiza akagwe, mbareetere okucwekyerera kuhango, birugye omu bukiizi-bwa-bumosho. |
|
| 7 |
|
| Nk'oku entare efurumuka omu kishaka kyayo, n'omuhwerekyerezi w'amahanga nikwo aizire naaruga owe kucwekyereza ensi yaawe; endembo zaawe zikaba amatongo, zikabura ab'okuzituuramu. |
|
| 8 |
|
| N'ahabw'ekyo mwezirikye ebiguniya mucure, muboroogye, ahabw'okuba kashanga ya Nyakubaho tekaturugireho. |
|
| 9 |
|
| Nyakubaho naagira ati: Ahari eryo izooba omugabe n'abategyeki baryayehwa amatsiko, abahongyerezi bagwe omu kahuriko, n'abarangi bashoberwe. |
|
| 10 |
|
| Naanye nikyo ngiriire nti: Ai bambe, Mukama Ruhanga! Buzimazima obeiheire kimwe eri ihanga na Yerusalemu, obu obigizire oti: Muryaba gye, haza kunu bihikiirweho kimwe rurara. |
|
| 11 |
|
| Omu bunaku obwo abantu baryagambira ab'omuri eri ihanga n'ab'omuri Yerusalemu bati: Omuyaga gurikwotsya gurugire omu bibungo by'emparamaata omu ihamba, kuhuuha abantu bangye. Tigwizire kuheheeza nari kushemeza. |
|
| 12 |
|
| Ogwo muyaga gurikutiinisa, niinye nguragiire. Mbwenu nyowe nyenka niinye ndaabacwere orubanja. |
|
| 13 |
|
| Reeba, omuzigu naija naimukyeera nk'ebicu, ebigari bye nibiiruka nk'omuyaga gw'akasooroora, n'embaraasi ze nizikiza empungu obwira. Ai bambe! Ebishi twaza kucwekyerera! |
|
| 14 |
|
| Iwe Yerusalemu yeyozyeho ebibi, obone kujunwa, Nooherera hi kuguma oine ebiteekateeko bibi? |
|
| 15 |
|
| Manya hariho entumwa erugire omu rurembo rwa Daani, n'omu bibungo bya Efuraimu neeranga enkuru mbi. |
|
| 16 |
|
| Egyo ntumwa eizire kugambira ab'omu mahanga bukiri kare, n'okurangira ab'omuri Yerusalemu ku ab'okubagota barugire omu nsi ya hare nibayogoorera endembo za Yuda. |
|
| 17 |
|
| Nibaija kukubakuba Yerusalemu, nk'oku abarinzi baziguuruka omusiri; ahabw'okuba ekangomera; Mukama nikwo arikugamba. |
|
| 18 |
|
| Iwe Buyuda, emitwarize yaawe n'ebi orikukora nibyo bikureetereire. Ekyo nikyo kifubiro kyawe ekiraakusaase, kikakwogamu. |
|
| 19 |
|
| Ai bambe, ai bambe! Ebishi nyine obusaasi! Nfundiriirwe omu mutima, Niguteera munonga enkuratima; tindikubaasa kutuuza; ahabw'okuba nimpurira enzamba erikuhuruza n'enduuru y'orugamba. |
|
| 20 |
|
| Akagwe nikakuratana n'akandi, ensi yoona ebaire amatongo. Amahema gangye gacwekyereziibwe kitaraariire, emikingo yangye yatemuka omu kaanya kakye. |
|
| 21 |
|
| Nimperera hi okuguma nindeeba orurango n'okuhurira eiraka ry'enzamba? |
|
| 22 |
|
| Manya abantu bangye n'abashema, tibarikummanya. N'abaana bataine bwengye kandi abatarikwetegyereza. N'abanyabwengye omu kukora ebibi, kwonka omu kukora ebirungi tibaine ki barikumanya. |
|
| 23 |
|
| Ku naayetegyereize ensi, naareeba eri amatongo, kandi erimu busha; nkyetegyereza eiguru, ndeeba riine ekizima. |
|
| 24 |
|
| Ku naanagire amaisho aha nshozi, naareeba nizitengyeeta, n'ebibungo byona nibizonga. |
|
| 25 |
|
| Ku naayetegyereize, naareeba hatariyo muntu n'omwe, n'enyonyi zoona zaahungire. |
|
| 26 |
|
| Nkeetegyereza, naareeba egyo nsi erikweza yaabaire eihamba, n'endembo zaayo zoona zaacwekire amatongo omu maisho ga Nyakubaho, ahabw'okuzigirira ekiniga kingi munonga. |
|
| 27 |
|
| Manya Nyakubaho naagira ati: Ensi yoona eryahinduka eirungu, kwonka tindigicwekyerereza kimwe. |
|
| 28 |
|
| Nikyo egi nsi ericurira, eiguru rikairirimba; ahabw'okuba ekyo nkigambire naakimariirira, kandi tindikyeefuuza, nobu kwakuba okukireka. |
|
| 29 |
|
| Ab'omu buri rurembo baryahunga baahurira endigito y'ab'ahambaraasi n'ey'ab'amata bashenshere omu bishaka, basharabambe enkiri, endembo zoona zitsigweho, habure owaazituuramu. |
|
| 30 |
|
| Mbwenu iwe nshoberwa 'we, ekirikukujwaza ebya karari, okeehunda eby'ezaabu, okahangusya amaisho noogasiiga erangi, ni ki? Nooyegirira gye busha! Nkunzi zaawe hati nizikugaya, nizenda kukwita. |
|
| 31 |
|
| Manya mpuriire okuborooga nk'okw'omukazi orikurumwa, oine obusaasi nk'obw'omukazi orikujigaija. Okwo kuborooga n'okwa Siyooni erikusheemeeka, ekanaga emikono neecura, eti: Ai bambe! Ebishi naaza kukabira omu maisho g'abarikwenda kuunyita! |
|
|
|
|